Kon Nganong ang Tracts Bililhon Kaayo sa Atong Ministeryo Karon
1 Sa Enero 1, 1991, nga gula sa Ang Bantayanang Torre, panid 30, may usa ka kasinatiang nag-ulohag “Nakakaplag Siyag Usa ka Pulyeto sa Riles.” Kini nag-asoy bahin sa usa ka superbisor sa riles nga nakakaplag ug usa sa atong mga tracts nga nasuksok diha sa riles. Gibasa dayon niya ang tract ug unya miingon sa iyang umagad-nga-lalaki: “Karong adlawa ako nakakaplag sa kamatuoran!” Ang duha ka lalaki miorder ug dugang basahon ug nagtuon niana. Karon, kapin sa usa ka gatos sa ilang mga kaliwat maoy aktibo sa kamatuoran.
2 Pagpahimulos sa mga Kahigayonan: Usa ka batan-ong Saksi nakamatikod nga ang iyang magtutudlo naguol tungod sa kamatayon sa iyang ugangang-babaye. Ang batan-ong sister misulat sa iyang magtutudlo ug usa ka mahupayong sulat ug misukip sa tract nga Unsay Paglaom Alang sa Namatay nga mga Minahal? Ang magtutudlo mihimog usa ka sulat-pasalamat ug unya nakigsulti sa atong batan-ong sister. Karon kining maong magtutudlo makanunayon nang nagadawat ug mga magasin gikan kaniya.
3 Ang pipila ka magmamantala nga nagsangyaw diha sa dalan paingon sa usa ka sementeryo nakakitag mga tawong nanghinlo sa mga lubnganan. Ang mga magmamantala nagtanyag kanilag mga tracts. Ang sunod nga adlaw maoy piyesta-opisyal diin daghang tawo ang moduaw sa sementeryo, busa ang mga magmamantala nagbarog diha sa agianan sa sementeryo ug nagtanyag ug mga tracts. Kapin sa lima ka gatos ka tracts ang nahatag. Sa sunod tuig, ang mga magmamantala mibalik ug nakaapod-apod ug kapin sa usa ka libong tracts. Ang usa ka tawo mibasa sa tract una pa mobiya ug miingon sa magmamantala: “Adunay usa nga buot kong pabasahon niining maong mensahe. Makabaton ba akog lain pang kopya?”
4 Sa dihang may impormal nga mga panaghisgot sa uban, mga dumuloong man o mga kaila, kinahanglang paningkamotan nato nga makahimog mubong pahayag nga motultol ngadto sa panaghisgot sa usa sa walo ka tracts nga ato karong mabatonan. Kini mahimo samtang nagapakigsulti sa mga silingan, samtang nagapamalit o nagahulat sa usa nga gikasabot, o samtang nagaduaw sa mga paryente.
5 Kon Nganong Epektibo: Ang tracts maoy mabulokon ug laktod. Ang mga tagbalay dili mobating masobrahan, o maobligar sa pagbasag daghan. Bisan pa niana, ang mensahe maoy matulon-anon kaayo. Ang magbabasa makakuhag solidong Kasulatanhong pagpanglantaw sa ulohan diha sa tract. Human sa pagdawat sa tract nga Kinabuhi sa Malinawong Bag-ong Kalibotan, ang usa ka batan-ong lalaki mituwaw: “Wala pa gayod sukad ako makabasa ug ingon ka makapadasig nga impormasyon bahin sa situwasyon sa kalibotan!”
6 Daghang magmamantala nakakaplag sa tracts nga mapuslanon sa pagsugod ug mga panaghisgot diha sa balaybalay nga buluhaton. Daghang pagtuon karon nga ginadumala nasugdan uban sa usa ka tract. Sa panid 4 niining gulaa sa Atong Ministeryo sa Gingharian, adunay pipila ka sugyot kon sa unsang paagi epektibong magamit ang tracts. Oo, ang tracts gagmay ra apan bililhong mga galamiton alang sa atong ministeryo.