Bug-os Paluyohi ang Inyong Programang Miting Publiko sa Kongregasyon
1 Pipila ka tuig kanhi usa ka batan-ong lalaki nakakaplag ug usa ka handbill nga nagapahibalo sa mga tigom sa lokal nga kongregasyon. Sanglit kay nangita siya sa kamatuoran, siya medisider sa pagtambong sa Miting Publiko nianang maong Domingo, nga miabot sa tigomanan nga sayo. Usa ka magmamantala mainitong miabiabi kaniya ug mitanyag kaniyag usa ka pagtuon sa Bibliya. Kining batan-ong lalaki naghimog kusog nga pag-uswag ug nabawtismohan pipila ka bulan sa ulahi. Kita makakat-on ug labing menos tulo ka mapuslanong mga leksiyon gikan niining kasinatiana.
2 Una, ang Miting Publiko ginapahibalo. Gigamit ba nimo ang mga handbills sa pagpahibalo sa mga Miting Publiko sa inyong kongregasyon? Samtang ang tsirman nagapahibalo sa ulohan sa pahayag publiko nga ihatag sa sunod semana, hunahunaa kadtong anaa sa imong teritoryo nga ilabinang mainteres sa ulohan. Ang pipila ka tawo dili gustong mobasa, apan mahimong andam silang magpatalinghog sa usa ka pakigpulong diha sa usa ka Kasulatanhong ulohan.
3 Ikaduha, ang bag-ohan mainitong giabiabi. Planohang moabot ug sayo sa tigomanan aron ikaw makatimbaya sa imong mga igsoon ingon man sa bisan kinsang mga interesado. (Heb. 10:24) Kon ang usa ka bag-ohan mitambong sa unang higayon, mahimong wala siya mahibalo kon unsay pagadahomon. Isaysay nga ang atong mga tigom magsugod uban ang awit ug pag-ampo, ug tug-ani siya kon sa unsang paagi dumalahon ang tigom. Kon tukma, dapita siya sa paglingkod tapad kanimo aron imong ikapaambit ang imong Bibliya ug songbok uban kaniya. Dapita siya sa pagpakighisgot kanimo sa bisan unsang mga pangutana nga anaa kaniya sa dihang mahuman na ang tigom.
4 Ikatulo, ang pakigpulong naandam pag-ayo. Kadtong nagahawas sa kongregasyon ingong mga mamumulong publiko nagagugol ug daghang oras sa pag-andam sa materyal aron ang mamiminaw maaghat sa gugma ug maayong mga buhat. Kitang tanan ubos sa pagpit-os karong adlawa, ug ang makapahayahay nga mga kamatuoran gikan sa Pulong sa Diyos makatabang kanato sa paglahutay. Siyempre, ang pahayag publiko dili makabenepisyo nato kon dili kita mohatag ug suod nga pagtagad sa kon unsay ginasulti. May kalisdanan ba ikaw usahay sa pagsentro sa imong pagtagad sa panahon sa pakigpulong? Mahimong mapuslanon ang paghimog mubong mga nota, sama sa atong himoon sa panahon sa atong mga kombensiyon. Sa pagpangandam, hunahunaa kon unsa na ang imong nahibaloan sa ulohan ug bisan unsang mga pangutana nga motungha maylabot niana. Unya matikdi kon sa unsang paagi tubagon sa mamumulong ang maong mga pangutana. Paneguroang mosunod uban sa imong Bibliya sa dihang ang matag Kasulatan ginabasa ug ginapatin-aw.
5 Ang Sosyedad nagtaganag mga pahayag publiko diha sa dakong nagakadaiyang mga ulohan. Pinaagig pagpakigtambayayong sa nagadumalang magtatan-aw o sa usa ka igsoong lalaki nga gitudlo niya, ang lawas sa mga ansiyano magapatakdo sa programa sa Miting Publiko sa kongregasyon aron nga ang mga ulohan nga ipahayag magtumong sa lokal nga mga panginahanglan. Ayawg sipyata ang bisan unsa niining mahinungdanong impormasyon, ug dasiga ang mga bag-ohan sa pagkuhag bug-os nga kaayohan gikan sa inyong senemanang Miting Publiko sa kongregasyon.