KAPITULO 7
Mga Tigom nga ‘Magdasig sa Pagpakitag Gugma ug sa Paghimog Maayong mga Buhat’
LATAS sa kasiglohan, ang katawhan ni Jehova nagatigom sa organisadong paagi. Sa karaang Israel, ang tanang lalaki mangadto sa Jerusalem para sa tulo ka dagkong pista. (Deut. 16:16) Sa unang siglo, ang mga Kristohanon regular nga nagtigom, nga sagad diha sa balay. (Filem. 1, 2) Karon, duna tay mga tigom, asembliya, ug kombensiyon. Nganong dunay panagkatigom ang mga alagad sa Diyos? Kay usa kini ka importanteng bahin sa atong pagsimba.—Sal. 95:6; Col. 3:16.
2 Ang mga tigom makahatag sab ug kaayohan sa mga manambong. Bahin sa matag ikapitong tuig, panahon sa Pista sa mga Balongbalong, ang mga Israelinhon gisugo: “Tigoma ang katawhan, ang mga lalaki, babaye, bata, ug mga langyaw nga nagpuyo sa inyong mga siyudad, aron sila maminaw, makakat-on, ug mahadlok kang Jehova nga inyong Diyos ug motuman sa tanang pulong niini nga Balaod.” (Deut. 31:12) Klaro nga ang hinungdanong rason sa atong panagkatigom maoy aron ‘matudloan ni Jehova.’ (Isa. 54:13) Kini mohatag sab natog kahigayonan nga magkailhanay, maglig-onay, ug makadawat ug pagdasig.
MGA TIGOM SA KONGREGASYON
3 Kadtong nahimong mga tinun-an human sa Pentekostes 33 C.E. naghatag ug bug-os nga pagtagad sa gitudlo sa mga apostoles, ug “adlaw-adlaw silang atua sa templo uban ang usa ka katuyoan.” (Buh. 2:42, 46) Sa ulahi, dihang ang mga Kristohanon magtigom alang sa pagsimba, sila magbasa sa balaang mga sinulat, apil ang mga sulat sa mga apostoles ug sa ubang tinun-an. (1 Cor. 1:1, 2; Col. 4:16; 1 Tes. 1:1; Sant. 1:1) Mag-ampo sab ang kongregasyon. (Buh. 4:24-29; 20:36) Usahay, mag-asoy sila ug mga eksperyensiya sa mga misyonaryo. (Buh. 11:5-18; 14:27, 28) Maghisgot silag mga doktrina sa Bibliya ug katumanan sa mga tagna. Hisgotan sab nila ang instruksiyon bahin sa husto nga Kristohanong panggawi ug debosyon sa Diyos. Ang tanan gidasig nga magmakugihon sa pagsangyaw sa maayong balita.—Roma 10:9, 10; 1 Cor. 11:23-26; 15:58; Efe. 5:1-33.
Niining lisod nga kataposang mga adlaw, gikinahanglan nato ang pagdasig pinaagi sa regular nga pagtambong sa tigom
4 Gisunod sa mga Kristohanon karon ang mga tigom nga sama sa gihimo sa panahon sa mga apostoles. Atong gisunod ang tambag sa Hebreohanon 10:24, 25: “Hunahunaon nato ang usag usa . . . , nga dili pasagdan ang atong mga panagkatigom, sama sa nabatasan sa uban, apan dasigon ang usag usa, ilabina gyod samtang makita ninyo nga ang adlaw nagkaduol na.” Niining lisod nga kataposang mga adlaw, gikinahanglan nato ang dugang nga pagdasig pinaagi sa regular nga pagtambong sa tigom aron atong mahuptan ang lig-ong espirituwalidad ug integridad. (Roma 1:11, 12) Ingong mga Kristohanon, nagkinabuhi ta taliwala niining daotan kaayong kaliwatan. Atong gisalikway ang pagkadili-diyosnon ug kalibotanong mga tinguha. (Filip. 2:15, 16; Tito 2:12-14) Dili ba mas palabihon natong makig-uban sa katawhan ni Jehova? (Sal. 84:10) Ug dili ba mas mapuslanon ang pagtuon ug paghisgot sa Pulong sa Diyos? Matikdi ang lainlaing tigom nga gihikay alang sa atong kaayohan.
TIGOM SA SABADO O DOMINGGO
5 Ang unang bahin sa tigom sa Sabado o Dominggo maoy pakigpulong nga gibase sa Bibliya nga ilabinang gihimo para sa publiko, nga ang uban tingali kanila mitambong sa unang higayon. Ang pakigpulong publiko maoy importanteng bahin sa pagtagana sa espirituwal nga mga panginahanglan sa mga bag-ohan ug sa mga magmamantala sa kongregasyon.—Buh. 18:4; 19:9, 10.
6 Si Kristo Jesus, ang iyang mga apostoles, ug ang ilang mga kauban naghimog publikong mga panagkatigom nga sama sa gihimo karon sa mga kongregasyon sa katawhan ni Jehova. Sa walay duhaduha, si Jesus ang pinakamaayong mamumulong nga nabuhi sukad sa yuta. Ang iyang mga mamiminaw miingon: “Wala pa gyoy tawo nga nakasulti ug sama niini.” (Juan 7:46) Si Jesus nagsulti nga may awtoridad, nga nakapahingangha sa iyang mga mamiminaw. (Mat. 7:28, 29) Nakabenepisyo pag-ayo kadtong kinasingkasing nga midawat sa iyang mensahe. (Mat. 13:16, 17) Gisunod sa mga apostoles ang iyang panig-ingnan. Sa Buhat 2:14-36, atong mabasa ang puwersadong pakigpulong ni Pedro niadtong Pentekostes 33 C.E. Linibo ang nadasig sa pagpadapat sa ilang nadunggan. Sa ulahi, dunay pipila nga nahimong magtutuo human mamati sa pakigpulong ni Pablo sa Atenas.—Buh. 17:22-34.
7 Karon, minilyon sab ang nakabenepisyo sa pakigpulong publiko kada semana diha sa mga kongregasyon ingon man sa mga pakigpulong publiko diha sa mga asembliya ug kombensiyon. Pinaagi niini nga mga pakigpulong, matabangan ta nga kanunayng makasunod sa Kristohanong mga pagtulon-an ug aktibo sa pagbuhat sa buluhaton sa Gingharian. Pinaagi sa atong pag-imbitar sa mga interesado ug sa mga tawo diha sa teritoryo, daghan tag mahimo sa pagtudlo sa pangunang mga pagtulon-an sa Bibliya.
8 Lainlaing topiko ang hisgotan sa pakigpulong publiko. Hisgotan sa mga pakigpulong ang mga doktrina ug tagna sa Bibliya, Kasulatanhong mga prinsipyo ug tambag bahin sa pamilya ug kaminyoon, mga situwasyong giatubang sa mga batan-on, ug Kristohanong moralidad. Ang ubang pakigpulong maghisgot sa kahibulongang kalalangan ni Jehova. Ang uban sab nagpasiugda sa maayong ehemplo sa mga karakter sa Bibliya nga nagpakitag pagtuo, kaisog, ug integridad, nga naghatag ug leksiyon kanato karon.
9 Aron bug-os makabenepisyo sa mga pakigpulong publiko, importante nga mamati ta pag-ayo, pangitaon ang mga tekstong gihisgotan sa mamumulong, ug sundan kana samtang iyang basahon ug ipatin-aw. (Luc. 8:18) Dihang masabtan nato ang mga punto nga gihisgotan, mahimo tang determinado sa pagpangupot pag-ayo sa atong nakat-onan ug sa pagpadapat niana.—1 Tes. 5:21.
10 Kon dunay mga mamumulong, posible gyong dunay pakigpulong publiko ang kongregasyon kada semana. Sagad mahimo kini pinaagi sa pag-imbitar ug mamumulong gikan sa duol nga mga kongregasyon. Kon diyutay rag mamumulong, paningkamotan gihapon nga dunay mga pakigpulong kutob sa mahimo.
11 Ang ikaduhang bahin sa tigom sa Sabado o Dominggo maoy Pagtuon sa Bantayanang Torre, usa ka pangutanag tubag nga panaghisgot sa mga artikulo sa tun-anang edisyon sa Bantayanang Torre. Pinaagi sa Bantayanang Torre, gitagana ni Jehova kanato ang tukma sa panahong espirituwal nga pagkaon.
12 Ang tun-anang mga artikulo sagad maghisgot kon unsaon pagpadapat ang mga prinsipyo sa Bibliya sa adlaw-adlawng pagkinabuhi. Kini magpalig-on sa mga Kristohanon aron dili sila maimpluwensiyahan sa “espiritu sa kalibotan” ug sa hugawng panggawi. (1 Cor. 2:12) Pinaagi sa Bantayanang Torre matun-an nato ang nagakahayag nga mga doktrina ug tagna sa Bibliya, nga motabang natong tanan nga makasunod sa kamatuoran ug makapabilin sa dalan sa pagkamatarong. (Sal. 97:11; Prov. 4:18) Ang pagtambong ug pagpakigbahin sa Pagtuon sa Bantayanang Torre makatabang nato nga magmalipayon sa paglaom bahin sa matarong nga bag-ong kalibotan ni Jehova. (Roma 12:12; 2 Ped. 3:13) Ang Kristohanong panag-ubanay makatabang nato nga maugmad ang bunga sa espiritu ug magpalig-on sa atong tinguha nga magmadasigon sa pag-alagad kang Jehova. (Gal. 5:22, 23) Kita madasig nga molahutay sa mga pagsulay ug magtukod ug “maayong pundasyon para sa umaabot” aron kita “makapangupot pag-ayo sa tinuod nga kinabuhi.”—1 Tim. 6:19; 1 Ped. 1:6, 7.
13 Unsay atong himoon aron bug-os nga makabenepisyo niini nga kahikayan sa espirituwal nga pagpakaon? Kinahanglan nga abante nato kining tun-an, indibiduwal man o ingong pamilya, basahon ang gisitar nga mga teksto, ug mokomento sa kaugalingong mga pulong panahon sa tigom. Pinaagi niini, motuhop sa atong kasingkasing ang kamatuoran ug makabenepisyo ang uban samtang atong ipahayag ang atong pagtuo. Pinaagi sa pagpaminaw pag-ayo sa komento sa uban, makabenepisyo ta sa mga artikulo nga hisgotan kada semana.
TIGOM SA MIDWEEK
14 Kada semana, ang kongregasyon magtigom sa Kingdom Hall alang sa programa nga nag-ulohang Atong Kristohanong Kinabuhi ug Ministeryo. Kini nga tigom dunay tulo ka bahin nga gihimo aron tabangan ta nga mahimong “kuwalipikado” ingong mga ministro sa Diyos. (2 Cor. 3:5, 6) Ang eskedyul ug hisgotang materyal makita diha sa Atong Kristohanong Kinabuhi ug Ministeryo—Workbook sa Tigom para sa matag bulan. Ang Workbook sa Tigom nga Kinabuhi ug Ministeryo duna poy mga sampol nga pagpakig-estorya para sa ministeryo.
15 Ang unang bahin niini nga tigom, nga gitawag ug Bahandi Gikan sa Pulong sa Diyos, motabang nato nga mahimong pamilyar sa background ug konteksto sa mga asoy sa Bibliya ug kon unsaon kini pagpadapat. Kini nga bahin dunay pakigpulong, pagbasa sa Bibliya, ug panaghisgot nga gibase sa senemanang pagbasa sa Bibliya. Ang Workbook sa Tigom nga Kinabuhi ug Ministeryo dunay mga visual aid ug worksheet nga makatabang sa pagtudlo niini nga mga asoy. Kining paagiha sa pagtuon sa Bibliya makatabang sa atong pagkinabuhi ug pagpanudlo, aron kita “dunay igong katakos, andam gayod sa matag maayong buhat.”—2 Tim. 3:16, 17.
16 Ang ikaduhang bahin sa tigom, ang Magmaepektibo sa Ministeryo, gihimo aron hatagan ang tanan ug kahigayonan nga mabansay para sa ministeryo ug mapauswag ang ilang katakos sa pagsangyaw ug pagpanudlo. Gawas sa mga asaynment sa mga estudyante, hisgotan sab ang mga video para sa mga sampol nga pagpakig-estorya. Kini nga bahin sa tigom motabang nato nga mabatonan ang “dila sa mga tinudloan” aron kita ‘mahibalo kon unsaon pagtubag sa gikapoy pinaagig hustong pulong.’—Isa. 50:4.
17 Ang ikatulong bahin, ang Kristohanong Pagkinabuhi, maghisgot sa praktikal nga kapadapatan sa mga prinsipyo sa Bibliya sa adlaw-adlawng pagkinabuhi. (Sal. 119:105) Ang pangunang bahin niini nga seksiyon sa tigom mao ang Pagtuon sa Kongregasyon sa Bibliya. Sama sa Pagtuon sa Bantayanang Torre, ang Pagtuon sa Kongregasyon sa Bibliya maoy pangutanag tubag nga panaghisgot.
18 Kada bulan, dihang madawat ang bag-ong Workbook sa Tigom nga Kinabuhi ug Ministeryo, ang koordinetor sa mga ansiyano, o ang ansiyano nga nagtabang niya, magsusi pag-ayo niini ug mag-asayn kon kinsay mohatag sa mga bahin. Kada semana, usa ka ansiyano nga dunay katakos sa pagpanudlo ug aprobado sa mga ansiyano ang magdumala ingong tsirman sa tigom. Apil sa iyang responsibilidad ang pagseguro nga ang tigom magsugod ug matapos sumala sa gitakdang oras ug ang paghatag ug komendasyon ug tambag sa mga estudyante nga naghatag ug bahin.
19 Samtang regular tang mangandam, motambong, ug makigbahin sa Tigom nga Kinabuhi ug Ministeryo, madugangan ang atong kahibalo sa Kasulatan, pagsabot sa mga prinsipyo sa Bibliya, kaisog sa pagsangyaw sa maayong balita, ug ang atong katakos sa paghimog mga tinun-an. Kadtong motambong nga dili pa bawtismado makabenepisyo sab sa malipayong panag-ubanay ug makapalig-on sa espirituwal nga panaghisgot. Aron matabangan ta sa pagpangandam niini nga tigom ug sa uban pang tigom, puwede natong gamiton ang Watchtower Library, JW Library®, Watchtower ONLINE NGA LIBRARYA™ (kon naa sa imong pinulongan), ug ang librarya sa Kingdom Hall. Ang librarya sa Kingdom Hall dunay mga publikasyon sa mga Saksi ni Jehova, Watch Tower Publications Index o Giya sa Pagpanukiduki Para sa mga Saksi ni Jehova, apil ang ubay-ubayng hubad sa Bibliya, concordance, diksiyonaryo, ug ubang mapuslanong reperensiya. Kini nga librarya mahimong gamiton sa tanan sa dili pa o human sa mga tigom.
TIGOM PARA SA PAGSANGYAW
20 Sa lainlaing oras sa tibuok semana, apil sa Sabado ug Dominggo, ang mga grupo sa mga magmamantala magtigom kadiyot para sa pagsangyaw. Kini nga tigom kasagarang himoon sa balay, sa laing kombenyenteng lugar, o sa Kingdom Hall. Ang pagtigom sa ginagmayng grupo diha sa lainlaing dapit diha sa teritoryo makapasayon sa mga magmamantala sa pagtambong sa tigom para sa pagsangyaw ug sa pag-adto sa teritoryo. Ang mga magmamantala dali rang maorganisar ug dili malangan ang pag-adto sa teritoryo. Maatiman sab pag-ayo sa tigdumala sa grupo ang iyang mga sakop. Bisag dunay mga kaayohan ang pagtigom para sa pagsangyaw alang sa matag grupo, may mga kahimtang nga mag-usa ug tigom ang mga grupo. Pananglitan, kon diyutay ra ang mosangyaw sa ubang adlaw sa semana, tingali maayong mag-usa ug tigom ang mga grupo o tanang grupo diha sa Kingdom Hall o sa laing nahiangay nga lokasyon aron dunay kauban sa pagsangyaw ang mga magmamantala. Panahon sa holiday, ang kongregasyon puwede pod magtigom para sa pagsangyaw diha sa Kingdom Hall. Mahimo sab nga ang kongregasyon mag-usa ug tigom para sa pagsangyaw human sa Pagtuon sa Bantayanang Torre.
21 Kon magtigom ang matag grupo, ang tigdumala sa grupo maoy magdumala sa tigom para sa pagsangyaw. May panahong iasayn sa tigdumala sa grupo ang iyang asistant o laing kuwalipikadong brader sa pagdumala niana. Ang magdumala kinahanglang andam sa paghisgot ug mga butang nga praktikal ug mapuslanon sa ministeryo. Ang mga kahikayan sa ministeryo organisahon, ug usa sa mga igsoon diha sa grupo ang moampo. Human niini, moadto na dayon ang grupo sa teritoryo. Ang maong mga tigom singko hangtod siyete minutos lang, apan angayng mas mubo pa kon himoon human sa tigom sa kongregasyon. Kini angayng maghatag ug pagdasig, instruksiyon, ug giya para niadtong mosangyaw. Ang mga bag-ohan o kadtong nagkinahanglag tabang mahimong ipartner sa eksperyensiyadong mga magmamantala aron mabansay sila.
MGA KAHIKAYAN SA PANAGKATIGOM ALANG SA BAG-O O GAGMAY NGA KONGREGASYON
22 Samtang magkadaghan ang tinun-an, magkadaghan pod ang kongregasyon. Sagad, ang tigdumala sa sirkito maoy magpadala sa aplikasyon para sa bag-ong kongregasyon. Pero may mga kahimtang nga mas maayo nga ang gagmayng grupo makig-uban sa kinaduolang kongregasyon.
23 Usahay, naay gagmayng kongregasyon nga pulos lang sister. Niini nga kahimtang, ang sister nga maoy moampo sa kongregasyon o modumala sa tigom angayng magpandong sumala sa kahikayan nga naa sa Bibliya. (1 Cor. 11:3-16) Sagad, siya maglingkod lang nga mag-atubang sa grupo. Ang mga sister dili mohatag ug pakigpulong diha sa mga tigom. Hinuon, ilang basahon ang materyal nga gitagana sa organisasyon ug komentohan kini, o kaha, puwede nila kining konsiderahon pinaagig panaghisgot o pasundayag. Ang sangang buhatan mohangyo sa usa sa mga sister nga maoy makigkomunikar kanila ug moatiman sa mga tigom. Kon duna nay kuwalipikadong mga brader, sila nay moatiman niini nga mga responsibilidad.
SIRKITONG ASEMBLIYA
24 Kada tuig, dunay kahikayan nga ang mga kongregasyon nga sakop sa usa ka sirkito maghimog duha ka sirkitong asembliya nga tag-usa ka adlaw. Kini maoy malipayong mga okasyon diin ang mga nanambong dunay kahigayonan nga ‘mabuksan pag-ayo ang [ilang] kasingkasing’ alang sa Kristohanong panag-ubanay. (2 Cor. 6:11-13) Ang organisasyon ni Jehova dunay giandam nga mga tema base sa Bibliya ug lainlaing mga bahin aron mahisgotan ang espesipikong mga panginahanglan. Ang mga impormasyon ipresentar pinaagig mga pakigpulong, demonstrasyon, pasundayag sa mga kasinatian, pagpakigsulti sa kaugalingon, ug mga interbiyo. Ang maong tukma sa panahong instruksiyon makapalig-on sa tanang nanambong. Niini nga mga asembliya, mahimong magpabawtismo ang bag-ong mga tinun-an ingong simbolo sa ilang dedikasyon kang Jehova.
REHIYONAL NGA KOMBENSIYON
25 Kausa matag tuig, dunay himoong dagkong panagkatigom. Sagad, kini maoy tulo ka adlaw nga rehiyonal nga kombensiyon nga tambongan sa mga kongregasyon gikan sa pipila ka sirkito. Ang gagmayng sangang buhatan tingali modesisyon nga mas praktikal kon ang tanang kongregasyon nga sakop niini magtigom sa usa ka lokasyon. Sa ubang lugar, tingali magkalahi ang mga kahikayan sa kombensiyon depende sa mga kahimtang o sa instruksiyon gikan sa organisasyon. Usahay, ang internasyonal o espesyal nga mga kombensiyon himoon diha sa pipila ka nasod ug tambongan sa linibo ka Saksi gikan sa lainlaing nasod. Latas sa katuigan, daghan ang nakakat-on sa maayong balita sa Gingharian tungod sa mga publisidad bahin niining dagkong panagkatigom sa mga Saksi ni Jehova.
26 Para sa mga alagad ni Jehova, ang mga kombensiyon maoy malipayong mga okasyon para sa hiniusang pagsimba. Makat-onan nato niini nga mga kombensiyon ang nagakahayag nga pagsabot sa kamatuoran. Sa pipila ka kombensiyon, i-release ang bag-ong mga publikasyon nga magamit sa personal nga pagtuon, pagtuon sa kongregasyon, o sa ministeryo. Apil sab sa programa sa kombensiyon ang pagbawtismo. Hinungdanon kaayo ang mga kombensiyon aron kita mouswag sa espirituwal. Pamatuod kini nga ang katawhan ni Jehova duna gyoy tibuok kalibotang panag-igsoonay sa dedikadong mga Kristohanon nga nagpakitag gugma sa usag usa, nga maoy ilhanan sa mga tinun-an ni Jesu-Kristo.—Juan 13:35.
27 Pinaagi sa pagtambong sa mga tigom sa kongregasyon ug sa mga asembliya ug kombensiyon sa katawhan ni Jehova, kita mapalig-on sa pagbuhat sa iyang kabubut-on. Kita sab mapanalipdan batok sa mga impluwensiya sa kalibotan nga makadaot sa atong Kristohanong pagtuo. Ang maong mga panagkatigom maghatag ug kahimayaan ug kadayeganan kang Jehova. (Sal. 35:18; Prov. 14:28) Kita mapasalamaton nga si Jehova nagtagana niining makapatagbaw sa espirituwal nga mga okasyon para sa iyang mga alagad niining panahon sa kataposan.
ANG PANIHAPON SA GINOO
28 Kada tuig, sa anibersaryo sa kamatayon ni Jesu-Kristo, ang mga kongregasyon sa mga Saksi ni Jehova sa tibuok kalibotan magsaulog sa Memoryal sa kamatayon sa Kristo, o ang Panihapon sa Ginoo. (1 Cor. 11:20, 23, 24) Kini ang pinakaimportanteng tigom sa katawhan ni Jehova kada tuig. Kita espesipikong gisugo nga saulogon ang Memoryal.—Luc. 22:19.
29 Ang petsa sa Memoryal pareho ra sa petsa sa Paskuwa, sumala sa gipakita sa Bibliya. (Ex. 12:2, 6; Mat. 26:17, 20, 26) Ang Paskuwa mao ang tinuig nga paghandom sa paggula sa mga Israelinhon gikan sa Ehipto niadtong 1513 B.C.E. Niadtong panahona, gitakda ni Jehova ang ika-14 nga adlaw sa ilang unang lunar nga bulan ingong petsa sa ilang pagkaon sa kordero sa Paskuwa ug paggula gikan sa ilang pagkabihag sa Ehipto. (Ex. 12:1-51) Ang petsa matino pinaagi sa pag-ihap ug 13 ka adlaw gikan sa bag-ong bulan, o new moon, nga pinakaduol sa spring equinox sumala sa makita didto sa Jerusalem. Kasagaran, ang pagsaulog sa Memoryal matunong sa unang takdol, o full moon, human sa spring equinox.
30 Gihisgotan mismo ni Jesus sa Mateo 26:26-28 kon unsaon pagsaulog ang Memoryal. Kini dili usa ka rituwal nga may misteryosong mga kahulogan kondili usa ka simbolikong panihapon nga salohan niadtong mga dinihogan nga mahimong kaubang mga manununod ni Jesu-Kristo sa iyang langitnong Gingharian. (Luc. 22:28-30) Ang tanang ubang dedikadong Kristohanon ug mga interesado gidasig sa pagtambong sa Panihapon sa Ginoo aron mag-obserbar. Pinaagi sa ilang pagtambong, ilang gipakita nga ilang gipabilhan ang tagana ni Jehova nga Diyos alang sa kaayohan sa tanang tawo pinaagi sa iyang Anak, si Jesu-Kristo. Sa dili pa ang Memoryal, dunay espesyal nga pakigpulong nga giandam aron mahinam ang tanan sa pagtambong niini nga okasyon ug aron dasigon ang uban sa pagtuon sa Bibliya.
31 Ang mga Saksi ni Jehova naghinamhinam sa mga okasyon nga magkauban sa panagkatigom, diin atong ‘gihunahuna ang usag usa aron magdinasigay sa pagpakitag gugma ug sa paghimog maayong mga buhat.’ (Heb. 10:24) Ang matinumanon ug maalamong ulipon alisto sa pagtagana niana nga mga panagkatigom sumala sa atong espirituwal nga panginahanglan. Ang tanang alagad ni Jehova apil ang mga interesado giawhag nga pahimuslan sa bug-os ang mga kahikayan para sa regular nga mga panagkatigom. Kay ang mga alagad sa Diyos kinasingkasing nga nagpabili sa mga tagana ni Jehova pinaagi sa iyang organisasyon, sila nagkahiusa. Labaw sa tanan, atong gidayeg ug gihimaya si Jehova.—Sal. 111:1.