Himayaa ang Panganay ni Jehova!
1 Sa Domingo, Nisan 9, 33 K.P., usa ka dakong panon sa katawhan nga may mga sanga sa palma sa ilang mga kamot naghimaya sa panganayng Anak ni Jehova, ingong “ang Usa nga nagaanhi ingong Hari sa ngalan ni Jehova!” (Luc. 19:38; Heb. 1:6) Sa Lunes ug Martes, Nisan 10 ug 11, si Jesus okupado kaayo sa iyang publikong ministeryo, nga naghimo nianang maong kataposang mga adlaw nga labing puliki sa iyang yutan-ong kinabuhi.
2 Karong adlawa, ang mas dakong panon sa katawhan nga may masambingayong mga sanga sa palma nagasinggit: “Ang kaluwasan utang namo sa atong Diyos, nga naglingkod sa trono, ug sa Kordero.” (Pin. 7:9, 10) Sa Marso 26, kita magatigom aron pagsaulog sa Memoryal sa kamatayon ni Kristo. Samtang kanang petsaha nagasingabot, mapakusog ba nato ang atong mga panikaysikay diha sa ministeryo ug sa ingon magadugang niining globonhong singgit sa pagdayeg?
3 Pauswaga ang Kalihokan sa Kanataran: Daghang magmamantala nagpalista na ingong mga oksilyare payunir sa Marso. Buot ba nimong moduyog kanila? Kon mao, itunol ang imong aplikasyon sa walay langan.
4 Kon makaalagad ka man ingong usa ka oksilyare payunir o dili, buot nimong makabaton ug bug-os nga pagpakig-ambit sa ministeryo sa Marso. Ang kongregasyon mahimong makahikay sa grupong pagsangyaw kada adlaw sa bulan.
5 Ang tanang kongregasyon kinahanglang maghikay sa usa ka espesyal nga tigom sa dayon nang pagsangyaw sa Sabado, Marso 26. Bisan ug adunay daghang pagabuhaton sa pag-andam alang sa Memoryal, ginarekomendar nga ang tanan nga makaarang niana makig-ambit sa ministeryo sa kanataran sa Sabado sa buntag. Dugang pa sa balaybalay nga buluhaton, seguroang kadtong imong gidapit sa Memoryal may kasakyan ug nga sila nahibalo sa panahon ug dapit sa tigom.
6 Dapita ug Dasiga ang Uban: Si Jesus nagsugo sa iyang mga sumusunod: “Padayong buhata kini sa paghandom kanako.” (1 Cor. 11:24) Samtang ang dinihogang mga sumusunod ni Jesus magatuman nianang sugoa, ang matag alagad ni Jehova gidapit sa pagtambong ug pagpaniid sa kasaulogan sa Memoryal. Apil sa uban, kinahanglang imong dapiton ang mga gitun-an sa Bibliya, mga paryente, di-magtutuong mga kapikas, ug isigkatrabahante. Paghimog listahan aron walay usa nga malaktawan.
7 Aduna unyay dugang mga kahigayonan sa pagdasig sa interesadong mga tawo diha sa Memoryal mismo. Paneguroang makaabot ug sayo aron imong matimbaya ang mga bag-ohan nga nanambong sa unang higayon. Kon ubay-ubay sa imong mga gitun-an sa Bibliya ang motambong, mahimong mapuslanon alang sa laing magmamantala nga molingkod tapad sa pipila kanila sa panahon sa tigom. Dapita ang mga bag-ohang nagatambong sa pagbalik sa Domingo, Marso 27, alang sa regular nga Miting Publiko sa kongregasyon.
8 Sa paniklop sa pagsaulog sa Memoryal, sa dihang magdungan ang atong mga tingog sa pag-awit sa awit 105, “Tamdon ang Panganay ni Jehova!,” hinaot nga makalantaw ta ug balik uban ang katagbawan sa masibotong bulan sa teokratikanhong kalihokan ngadto sa kadayegan ni Jehova!