“Daghang Buhaton Diha sa Buluhaton sa Ginoo”
1 Tino gayod nga kita may puliking eskedyol sa teokratikanhong mga kalihokan sa Abril ug Mayo! Sa Abril 14 atong saulogon ang Memoryal sa kamatayon ni Kristo. Kutob sa maarangan daghang tawo ang dasigon gayod nga makatambong nianang hinungdanong okasyon: mga kaila sa negosyo, di-magtutoong mga paryente; mga kaeskuwela, bag-ong interesadong mga tawo, ug mga ginatun-an sa Bibliya. Himoang listahan niadtong imong giplanong dapiton aron walay masayloan.
2 Sa sunod semana atong dasigon ang tanan nga mitambong sa Memoryal sa pagpaminaw sa espesyal nga pahayag publiko sa Abril 23, sa ulohang “Kataposan sa Bakak nga Relihiyon Haduol Na.” Gilaoman nga daghan sa mga interesado nga makadungog niining madayganong mensahe buot nga makig-uban sa kongregasyon sa regular nga paagi, dili lamang sa espesyal nga mga okasyon.
3 Espesyal nga Kingdom News Pagaluwatan: Usa ka hinungdanong bahin sa panagkatigom sa Abril 23 mao ang pagluwat sa nunot-panahong upat-panid nga Kingdom News nga hatagan ug kaylap nga pagpanagtag hangtod sa Mayo 14. Dili ka ba mouyon nga aduna unyay “daghang buhaton diha sa buluhaton sa Ginoo” niining panahona sa Memoryal?—1 Cor. 15:58.
4 Ang usa ka suplay sa Kingdom News igapadala ngadto sa matag kongregasyon. Ang mga kahon nga nasudlan sa Kingdom News kinahanglang ibutang diha sa segurong dapit ug dili angayng buksan hangtod sa paniklop sa programa sa Abril 23. Nianang higayona ang Kingdom News luwatan ngadto sa mga igsoon ug ngadto sa publiko. Sa paniklop sa mga tigom sa kongregasyon, sirkitong mga asembliya, o mga programa sa espesyal adlaw nga asembliya sa Abril 23, kadtong nanambong makadawat ug usa ka kopya aron nga sila masinati niana ug masangkapan alang sa pagpanagtag niana.
5 Ang mga Ansiyano Adunay Daghang Buhaton: Sayo niining bulana ang lawas sa mga ansiyano angay nga magtagbo aron hisgotan ang mga detalye sa espesyal nga kampanya. Ang mga kongregasyon kinahanglang maningkamot sa pagkobre sa tanan nilang natudlong teritoryo. Una pa matapos ang kampanya, himoang usa ka espesyal nga panikaysikay nga makobrehan kadtong mga teritoryo nga wala makobrehi sa miaging unom ka bulan. Tungod sa kahinungdanon sa buluhaton, sa walay duhaduha daghan ang magpalista ingong mga oksilyare payunir. Daghang ginatun-an sa Bibliya ang makig-uban usab kanato ingong bag-ong di-bawtismadong mga magmamantala. Pagkamakalilipay nga higayon nga atong mabatonan samtang kita duyog nga nagahago diha sa buluhaton sa Ginoo!
6 Ang mga tagdumala sa Pagtuon sa Libro sa Kongregasyon angayng maghimo ug tinong mga kahikayan sa grupong pagsangyaw sa tungatungang semana ug sa mga Sabado ug mga Domingo. Dugang pa, ang magabiing pagsangyaw angayng ieskedyol labing menos kausa sa semana sulod sa kampanya.
7 Ang mga tigom sa dayong pagsangyaw angayng ieskedyol aron nga ang mga magmamantala ug mga payunir makasugod ug sayo sa ministeryo kada adlaw. Kining mga tigoma kinahanglang mubo ra. Sa matag higayon sa maong tigom angayng ipakita ang usa ka yanong presentasyon sa Kingdom News. Ang mga magmamantala kinahanglang magdala usab ug kinabag-ohang mga gula sa magasin nga ipahiluna kon gipakita ang interes. Ang mga tigom sa dayong pagsangyaw sa hapon hayan maglakip ug usa o duha ka sugyot sa paghimog mga balikduaw niadtong kinsa midawat sa Kingdom News. Hinuon, ang pipila ka magmamantala mopalabing makig-ambit sa pagpanagtag sa buntag ug hapon. Tungod niana, paneguroon gayod sa magtatan-aw sa pag-alagad nga mabatonan ang igong teritoryo. Ang ngalan ug adres sa matag usa nga nagapakitag interes kinahanglang isulat diha sa house-to-house record.
8 Kon ang usa ka kongregasyon nagatabang sa lain sa pagkobre sa teritoryo niini, ang mga ngalan ug mga adres sa interesadong mga tawo kinahanglang itunol ngadto sa kongregasyon nga nagagunit sa maong teritoryo.
9 Mga ginikanan, ang inyo bang mga anak nagauswag ngadto sa pagkahimong di-bawtismadong mga magmamantala? Namatikdan nga sa pipila ka kongregasyon, ang pipila ka bata nag-uban sa ilang dedikadong mga ginikanan diha sa ministeryo sa ubay-ubay nang mga tuig, ug maayo man kaayo ang nabuhat sa mga bata, bisan tuod dili pa sila mga magmamantala. Ang mga ginikanan angayng mamalandong kon ang ilang mga anak tinuod na bang kuwalipikado niining pribilehiyoa. Ang duha sa mga ansiyano makahisgot sa tanang butang uban sa ulo sa pamilya ug tinoon kon ang bata maihap na ba ingong di-bawtismadong magmamantala.—om-CV p. 99-100.
10 May mga magmamantala ba sa teritoryo sa inyong kongregasyon nga dili na aktibo sa pagtanyag ug halad sa pagdayeg kang Jehova? (Heb. 13:15) Ang pipila nga diaktibo basin nabuntog sa kawalay-kadasig o sa mga kabalaka sa kinabuhi, bisan pag nagapadayon sa pagtapot sa moral nga mga sukdanan sa Bibliya. Ang usa ka mahigalaong duaw sa usa sa mga ansiyano hayan mopalihok kaniya sa pagbalik ngadto sa regular nga pakig-uban sa kongregasyon ug, sa tukmang panahon ngadto sa nabag-o pag-usab nga kalihokan sa ministeryo.
11 Ang Tanan nga Kuwalipikado Makaambit Niining Makalilipayng Buluhaton: Ang pipila ba sa imong kabataan o mga tin-edyer nalisdan sa pagpakig-ambit sa balaybalay nga ministeryo? Komusta na man kamong mga bag-ohan kansang kasinatian sa pagsangyawng buluhaton limitado pa? Inyong makaplagan kining espesyal nga buluhaton sa Kingdom News nga labing makalilipay! Ang usa ka yanong presentasyon mao lamang ang gikinahanglan.
Hayan ikasulti nimo ang sama niini:
◼ “Niining bulana kami nagapanagtag sa usa ka hinungdanong mensahe sa 232 ka kayutaan libot sa kalibotan. Ang mensahe hinungdanon tungod kay kini nagahatag kanato ug solidong mga katarongan sa pagtuo nga adunay sulbad sa mga suliran nga atong giatubang karon. Buot namong mabatonan nimo ang imong personal nga kopya.”
O mahimong sulayan nimo kini:
◼ “Niining bulana duolan sa lima ka milyon nga mga boluntaryo ang nagapanagtag sa usa ka hinungdanong mensahe sa daghang pinulongan. Kini giandam alang sa katawhan nga buot makakita sa kataposan sa mga suliran nga giatubang natong tanan karon. Kini ang imong personal nga kopya.”
Kining yanong presentasyon hayan mohaom kanimo:
◼ “Kami nagadasig sa matag usa sa pagbasa niining hinungdanong mensahe nga nagaulohan ug [basaha ang ulohan sa Kingdom News]. Matikdi kon unsa ang giingon dinhi sa panid 2 bahin sa nagauswag nga mga suliran sa . . . [basaha ang piniling tudling gikan sa Kingdom News]. Kami makaseguro nga malipay ka sa pagbasa niining nunot-panahong mensahe. Kini ang imong kopya.”
12 Batoni ang personal nga interes sa matag usa nga nagadawat sa Kingdom News. Buot natong maseguro nga ang tanan niadtong nagapakitag interes nahatagag usa ka personal nga kopya. Kon walay tawo sa balay, markahi ang imong house-to-house record aron nga makabalik ka sa ulahi aron pagtanyag sa Kingdom News ngadto sa tagbalay. Kining maong Kingdom News nga mga tracts magamit diha sa pagsangyaw sa kadalanan sa dihang magapakitag interes ang usa ka tawo, apan dili kini angayng ipasagad lang ug panghatag nga daw sama kinig mga handbill. Hinunoa, duola ang mga lumalabay, ug isaysay ang kahinungdanon sa mensahe nga gipaila. Gamita ang Kingdom News diha sa impormal nga pagsangyaw, samtang nagabiyahe, o dihang nagasangyaw sa mga isigka-empliyado sa pahulay sa maudto. Kadtong nagamasakiton o nagaluya kaha makatanyag niini ngadto sa mga bisita, sa mga doktor ug mga nars, sa mga magbabaligya, ug sa uban pa nga moanha sa ilang balay.
13 Pila man ka balikduaw ang imong himoon sa panahon sa kampanya? Walay duhaduha daghan gayod, tungod kay ang tanan nga nagpakitag interes sa Kingdom News kinahanglan mang balikduawon. Sa unang duaw, maoy labing maayo ang pagpaila lamang sa Kingdom News. Unya, sa dihang ikaw mobalik, himoang pipila ka komento bahin sa pagkanunot-panahon sa mensahe diha sa Kingdom News. Paminaw pag-ayo samtang ipahayag sa tagbalay ang iyang opinyon diha sa iyang nabasa. Ang iyang mga komento makatabang kanimo sa pagkasayod kon unsa ang itanyag diha sa kinaulahiang mga magasin ug tingali kon unsaon pag-andam alang sa dugang mga panaghisgot. Kon mabatonan nimo ang mauyonong pagsanong diha sa pagbalikduaw, sulaying makasugod ug pagtuon sa Bibliya.—1 Cor. 3:6, 7.
14 “Ang Inyong Kahago Dili Kawang”: Mapuslanon ba kining buluhatona? Si Pablo mipasalig sa mga taga-Corinto: “Ang inyong kahago dili kawang may kalabotan sa Ginoo.” (1 Cor: 15:58) Sa milabayng katuigan, ang atong mga panikaysikay sa pagpanagtag ug Kingdom News napanalanginan gayod. Usa ka magtiayon nga mibalhin ngadto sa usa ka walay sulod nga apartment nakakaplag ug usa ka daang kopya sa Kingdom News diha sa hunos. Kadto mao lamang ang nahibiling butang sa tibuok apartment. Human mabasa kini, ilang gikontak ang lokal nga kongregasyon ug mihangyog pagtuon sa Bibliya. Sila misugod sa pagtambong sa tanang tigom ug sa ulahi nagtinguha nga mabawtismohan. Tingali ang usa ka kopya nga imong ibilin mopahinabo ug samang mga resulta!
15 Kita adunay dako kaayong buluhaton sa unahan nato. Ang atong tumong mao nga ang matag kongregasyon magkobre sa tinudlo niining teritoryo kutob sa Mayo 14 o sa kataposan sa bulan kon kinahanglan pang iuswag ang panahon sa pagpanagtag sa Kingdom News. Ang mga pagpadala ginahimo na aron nga, sa mga kongregasyon sa siyudad o kadtong dagkog teritoryo, ang matag regular payunir magadawat ug mga 250 ka kopya sa Kingdom News ug ang kada magmamantala sa kongregasyon makakuhag mga 50 ka kopya. Ang mga kongregasyon nga adunay mas gagmay nga mga teritoryo magadawat ug mga katunga sa gidaghanon sa itaas. Ang kuwenta sa kongregasyon panilngan sa bili nga 20 sentabos sa matag kopya sa Kingdom News, busa kadtong magakuha sa ilang suplay buot gayod nga moamot niining kantidara aron makaabag sa pagkobre sa mga galastohan. Kon tungod sa dako kaayong natudlong teritoryo ang pipila ka kongregasyon wala makakobre sa ilang teritoryo sa tungatunga sa Mayo ug ang mga kopya mabatonan pa, hayan mapuslanon ang pagdapit sa duol nga mga kongregasyon aron makatabang. Sa ubang mga kongregasyon, ang panginahanglan mahimong mahulipan sa lokal kon ang mga magmamantala magpauswag sa ilang kalihokan pinaagig pagpalista ingong oksilyare payunir o pinaagig mas kanunay nga pagpakig-ambit sa ministeryo.
16 Ang bug-os-kalag nga debosyon kang Jehova gikinahanglan gayod kon buot natong molampos sa atong buluhaton. (Col. 3:23) Ang mga kinabuhi nalangkit. Ang katawhan dili makahimo sa pagsalikway sa kahulogan sa mga kahimtang sa kalibotan karon. Ang panahon talitapos na. Kinahanglan silang moatubang sa kamatuoran nga wala sa tawo ang sulbad niining mga suliran sa kalibotan. Anaa lamang sa Diyos ang sulbad. Kadtong buot nga makabaton ug panalangin sa Diyos kinahanglang tinong molihok, nga walay langan, uyon sa iyang mga kinahanglanon.
17 Sa kataposan sa espesyal nga kampanya sa Mayo 14, kita ba maghinayhinay sa atong kalihokan? Dili! Magpabilin kitang puliki uyon sa inspiradong tambag ni Pablo.