Paggamit sa Tracts sa Pagpatunghag Makaayong mga Resulta

¹ Ang modernong-adlaw nga organisasyon ni Jehova may usa ka kasaysayan sa malamposong paggamit sa tracts. Ang ngalan mismo sa atong legal nga korporasyon, nga Watch Tower Bible and Tract Society, nagapaila nga ang tracts nagadula ug usa ka mahinungdanong bahin sa pagsibya sa maayong balita. Sukad sa 1881 ngadto sa 1918, kapin sa 300 ka milyon nga tracts ang naapod-apod sa katawhan ni Jehova. Daghan kanilang nahimong bahin sa nanghibilin sa mga igsoon ni Kristo sulod niining yugtoa ang sa sinugdan napaila sa kamatuoran pinaagi niining unang mga tracts.

² Sa 1987 ang pagpasiugda pag-usab gihimo sa paggamit sa gagmayng tracts uban sa pagluwat sa upat nga mabulokon nga nabatonan sukad sa maong panahon. Gikapahibalo didto sa 1992 nga “Mga Tigdala sa Kahayag” Distritong Kombensiyon nga kining maong serye sa mga tracts padakoon pinaagig pagdugang ug upat ka mas mabulokon ug makapalihok-hunahuna nga tracts. Kini mao ang Kahupayan Alang sa Naluya, Magkalipay sa Kinabuhing Pamilyahanon, Kinsa ba Gayod ang Nagamando sa Kalibotan?, ug Molungtad ba Kining Kalibotana? Ginagamit mo ba kining tanang walo ka tracts sa pagpatunghag makaayong mga resulta sa imong ministeryo?

³ Ang maayong mga resulta magasumikad sa paggamit sa tracts nga epektibo. Kinahanglang masinati ang atong kaugalingon sa kada usa niana. Pananglitan, nahuman mo ba kana pagbasa nga maampingon aron mahuptan sa hunahuna ang gihisgotan sa kada usa? Nahunahuna mo ba kon unsang matanga sa tawo ang madani sa matag tract? Ang bug-os nga pagpasinati sa imong kaugalingon sa matag tract makatukod sa imong pagsalig sa paggamit niana sa balaybalay nga buluhaton maingon man sa daghang situwasyon nga makahatag ka ug impormal nga pagsangyaw.

⁴ Gamita sa Balaybalayng Ministeryo: Usa ka magtatan-aw sa sirkito misulat: “Nabatonan ko ang maayong kalamposan pinaagig pagsugod sa kadaghanan nakong panaghisgot uban sa tract.” Nasulayan ba nimo kining paagiha? Nganong dili gamiton ang tracts ingong paagi sa pagpaila sa imong panaghisgot? Uban sa walo ka tracts, kita karon may walo ka maawhagong mga pasiuna nga mapilian. Ang kada tract nagahatag kanatog kahigayonan sa pagsugod ug pagtuon sa Bibliya bisan diha sa unang duaw o sa balikduaw.

⁵ Adunay uban pang kahigayonan sa paggamit sa tracts. Sa panaghisgot diha sa pultahan, mahimong masayran mo nga ang tawo bag-o pang nawad-an sa usa ka minahal diha sa kamatayon o nga ang usa sa pamilya nagkasakit. Ang katawhan nga nakasinatig dakong kaguol o kinsa nagasulay sa pagbuntog sa padayong mga kalisdanan sagad makaugmad ug negatibong mga emosyon ug maluya. Pagkamahigugmaon ang pagpaambit sa makapadasig nga mensahe nga makaplagan diha sa tract nga Kahupayan Alang sa Naluya! Hayan nasayran mo nga ang tawo bag-o lang gidiborsiyohan o nawad-an sa iyang trabaho. Kanang mga kasinatiana makapahigwaos ug makapahinabog dakong kadaot diha sa pamilya. Gamitang mga pangutana sa panid 2 sa tract nga Magkalipay sa Kinabuhing Pamilyahanon: “Nganong ang mga pamilya karon ginaatake man nianang seryosong mga suliran? Sa unsang paagi kita magakalipay sa kinabuhing pamilyahanon?” Malagmit kini nga mga pangutanaha mismo ang pangunang anaa sa hunahuna sa maong tawo. Bisan pa kon ang dihadihang interes dili madayag, maoy posible nga sa ulahi iyang basahon ang tract.​—Eccl. 11:6.

⁶ Sa pipila ka kongregasyon ang teritoryo subsob nang nakobrehan, ug daghang tawo ang nakabaton na sa pipila sa atong basahon. Pinaagig paggamit sa tracts, mabatonan tang kahigayonan sa paghisgot sa usa ka butang nga makapainteres sa mga tagbalay, pasultihon sila, ug pahunahunaon sila mahitungod sa paglaom sa Gingharian. Itisok ang usa ka pangutana sa ilang mga hunahuna nga mahisgotan sa ulahing panahon. Himoa ang usa ka balikduaw, ug ugmara pag dugang kining maong interes. Sa ngadtongadto mahimo ta ang pagsugod sa pagtuon uban kanila nga nagagamit sa usa ka brosyur o usa ka libro nga ila nang nabatonan.

⁷ Gamitang Tracts sa Impormal mga Paagi: Kon magdala ta ug tracts nga dali rang makuha​—diha sa atong bulsa, puyô, o bag nga igsasangyaw​—makagamit ta niana sa daghang nagakalainlaing okasyon, sa bisan diin makaplagan ang katawhan. Gamita kana sa dihang nagapamalit, nagabiyahe, o nakighinabi sa kaparyentehan o mga bisita. Ang tracts magahatag kanatog kahigayonan sa paghatag ug mubong pagpanaksi. Ang usa ka tract maoy butang nga dili magpiit sa usa ka tawo kondili malaktoron ug mataktikanhon. Kini mas daling ginadawat kay sa usa ka libro o mga magasin, sanglit dili man kaayo daghan ang pagabasahon.

⁸ Magmaalisto sa mga kahigayonan sa pagtanyag sa tracts sa impormal nga paagi diha sa tunghaan o sa imong dapit trabahoan, sa mga restawran, sa usa ka estasyon sa gasolina, ug uban pa. Sa dihang mihimog mga kahikayan sa pagdala sa iyang apohang babaye ngadto sa doktor, ang usa ka igsoong babaye nagseguro nga nakadala siyag tracts. Sa opisina sa doktor, siya misugod ug panaghisgot sa usa ka nagsabak nga inahan. Human ikapakita ang tract nga Kinabuhi sa Malinawong Bag-ong Kalibotan ngadto sa babaye, ang igsoong babaye misukna: “Buot ba nimong magpadako sa imong bata sa usa ka kalibotan nga sama niining gihulagway dinhi?” Siya nakahimo sa pagpaloap nianang maong panaghisgot pinaagig usa ka duaw sa balay sa babaye. Kini mitultol ngadto sa ubay-ubay regular nga mga balikduaw.

⁹ Mga Pagtuon sa Bibliya Mahimong Masugdan Pinaagig Tracts: Usa ka magtatan-aw sa sirkito nagtaho nga ang kongregasyon nga iyang giduaw nakasugod ug 64 ka pagtuon sa Bibliya sa balay sulod sa semana pinaagig paggamit sa tracts sa dihang unang nagatimbaya sa tagbalay.

¹⁰ Nasulayan mo na ba ang pagtanyag ug usa ka pagtuon sa Bibliya sa unang mga pagduaw sa pamalaybalay? Pinaagig paggamit ug tract, mahimong ikapasundayag mo sa mubo kon sa unsang paagi ang pagtuon pagadumalahon. Ang usa ka igsoong babaye naghimo niini nga naggamit sa tract nga Kinabuhi sa Malinawaong Bag-ong Kalibotan. Nga nagpunting sa hulagway, siya misukna sa tagbalay kon iya bang gihunahuna nga ang yuta mahisama ba gayod niana. Human nga misanong ang tagbalay, ang igsoong babaye nagdapit kaniya sa pagbasa sa 2 Pedro 3:13 ug Isaias 65:17, nga maoy gipatugbaw diha sa tract. Dayon miingon ang atong igsoong babaye: “Kining mga saara dili gayod usa ka damgo ni usa ka handurawan apan aktuwal gayong gihimo diha sa Pulong sa Diyos, ang Bibliya.” Unya iyang gihikay nga mapadayon ang panaghisgot sa mosunod nga semana. Sa sunod nga duaw, ang ubay-ubay nga mga pangutana sa babaye gitubag ug gibilin ang librong Ikaw Mabuhing Walay Kataposan sa Paraiso sa Yuta. Ang usa ka pagtuon sa Bibliya miresulta.

¹¹ Ikaw ba usa nga bag-o pang nabawtismohan o tingali usa ka di-bawtismadong magmamantala nga nagakuhag kasinatian sa imong ministeryo? Kon mao, buot nimong pangitaon kadtong kinsa mas eskperiyensiyado ug mangayo sa ilang mga sugyot bahin sa paggamit sa tracts diha sa teritoryo sa inyong kongregasyon. Aduna tay daghang panig-ingnan sa Bibliya niadtong nagdawat ug pagdasig ug pagtultol gikan sa mga hamtong sa pagtuo.​—Buh. 18:24-27; 1 Cor. 4:17.

¹² Ang tagdumala sa Pagtuon sa Libro sa Kongregasyon ilabinang makatabang sa paghimog mga kahikayan sa uban nga mohatag ug pagbulig kanimo sa paggamit sa tracts nga epektibo. Ang mga ginikanan dunay kaakohan sa pagtabang sa ilang mga anak nga mouswag diha sa buluhatong pagsangyaw. Usa ka batan-ong Saksi gibansay sa iyang mga ginikanan sa pagtanyag sa tract nga Kinabuhi sa Malinawong Bag-ong Kalibotan. Samtang uban sa iyang inahan sa usa ka pagtuon sa Bibliya, siya mitanyag ug tract sa bana sa interesadong babaye. Ang bana nasumeter nga ang usa ka batan-on nagbaton sa ingon niana ka kusganon relihiyosong mga panghunahuna. Nahimuot gayod siyang nagabasa sa tract. Sa matag higayon nga ang batan-ong batang babaye mobalik kauban sa iyang inahan, siya nagpaambit ug usa ka kasulatan o estorya sa Bibliya nga iyang giandam ilabina alang kaniya. Ang lalaki karon nagabasa na sa mga magasin nga makanunayon, nagpakitag interes sa librong Pinadayag Sangkoanan, ug nakatambong na sa pipila ka tigom. Kining tanan misangpot tungod kay ang mga ginikanan migahin ug panahon sa pag-atiman sa ilang mga kaakohan sa pagtudlo sa ilang anak nga babaye nga magagamit ug maayo sa tracts.

¹³ Gamitang Atong Bag-ong Tracts sa Epektibong Paagi: Sa paggamit sa tract nga Molungtad ba Kining Kalibotana?, imong ikapaila ang imong kaugalingon ug mosugod sa inyong panaghisgot pinaagig pag-ingon: “Maayong buntag. Kami nakigsulti sa katawhan bahin sa kalidad sa kinabuhi karon. Gihunahuna ba nimong ang kalidad sa kinabuhi moarang-arang, o magapadayon ba kini sa pag-us-os? [Tugoting motubag.] Ang pipila nagahunahunang ang nagakahitabo sa kalibotan karon maoy katumanan sa tagna sa Bibliya ug nga duol na ang kataposan sa kalibotan. Unsa may imong hunahuna?” Human nga mosanong ang tagbalay, itanyag ang tract ug dalhang pagtagad sa tulo ka pangutana diha sa ikaduhang parapo. Dayon sunda ang pagkatagik diha sa tract sa pagpakita kon sa unsang paagi ang usa ka kalibotan natapos kaniadto ug nga kini usab nga kalibotan karon matapos. Sa dihang taposon ang duaw, hikaya ang laing duaw nga magtagad sa ebidensiya sa Bibliya nga ang kataposan sa kalibotan haduol na.

¹⁴ Daghang higayon nga nakaplagan tang kaugalingon nga anaa sa posisyon nga makapaambit sa mensahe sa Gingharian ngadto sa uban sa makadiyot lamang, sama sa diha sa trabahoan o sa tunghaan. Diha sa imong dapit gitrabahoan, ang usa ka panaghisgot mahimong motungha bahin sa ulahing mga tipik sa balita maylabot sa kagamhanan. Ikaw makauyon nga bisan pa sa tanang paningkamot nga gihimo sa mga lider nga mahimong maayog tumong, ang kalibotan sa makalilisang nag-antos latas sa kasaysayan. Unya ipunting ngadto sa kataposang parapo sa panid 2 sa tract nga Kinsa ba Gayod ang Nagamando sa Kalibotan? Basaha ang tulo ka makapalihok-hunahunang pangutana. Kon wala nay panahon alang sa mubong panaghisgot, hatagi ang tawo ug tract ug himoang mga kahikayan sa paghisgot niining mga pangutanaha sa laing higayon o dapit.

¹⁵ Ingong mga indibiduwal ug mga pamilya, gahinig panahon ang pagtagad kon sa unsang paagi ikapresentar ang kada usa niining nagkalainlaing mga tracts. Himoang mga sesyon sa pagbansaybansay. Sa unsang paagi magamit mo ang tracts uban sa laing basahon nga ipaila diha sa ministeryo sa kanataran alang sa bulan? Unsa ang mga kasabotan nga imong pagaadtoan diin makadala ka ug pipila ka tracts? Makakontak ka ba ug usa ka tawo niining semanahona kinsa makabenepisyo gikan sa tukma-panahong mensahe nga gitanyag niining maong mga tracts?

¹⁶ Ang halalom nga gugma kang Jehova ug ang kabalaka sa katawhan magpalihok kanato sa pagbuhat sa atong maarangan sa pagpaila sa maayong balita. Ang pagagamit sa tracts nga makanunayon magabulig nato sa pagbuhat niana. Usa ka batan-ong batang lalaki, pito ka tuig ang edad, gustong motabang sa iyang sunod-pultahan nga silingan nga makasulod ngadto sa bag-ong sistema, busa iyang gihatagan siya ug usa ka tract, ug ang usa ka pagtuon sa Bibliya nasugdan. Maorag kini yano ra kaayo! Apan gipabilhan ba nato kining yano nga paagi sa atong ministeryo? Sa sunod nga higayon nga ibilin ta ang usa ka tract sa usa ka tawo, mahimong motultol usab kini sa usa ka pagtuon sa Bibliya. Kon gamiton tang maalamon ang tracts diha sa pagsangyaw sa maayong balita sa Gingharian, kita tino gayod nga makasinatig makaayong mga resulta.