Gamitang Tracts sa Pagpaila sa Librong Labing Bantogang Tawo
1 Sa bulan sa Hulyo, daghang magmamantala magagamit sa tracts sa pagpukaw sa interes diha sa librong Ang Labing Bantogang Tawo nga Nabuhi Sukad. Ang mosunod nga mga sugyot makatabang sa pagbuhat niini.
2 Kini Bang Kalibotana Molungtad? Ang tracts makabulig sa pagsikop sa atensiyon sa mga tagbalay tungod kay ang tracts nagahisgot sa mga ulohan nga makaapektar kanila sa personal.
Pananglitan, makaingon ka nga susama niini:
◼ “Sa pagpakigsulti sa mga tawo, among namatikdan nga daghan ang naghisgot sa ilang kabalaka sa . . . [pagpili ug bag-ong hitabo diha sa mga balita]. Tungod sa mga kahimtang sa kalibotan, ang pipila nahibulong kon kini bang kalibotana molungtad. Unsay imong pagbati bahin niana? [Tugoting motubag ang tagbalay.] Nakabasa ko ug makapadasig nga butang niini nga tract nga buot kong ipaambit kanimo. [Itunol sa tagbalay ang tract nga Kini Bang Kalibotana Molungtad? samtang nagagunit ka usab sa samang tract.] Matikdi kon sa unsang paagi si Jesus nagtagna nga . . . ” Pagbasa gikan sa usa ka parapo sa panid 4 o 5 nga nagahisgot sa bag-ong panghitabo nga gihisgotan sa imong pasiuna. Unya paklia ang dugang impormasyon sa tagna ni Jesus sa kapitulo 111 sa librong Labing Bantogang Tawo. Una mobiya, paneguroang makapatunghag pangutana sa usa ka ulohan alang sa panaghisgot sa dihang ikaw mobalik.
3 Kinabuhi sa Malinawong Bag-ong Kalibotan: Unsay kahulogan sa pagpuyo diha sa usa ka malinawong bag-ong kalibotan nganha kanimo? Sa linangkob, ang mga tawo magahunahunag matahom nga mga talan-awon sa dagkong mga suba ug malinawong mga walog, uban sa matahom nga mga mananap nga nagpuyong malinawon sa usag usa. Kadtong nasamok sa presenteng mga kahimtang sa kalibotan makakaplag nga makapahayahay kaayo ang palaaboton sa usa ka malinawong bag-ong kalibotan.
4 Andam ka ba sa pagtanyag ug usa ka butang makaparepresko ug makapahimuot sa imong mga silingan, imong isigkatrabahante, ug silang ikahibalag mo sa balaybalay?
Sa paggamit sa tract nga “Kinabuhi sa Malinawong Bag-ong Kalibotan,” makaingon ka ug susama niini:
◼ “Gihunahuna ba nimong posible gayod alang sa katawhan nga magpuyo sa kalinaw ingon sa gipakita sa atubangan niini nga tract? [Tugoting motubag ang tagbalay.] Palihog tan-awa ang kataposang tudling diha sa unang parapo sa panid 2. Kini nagasukna: ‘Apan damgo ba lamang, o handurawan, ang pagtuo nga kining mga kahimtanga may panahong molungtad sa yuta?’ [Unya basaha ang sunod nga parapo diha sa tract.] Kanang maong pagkutlo bahin sa bag-ong mga langit ug usa ka bag-ong yuta maoy gikan sa Bibliya, sa 2 Pedro 3:13. Kon kombeniyente alang kanimo sa pagkuha sa imong Bibliya, mabasa nato ang Salmo 104:5 sa pagkat-on ug dugang pa bahin sa kaugmaon sa yuta.” Kon ang tawo magapakitag interes, pakliang kapitulo 133, sa librong Labing Bantogang Tawo.
5 Ang dugang mga balikduaw kinahanglang himoon aron ‘pagbisibis’ sa binhi nga gikatisok. (1 Cor. 3:6, 7) Ang artikulo sa ubos nagasugyot kon sa unsang paagi ang pagtuon masugdan diha sa librong Labing Bantogang Tawo.