Gamita ang mga Tract sa Pagsugod ug mga Panaghisgot
1 Dili ka ba mouyon nga ang paghatag ug usa ka epektibong pamatuod nagdepende pag-ayo sa imong paghimog unang tikang sa pagsugod ug mga panaghisgot? Ang hagit mao ang pagsulti ug usa ka butang nga makabihag sa interes sa tawo ug magpalangkit kaniya. Apan sa unsang paagi mahimo kini sa epektibong paagi?
2 Daghang magmamantala nakakaplag nga uban sa pipila ka maayong-pagkapili nga mga pulong, ang pagtanyag sa usa sa atong gibase-sa-Bibliya nga mga tract magpasugod ug mga panaghisgot. Ang mga ulohan mabihagon, ug ang mga ilustrasyon mabulokon ug madanihon. Ang tract dili magpig-ot sa tawo, nga magahatag ug impresyon nga adunay daghang impormasyon nga pagabasahon. Sa gihapon, ang mugbong mga mensahe diha sa mga tract maoy matuhopon ug magamit sa pagtultol ngadto sa usa ka pagtuon sa Bibliya.
3 Mao kini ang personal nga gibati sa usa ka Saksing babaye: “Niining puliking kalibotan, ang mga tawo sagad dili buot nga mogugol ug daghang panahon sa pagbasa, apan ang mga tract igo lang nga gitas-on sa paghatag ug hinungdanong mensahe apan dili kaayo taas nga isalikway sa mga tawo una pa sila mosusi niana. Akong gibasa ang daghan sa mga tract, ug ako sa ngadtongadto nakakat-on sa kamatuoran.” Ayaw gayod pakamenosa ang gahom sa Pulong sa Diyos ingon sa gisaysay niining mugbo, pinatik nga mga mensahe.—Heb. 4:12.
4 Upat ka Sayon nga mga Tikang: Daghan ang nakapahimulos sa kalamposan pinaagi sa paggamit ug yanong paagi. (1) Ipakita sa tawo ang pipila sa mga tract ug pangutan-a siya kon asa ang makapainteres kaniya. (2) Human ang tawo makapilig usa, isukna ang usa ka naandam-pag-ayong pangutana nga nagpasiugda sa pangunang punto diha sa tract. (3) Sa pagtubag sa pangutana, basaha ang haom nga parapo o kasulatan gikan sa tract. (4) Kon ikaw makakuhag maayong pagsanong, ipadayon ang paghisgot sa mga kaundan sa tract o dad-a ngadto sa leksiyon diha sa brosyur nga Gikinahanglan o sa kapitulo diha sa librong Kahibalo nga magtaganag dugang mga komento. Niining paagiha ikaw tingali makahimo sa pagtultol ngadto mismo sa usa ka pagtuon sa Bibliya. Ang mosunod nga mga sugyot motabang kanimo sa pag-andam kon unsay isulti ginamit ang upat ka tract.
5 Ang ulohan sa tract nga “Kinsa Gayod ang Nagamando sa Kalibotan?” mahimong isukna ingong pangutana. Kon sa pagtubag niana ang tawo nga imong gikahinabi moingon nga “Diyos” o “Wala ako mahibalo,” basaha ang pangbukas nga duha ka tudlingpulong sa panid 2 ug ang unang parapo sa panid 3. Ipasiugda ang 1 Juan 5:19 ug Pinadayag 12:9. Ang tawo magduda man o dili sa paglungtad ni Satanas nga Yawa o moila sa iyang impluwensiya diha sa kalibotan, ikaw makasumpay sa pagpangatarongan nga makaplagan ubos sa sub-ulohang “Ilhanan Gikan sa mga Kahimtang sa Kalibotan” sa pagpadayon sa panaghisgot. Kon gipakita ang interes, isaysay kon diin naggikan ang Yawa, nga ginamit ang mga puntos diha sa mga panid 3 ug 4 sa tract.
6 Ang tract nga “Unsay Paglaom Alang sa Namatay nga mga Minahal?” hayan makapukaw ug dihadihang interes. Ikaw makasugod ug panaghisgot pinaagig pagsukna:
◼ “Sa imong hunahuna makita pa kaha nato pag-usab ang atong namatay nga mga minahal?” Human ang tawo mosanong, ipunting ngadto sa ikaduhang parapo diha sa panid 4 sa tract ug basaha ang Juan 5:28, 29. Dayon isaysay nga makatabang kini sa pagsabot sa impormasyon ubos sa unang sub-ulohan sa tract. Isulti nga inyo kanang duyog nga hisgotan.
7 Ang “Magkalipay sa Kinabuhing Pamilyahanon” nga tract adunay tibuok-kalibotang kamadanihon alang sa mga pamilya. Sa paggamit niini, ikaw makaingon:
◼ “Ikaw lagmit mouyon nga ang pamilya ginaatake karong adlawa. Unsa sa imong hunahuna ang mahimo sa pagpalig-on sa mga bugkos sa pamilya?” Human ang tawo mosanong, tultoli ang iyang pagtagad ngadto sa mga puntos diha sa unang parapo sa panid 6. Gamita ang usa sa mga kasulatang gikutlo sa mga panid 4 ug 5 sa tract, ug isaysay kon unsay gipasabot niana. Dayon motanyag ug usa ka libreng pagtuon sa Bibliya sa balay.
8 Ang tract nga “Kon Nganong Ikaw Makasalig sa Bibliya” tingali magamit niini nga presentasyon:
◼ “Kadaghanang tawo nakadungog sa estorya bahin ni Cain ug Abel, nga makaplagan diha sa unang basahon sa Bibliya. Ang asoy sa Genesis naghisgot usab sa asawa ni Cain. Nahibulong ka ba sukad kon diin siya naggikan?” Gamita ang kataposang parapo sa panid 2 sa tract sa paghatag ug tubag. Isaysay nga ang tract naghisgot usab sa hinungdanong mga komento sa Bibliya bahin sa kon unsay anaa sa umaabot. Sugod sa ikatulong parapo sa panid 5, ipadayon ang panaghisgot, ginamit ang nagpaluyong mga kasulatan.
9 Ang pagpang-apod-apod ug mga tract sa Bibliya napamatud-an na sa dugayng panahon, nga epektibong paagi sa pagtanyag sa maayong balita. Tungod kay kini daling dad-on bisan asa ka moadto, ikaw makagamit niini nga epektibo diha sa imong pamalaybalay nga kalihokan ug sa dihang magsangyaw sa impormal nga paagi. Ang mga tract nagdula ug hinungdanong papel sa pagtuman sa atong ministeryo. Paneguro sa pagdala ug lainlaing matang, ug gamita kini kanunay sa pagsugod ug mga panaghisgot.—Col. 4:17.