Gamita ang mga Tract Aron Ipakaylap ang Maayong Balita
1. Sa unsang paagi ang mga tract gigamit sa katawhan sa Diyos?
1 Ang mga tract sa Bibliya dugay nang gigamit sa katawhan ni Jehova aron ipakaylap ang maayong balita. Sa 1880, si C. T. Russell ug iyang mga kauban misugod sa paggamag Bible Students’ Tracts, ug kini gihatag ngadto sa mga magbabasa sa Watch Tower aron ipanagtag sa publiko. Ang mga tract giisip nga hinungdanon kaayo nga niadtong 1884 dihang giparehistro ni C. T. Russell ang dili-panaping legal nga korporasyon nga may katuyoan sa pagpauswag sa intereses sa Gingharian, ang pulong “tract” gilakip sa ngalan niana, Zion’s Watch Tower Tract Society, nga karon gitawag ug Watch Tower Bible and Tract Society of Pennsylvania. Pagka-1918, kapig 300 ka milyong tract ang napanagtag na sa mga Estudyante sa Bibliya. Ang mga tract epektibo gihapong kahimanan sa pagsangyaw.
2. Nganong epektibo ang mga tract?
2 Kon Nganong Epektibo: Mabulokon ug madanihon ang mga tract. Ang mubong mensahe niini makapaikag ug matulon-anon. Maangayan kini sa mga tagbalay nga hagoan sa pagbasag magasin o libro. Sayon ang pagtanyag ug mga tract, bisag para sa bag-ong mga magmamantala ug mga bata. Dugang pa, ang mga tract gagmay ug dali rang dad-on.
3. Iasoy ang usa ka personal o napatik nga kasinatian nga nagpakita nga bililhon ang mga tract.
3 Daghan ang unang nakakat-on bahin sa kamatuoran pinaagig usa ka tract. Pananglitan, nakita sa usa ka babaye sa Haiti ang usa sa atong mga tract diha sa dalan. Iyang gipunit kadto, gibasa, ug mipatugbaw, “Nakaplagan ko ang kamatuoran!” Ngadtongadto, siya miadto sa Kingdom Hall, misugod pagtuon sa Bibliya, ug nabawtismohan—kanang tanan tungod sa gahom sa Pulong sa Diyos diha sa usa ka tract.
4. Unsay atong tumong dihang ang tanyag sa bulan maoy mga tract?
4 Sa Balaybalay: Sanglit ang mga tract maoy epektibong kahimanan sa pagsangyaw, kana himoong tanyag sa bulan matag karon ug unya, sugod sa Nobyembre. Ang atong tumong mao nga gamiton kana sa pagsugod sa kabildohay, dili lang basta ihatag kini sa tagbalay. Kon ang tagbalay magpakitag interes sa unang pagduaw o sa pagbalikduaw, ikapasundayag nato ang pagtuon sa Bibliya ginamit ang librong Gitudlo sa Bibliya o laing publikasyon para sa pagtuon. Sa unsang paagi atong ikatanyag ang mga tract sa balaybalay? Ang matag tract maoy lahi, busa kinahanglang sinati kita sa mga tract nga atong ginatanyag.
5. Sa unsang paagi mahimong itanyag nato ang mga tract sa balaybalay?
5 Ang atong presentasyon angayng ipahaom sa teritoryo ug sa tract nga atong itanyag. Masugdan nato ang kabildohay pinaagi sa pagtunol sa tract ngadto sa tagbalay. Ang nindot nga hapin basin makapukaw sa iyang interes. O ikapakita nato ang ubay-ubayng tract ug papilion ang tagbalay sa tract nga makapainteres niya. Kon magsangyaw sa teritoryo diin ang mga tawo magpanuko sa pag-abli sa pultahan, kupti ang tract sa paagi nga makita sa tagbalay ang hapin niini, o mananghid nga duna tay ipalusot sa pultahan ug nga buot natong kuhaon ang iyang opinyon bahin niana. Kon ang ulohan sa tract maoy pangutana, mahimo nato siyang pangayoan sa iyang opinyon. O kaha makapatungha kitag pangutana nga makapukaw sa interes ug niana magpadayon ang kabildohay. Unya makabasa kitag usa ka bahin sa tract uban sa tagbalay, nga mohunong kadiyot sa mga pangutana ug pakomentohon ang tagbalay. Mahimong basahon ang pangunang mga teksto diha mismo sa Bibliya. Human hisgoti ang pipila ka impormasyon, mahimo natong taposon ang panaghisgot ug makigsabot kon kanus-a puwedeng mobalik. Kon ang kongregasyon sagad magbilig literatura sa mga balay nga walay tawo, mahimong binlan nato kanag usa ka tract ug ibutang kana sa dapit nga dili daling makita sa uban.
6. Sa unsang paagi ang mga tract magamit sa pagsangyaw sa kadalanan?
6 Pagsangyaw sa Kadalanan: Nakagamit ka na bag mga tract sa pagsangyaw sa kadalanan? Ang pipila ka lumalabay nagdali ug lagmit dili mohunong aron makigsulti kanato. Lisod matino kon interesado ba gyod sila. Inay hatagan silag bag-ong mga magasin nga basig dili nila basahon, di ba mas maayong hatagan silag tract? Kay ang tract nindot ug hapin ug ang mensahe niini mubo, ang mga tawo basin mainteres mobasa niana kon may panahon sila. Hinuon, kon wala sila magdali, ikasaysay nato kanila ang pipila ka impormasyon sa tract.
7. Pag-asoy ug mga kasinatian nga nagpakita kon unsaon paggamit ang mga tract sa di-pormal nga pagsangyaw.
7 Di-pormal nga Pagsangyaw: Sayon ang paghimog di-pormal nga pagsangyaw ginamit ang mga tract. Usa ka brader magbutang ug pipila ka tract sa iyang bulsa inigbiya niya sa iyang balay. Kon duna siyay mahibalag, sama sa usa ka tindero, tanyagan niya siyag tract. Dihang usa ka magtiayon nangadto sa New York City aron manuroy, nahibalo sila nga makahibalag silag mga tawo gikan sa lainlaing nasod. Busa gidala nila ang pulyetong Nations ug ubay-ubayng tract sa lainlaing pinulongan. Unya, sa dihang may nadunggan silang nagsultig langyawng pinulongan nga naninda sa aseras o naglingkod duol nila diha sa parke o sa restawran, ilang gitanyagan siyag tract sa iyang kaugalingong pinulongan.
8. Sa unsang paagi ang mga tract samag binhi?
8 “Ipugas ang Imong Binhi”: Ang mga tract samag binhi. Daghang binhi ang isabwag sa mag-uuma kay wala siya mahibalo kon hain niana ang moturok ug mogitib. Ang Ecclesiastes 11:6 nag-ingon: “Sa buntag ipugas ang imong binhi ug hangtod sa gabii ayaw papahulaya ang imong kamot; kay ikaw wala masayod kon diin kini magmalamposon, dinhi man o didto, o kon silang duha sama nga mahimong maayo.” Busa, hinaot nga kita ‘magpadayon sa pagsabwag ug kahibalo’ pinaagi niining epektibo kaayong kahimanan sa pagsangyaw.—Prov. 15:7.
[Blurb sa panid 3]
Sanglit ang mga tract maoy epektibong kahimanan sa pagsangyaw, kana himoong tanyag sa bulan matag karon ug unya, sugod sa Nobyembre