“Ang Bag-ong Milenyo—Unsang Kaugmaon ang Gitanyag Niini Alang Kanimo?”
1 Kanang pangutanaha anaa na sa mga hunahuna sa mga tawo sa tibuok yuta. Bisan kon ang katawhan dakog nalampos latas sa kasiglohan, ang katawhan nahigawad tungod kay ang paninugdang mga suliran nga mihampak sa katawhan sulod sa mga milenyo naglungtad pa gihapon. (Job 14:1; Sal. 90:10) Asa man makakaplag ang katawhan ug kahupayan?
2 Sulod sa mga bulan sa Oktubre ug Nobyembre, kita adunay linaing kahigayonan sa pagtagana sa atong mga silingan ug mga tubag nianang pangutanaha. Sa unsang paagi? Pinaagi sa pag-apod-apod sa Kingdom News Num. 36. Kini nag-ulohan ug “Ang Bag-ong Milenyo—Unsang Kaugmaon ang Gitanyag Niini Alang Kanimo?” Sulod sa unang katunga sa Oktubre, atong itanyag ang mga magasing Bantayanang Torre ug Pagmata! Dayon sugod sa Lunes, Oktubre 16, hangtod sa Biyernes, Nobyembre 17, kita makig-ambit sa kaylap nga pag-apod-apod sa Kingdom News Num. 36. Panahon niini nga kampanya, atong isentro ang pagtagad sa pagpahimutang sa Kingdom News Num. 36 sa mga adlaw sa semana. Sa mga hinapos sa semana, atong ipresentar kana duyog sa bag-ong mga magasin.
3 Makig-ambit Ka ba sa Bug-os? Ang mga ansiyano, ministeryal nga mga alagad, ug mga payunir buot nga manguna niini nga kampanya, sanglit sila ang anaa sa unahan sa maong buluhaton. Daghang magmamantala ang nagpasibo sa ilang mga kahimtang aron makaoksilyare payunir sulod sa usa o duha ka bulan sa pag-apod-apod. Ang uban nagplano sa paggugol ug dugang panahon kay sa naandan diha sa ministeryo.
4 Ang mga tagdumala sa Pagtuon sa Libro sa Kongregasyon makatabang sa pagdasig sa matag membro sa ilang grupo aron magpakig-ambit sa bug-os sa pag-apod-apod sa Kingdom News Num. 36. Hayan adunay pipila ka magmamantala nga nahimong di-aktibo diha sa buluhatong pagsangyaw. Angayng duawon sila sa mga ansiyano aron susihon kon unsay mahimo sa pagtabang kanila. Tingali ang mga kahikayan himoon para sa batid nga magmamantala sa pagkuyog sa matag di-aktibong tawo diha sa kanataran sulod niining mga bulana. Ang yanong presentasyon sa Kingdom News Num. 36 hayan mao lamang ang gikinahanglan aron maaktibo pag-usab kini nga mga magmamantala.
5 Kini usab maoy maayong kahigayonan alang sa mga estudyante sa Bibliya nga hapit nang makatapos sa librong Kahibalo ug takos na ingong di-bawtismadong mga magmamantala sa pagsugod sa pagpakig-ambit diha sa ministeryo. Bisan ang mga batan-on makaambit man gayod niining makapadasig nga buluhaton.
6 Usa ka yanong presentasyon mao lamang ang gikinahanglan. Tingali ikaw moingon:
◼ “Akong giboluntaryo ang akong panahon sa pagtabang sa pag-apod-apod niining hinungdanon kaayong mensahe ngadto sa matag pamilya sa [ngalan sa siyudad o lungsod]. Kini ang imong kopya. Palihog basaha kana.” Hayan adunay kaayohan nga dili magdala ug bag sa dihang mag-apod-apod ug Kingdom News Num. 36.
7 Maayong-Pagkaplano nga mga Tigom sa Dayon Nang Pagsangyaw: Kinahanglang paneguroon sa mga ansiyano nga ang mga kahikayan sa pagsangyaw maoy kombenyente ug praktikal. Ilabinang angayng paneguroon sa magtatan-aw sa pag-alagad nga adunay daghang balaybalay ug negosyohanang teritoryong mabatonan aron ang tanan makaambit sa bug-os diha sa buluhaton. Diin posible, ang mga tigom sa dayon nang pagsangyaw angayng organisado sa matag adlaw sa semana, sa mga hinapos sa semana, ug sa magabii. Mahimong himoon ang mga kahikayan aron magtagbo sa mga haponhapon alang sa kaayohan sa mga nanagtungha, mga trabahanteng magbansiliay sa trabaho, ug uban pa.
8 Kon Unsay Mahimo Kanilang mga Wala-sa-Balay: Ang atong tumong mao ang pagpakigsulti ngadto sa daghang tagbalay kutob sa maarangan. Kon sa imong pagduaw walay tawo sa balay, isulat ang adres ug moduaw sa laing oras sa adlaw. Kon sa kataposang semana sa kampanya wala ka molampos sa pagkontak niini nga mga tagbalay, makabilin ka kanila ug usa ka kopya sa Kingdom News Num. 36 diha sa dapit nga dili makita sa mga lumalabay. Ang lokal nga mga ansiyano mahimong maghatag ug instruksiyon sa kongregasyon nga magbilin ug usa ka kopya sa Kingdom News Num. 36 diha sa mga wala-sa-balay sa unang pagduaw sa dihang magkobre sa ilayanhong mga dapit ug sa mga dapit nga adunay dugang teritoryo kay sa makobrehan sulod sa kampanya.
9 Magmapuliki Kita! Ang mga kongregasyon kinahanglang manlimbasog sa pagkobre sa ilang teritoryo antes matapos ang kampanya sa Nobyembre 17. Kon ang inyong teritoryo dako kaayo, ang pipila ka magmamantala hayan mag-inusarang mag-apod-apod sa dapit nga kini praktikal ug luwas. Kini nga kahikayan magpasayon sa pag-abot sa daghang takos nga mga tawo kutob sa maarangan. Tinoa ang paghupot ug maayong talaan sa tanang interes nga nakaplagan.
10 Angayng panagan-an sa mga ansiyano kon unsa ka daghang ekstrang mga magasin ang gikinahanglan sa kongregasyon ug orderon sumala niana. Dili kinahanglan nga moorder ug Kingdom News Num. 36, sanglit dunay suplay nga ipadala ngadto sa matag kongregasyon. Diin adunay igong teritoryo, ang espesyal, regular, ug oksilyare nga mga payunir makabaton ug 250 ka kopya ang matag usa aron iapod-apod, samtang ang mga magmamantala sa kongregasyon gahinag 50 ka kopya ang matag usa. Busa ikaw ba andam na ug maikagong magmapuliki niining linain nga kalihokan? Pagkadakong pribilehiyo alang kanato ang pagpahibalo sa atong tanang silingan kon unsay gisaad sa Diyos sa haduol nga umaabot!