Pagtanyag sa Maayong Balita—Pinaagig Epektibo nga Paggamit sa Tracts
1 Niadtong 1987 “Pagsalig Kang Jehova” Distritong Kombensiyon, upat ka bag-ong ‘tracts’ ang giluwatan. Gigamit ba nimo kining maong tracts sa epektibong paagi diha sa kanataran?
2 Daghang magmamantala nagabilin ug ‘tracts’ kon ang balay walay tawo. Ug ilang ihatag kini ngadto sa mga tawo nga puliki kaayo sa pagpaminaw kanila diha sa mga ganghaan. Nakaplagan sa uban nga kon sila mogamit ug usa ka ‘tract’ sa pagpaila sa ilang kaugalingon, kini makabulig sa paghaling sa interes sa tagbalay.
KANUS-A UG KON UNSAON PAGGAMIT NIINI
3 Pinaagig pagkaalisto sa mga kahigayonan, makaplagan mong daghang okasyon sa pagtanyag sa ‘tracts.’ Pananglitan, ang tracts makabulig man sa dihang mopamatuod ngadto sa mga paryente. Magamit mo kini sa panahon sa bakasyon, samtang nagasuroy-pamalit ug nagabiyahe, sa eskuwelahan, o sa imong dapit gitrabahoan. Gihuptan ba nimo ang ‘tracts’ nga sayon lang makuha, tingali sa imong bulsa, pitaka, o bag? Nganong dili mangita ug mga okasyon sa pagtanyag sa tracts?
4 Magamit mo ang ‘tracts’ sa paghatag ug mas epektibong pamatuod. Bisan tuod ang mensahe nga anaa niana maoy mubo, kini makapakombensir kaayo ug gisuportahan sa matin-aw Kasulatanhong mga pangatarongan. Matahom nga pagkadibuho ang ‘tracts’ ug dako ang malampos niini diha sa ministeryo.
DIHA SA PAG-ALAGAD SA KANATARAN
5 Ang ubang magmamantala nagapasiugda sa ulohan sa usa ka ‘tract’ dihadiha sa ilang pasiuna. Nganong dili sulayan kining paagiha sa imong kaugalingon? Ikaw makaingon: “Halo. Nalipay ko nga naabtan ka sa imong balay. Ako miboluntaryo sa pagpakig-ambit nga ihatod ang importante kaayong mensahe. Makaplagan kini niiini nga ‘tract’ nga Kinabuhi sa Malinawong Bag-ong Kalibotan. Kini ang imong kopya. Walay bayad kini. [Itunol ngadto sa tagbalay.] Dili ba gusto mo nga mopuyo sa maong malinawong palibot?” Dayon padayon sa Ulohan nga Mahisgotan, ug isumpay sa tanyag sa maong bulan.
6 Ang ‘tract’ nga Kon Nganong Ikaw Makasalig sa Bibliya mahimong epektibo kaayo diha sa inyong dapit. Pananglitan, ikaw makaingon: “Kami nagabilin ug libreng mensahe sa Bibliya uban sa among mga silingan karon. Ania ang imong kopya. [Itunol sa tagbalay.] Matikdi nga ang ulohan maoy bahin sa Bibliya. Sa hunahuna mo ang mga tawo kaha nawad-an na sa pagsalig sa Bibliya karong mga adlawa? [Patubaga.] Kini nga tract makabulig kanimo sa pagsabot kon nganong kita makasalig sa giingon sa Bibliya.” Padayon sa Ulohan nga Mahisgotan, nga nagapakita sa mga panalangin nga giandam sa Diyos alang sa yuta.
7 Ang pagpanagtag sa ‘tracts’ sa Bibliya maoy epektibong paagi sa pagmantala sa maayong balita. Kini may importanteng papel nga gidula diha sa atong ministeryo ug sa dihang nagasangyaw sa impormal nga paagi. Sa epektibo gamiton ta kini sa paghatag ug maayong pamatuod ug sa pagtabang sa uban nga makakat-on bahin sa Gingharian sa Diyos.