Ang Pagtuon sa Libro sa Kongregasyon Nagapalambo sa Edukasyonal nga mga Kalihokan
1 Ang Pagtuon sa Libro sa Kongregasyon nagadula ug usa ka hinungdanong papel diha sa edukasyonal nga programa sa organisasyon ni Jehova. Ang mga grupo sa pagtuon sa libro nahimutang sa kombeniyenteng dapit. Sanglit kay ang pagtuon anaa sa ilang kaugalingong silinganan, makaplagan sa mga interesado nga mas sayon ang pagtambong.
2 Ang usa ka panlimbasog gihimo aron huptang gagmay ang matag grupo. Kini magatugot sa tagdumala sa paghatag ug personal nga pag-abag sa matag usa. Kon ang usa nalisdan sa pagsabot sa usa ka punto, ang tagdumala mahimong maghisgot niini ug dugang human sa pagtuon. Dugang pa, diha sa gamayng grupo, dugang ang makakomento ug makabasa sa mga kasulatan. Kanunay ka bang mokomento? Gisulayan ba nimo ang pagtubag diha sa imong kaugalingong mga pulong? Sa dihang ikaw mangandam, gamita ang imong mga gahom sa pag-ila aron pagtino kon sa unsang paagi imong maaplikar sa personal ang tinong mga puntos diha sa leksiyon.—Heb. 5:14.
3 Pinaagig pagpaniid sa mga paagi sa pagpanudlo nga gigamit sa tagdumala sa pagtuon, imong makat-onan kon unsaon pagdumalag mga pagtuon sa Bibliya diha sa mas matulon-anong paagi. Human nga mabasa ang mga parapo pinaagig takos nga igsoong lalaki, ang mga pangutana ginahisgotan. Ang tagdumala sa pagtuon magapaningkamot sa pagkuha sa mga komento diha sa mga kasulatan aron pagtabang kanato sa pagsabot kon sa unsang paagi kana mapadapat. (Itandi ang Nehemias 8:8.) Usahay siya magadugang ug usa ka mubong komento o mogamit ug nagaabag nga mga pangutana aron pagpalugwa sa usa ka yawing punto. Ang usa ka ilustrasyon makatabang kanato sa pagsabot kon sa unsang paagi ang leksiyon may kalabotan sa atong mga kinabuhi.
4 Ang tigtambongan sa pipila ka Pagtuon sa Libro sa Kongregasyon medyo ubos ra. Ikaw ba regular nga nagatambong? Ang kahikayan sa pagtuon sa libro maoy usa sa mga paagi nga si Jehova nagapasundayag sa iyang pag-atiman kanato. (1 Ped. 5:7) Buot niya nga kita mouswag sa kaalam aron nga kita magmalig-on sa espirituwal. Sa laing bahin, si Satanas buot nga magpahinay sa atong espirituwal nga pagtubo aron nga dili kaayo kita magmapuslanon kang Jehova ug sa Iyang organisasyon. Ayawg tugoti kini nga mahitabo! Pasagding ang mainiton, mahigugmaong atmospera niining suod nga grupo magatandog sa imong kasingkasing ug magatukmod kanimo sa pagpadayon sa pagdayeg kang Jehova.—Itandi ang Salmo 111:1.
5 Ang mga tigom sa dayon na nga pagsangyaw ginahikay diha sa kadaghanang mga dapit sa pagtuon sa libro. Ang tagdumala sa pagtuon sa libro magaseguro nga mabatonan ang igong teritoryo ug nga adunay magapanguna sa kanataran. Ang mga tigom sa dayon nang pagsangyaw angayng dili molapas sa 10-15 minutos. Ang tagdumala hayan sa mubo magatagad sa inadlaw nga teksto kon kini may kalabotan sa atong pagsangyaw nga kalihokan ug mohatag ug usa o duha ka sugyot maylabot sa pagsangyaw o mopresentar ug mubong pasundayag sa kinabag-ohang tanyag.
6 Ang tagdumala magapaningkamot sa pagkuyog sa matag usa diha sa iyang grupo, nga nagahatag ug pagdasig ug pagbansay.—Itandi ang Marcos 3:14; Lucas 8:1.