Makaylapong Ipang-apod-apod ang Kingdom News No. 35
1 Ang Oktubre ug Nobyembre maoy puliking mga bulan alang kanatong tanan. Sa unang 11 ka adlaw sa Oktubre, atong itanyag ang tagsatagsa ka kopya sa Ang Bantayanang Torre ug Pagmata! Dayon, gikan sa Dominggo, Oktubre 12, hangtod sa Dominggo, Nobyembre 16, kita moapil sa tibuok kalibotang pagpang-apod-apod sa Kingdom News No. 35. Maoy atong pribilehiyo ang pagdala ug bililhong mensahe ngadto sa tanang tawo diha sa atong dapit. Mao kini ang tubag sa pangutana, “Maghigugmaay Pa Kaha ang Tanang Tawo sa Usag Usa?” Sulod niining espesyal nga kampanya, atong iapod-apod ang Kingdom News No. 35 sa mga adlaw sa semana. Sa mga hinapos sa semana, dugang pa sa pagpresentar sa Kingdom News, atong ipasiugda ang bag-ong mga isyu sa mga magasin.
2 Kinsa ang Mahimong Magpakig-ambit? Segun sa naandan, ang mga ansiyano maoy manguna sa buluhaton. Malipay ang matag usa sa pagpanagtag sa Kingdom News, ug sa walay duhaduha daghan gayong magmamantala ang magpatala ingong mga oksilyare payunir sulod sa usa o duha ka bulan sa kampanya. Ang ubang mga magmamantala buot nga mogugol ug dugang panahon kay sa kasagaran diha sa ministeryo.
3 Aduna ka ba ing tinun-an sa Bibliya nga dugaydugay na sa iyang pagtuon sa Kahibalo nga libro ug sa dili madugay mahimong takos sa pagduyog sa pag-alagad sa kanataran? Tingali siya mahimong di-bawtismadong magmamantala aron moduyog sa panahon sa kampanya sa Kingdom News. Ang yanong presentasyon mao lamay gikinahanglan sa pagpailaila sa tract. Pananglitan, ang usa tingali makaingon: “Bililhon kaayo kining mensahea nga kini ginaapod-apod sa tibuok kalibotan niining bulana diha sa 169 ka pinulongan. Buot kong makabaton ka sa imong personal nga kopya.” Bisan ang gagmayng kabataan makapakig-ambit ug maayo niining makapahinam nga buluhaton.
4 Ang mga nagadumala sa pagtuon sa libro angayng magdasig sa matag membro sa ilang grupo nga makig-ambit sa bug-os sa pag-apod-apod sa Kingdom News No. 35. Basin adunay mga magmamantala usab nga nahimong di-aktibo apan maaktibo pag-usab diha sa pag-alagad kon ilang madawat ang gikinahanglang pagdasig. Sa dili pa ang kampanya, ang mga ansiyano kinahanglang moduaw sa matag usa kanila aron sa pagtino kon unsay mahimo sa pagtabang kanila sa pagkuyog sa may kasinatiang mga magmamantala niining bahina sa ministeryo.
5 Kanus-a Kita Mahimong Magtigom Alang sa Kanataran? Kining tanang buluhaton magkinahanglag ginurupong pagsangyaw nga mga kahikayan nga kombenyente ug praktikal. Diin posible, ang mga tigom sa dayon na ang pagsangyaw angayng organisado sa matag adlaw sa semana, sa mga hinapos sa semana, ug sa magabii. Angayng himoon kini sa mga oras nga magpaarang sa mga magmamantala ug mga payunir sa pagpahimulos sa bug-os nga yugto sa pagsangyaw. Ang mga kahikayan mahimo usab aron magtagbo sa kahaponon alang sa kaayohan sa mga nanagtungha, mga trabahanteng magbansiliay sa trabaho, ug uban pa. Ang magtatan-aw sa pag-alagad angayng magtino nga adunay daghang mabatonan sa balaybalay ug negosyohanang teritoryo aron ang matag usa makaambit sa bug-os diha sa buluhaton. Diin adunay daghang magmamantala sa usa ka dapit, kinahanglang magmaalamon sila kon pilay mokobre sa usa ka seksiyon sa kobrehanang teritoryo.
6 Komosta ang mga Wala-sa-Balay? Buot natong makigsulti sa personal ngadto sa mas daghang tagbalay kutob sa maarangan aron sa pagsaysay kon nganong angay nilang basahon ang Kingdom News No. 35. Busa kon walay tawo ang balay sa imong pagduaw, isulat ang adres ug mobalik sa laing oras sa adlaw. Kon sa ulahing semana sa kampanya ang imong mga paningkamot sa pagkontak niining mga tagbalaya sa gihapon napakyas, makabilin ka ug usa ka kopya sa Kingdom News diha sa pultahan sa dapit nga dili makita sa mga lumalabay. Sa residensiyal nga mga dapit, magmaalisto sa pagtanyag sa Kingdom News ngadto sa mga tawo kinsa tingali nanaglakaw sa dalan. Sa kobrehan ang banika nga mga dapit ug diin adunay dugang teritoryo kay sa makobrehan sulod sa kampanya, ang usa ka kopya sa Kingdom News mahimong ibilin sa mga wala-sa-balay sa unang duaw.
7 Unsay Atong Tumong? Ang mga kongregasyon kinahanglang manlimbasog sa paghurot sa ilang bug-os nga suplay sa Kingdom News sa pagkobre sa ilang tanang teritoryo antes matapos ang kampanya sa Nobyembre 16. Kon ang asaynment nga teritoryo sa inyong kongregasyon dako kaayo ug kon luwas ang pagkobre nga mag-inusara inay nga may kauban, hayan makaplagan mong praktikal ang pagbuhat sa ingon. Magpaarang kini kaninyo sa pag-abot sa daghang takos nga mga tawo kutob sa maarangan uban sa maayong balita. (Mat. 10:11) Hayan makaayo ang pagbitbit ug pipila ka tract ug pagdalag usa ka Bibliya diha sa imong bulsa o pitaka, inay kay mogamit ug bag. Tinoa ang paghupot ug maayong talaan diin ang interes makaplagan.
8 Anbam Ka na Bang Mosugob? Angayng panagan-an sa mga ansiyano kon unsa ka daghang ekstrang mga magasin ang gikinahanglan sa kongregasyon ug orderon gayod kana. Dili kinahanglan nga moorder ug Kingdom News No. 35, sanglit dunay suplay nga ipadala sa matag kongregasyon. Diin dunay igoigong teritoryo, ang espesyal, regular, ug mga oksilyare payunir makabaton ug 250 ka kopya ang matag usa aron ipanagtag, samtang ang mga magmamantala sa kongregasyon gahinag 50 ka kopya ang matag usa. Aduna kitay daghang buluhatong pagahimoon. Maikagon ka ba sa pagpakig-ambit niining makapalipayng buluhaton? Sa walay duda ikaw maikagon. Atong hatagag posibleng makaylapon gayong pagpang-apod-apod ang importanteng pinasukad-sa-Bibliyang mensahe diha sa Kingdom News No. 35!