Kahikayan sa Pagtuon sa Libro sa Kongregasyon
Bahin 1—Kaakohan sa Konduktor sa Pagtuon
1 Ang Pagtuon sa Libro sa Kongregasyon nagadulag usa ka hinungdanong papel diha sa espirituwal nga kaugmaran sa katawhan ni Jehova. Sa mga bulang umaabot, atong susihon ang nagkalainlaing mga bahin niini nga kahikayan ug tagdon kon sa unsang paagi kita makabenepisyo. Niini nga isyu atong tagdon kon sa unsang paagi ang konduktor sa pagtuon makahimo sa pagtuon nga makapadasig ug makapalig-on sa pagtuo.
2 Aron mahimong epektibo sa pagtudlo, ang konduktor kinahanglang mangandam pag-ayo. Dili lamang kay nahibalo siya sa tubag sa matag pangutana kondili nakasabot usab kon nganong husto ang maong tubag. Siya kinahanglang maningkamot sa pagtabang sa tanan diha sa pagtuon nga mahibalo sa mga katarongan sa mga tubag. (1 Ped. 3:15) Kini mopalalom sa ilang pagpabili alang sa materyal.
MGA TUMONG SA PAGDUMALA SA PAGTUON
3 Usa ka tumong sa konduktor maoy paglig-on sa pagtuo sa tanang mitambong ug dasigon sila sa pagbuhat sa kabubut-on sa Diyos nga mas bug-os pa. (Sal. 110:3; 2 Tes. 1:3-5) Aron mahimo kini, siya angay mohunong sa nahiangay nga mga dapit aron ‘ipasiugda’ ang mga punto nga motukod ug pagsalig diha kang Jehova, sa iyang Pulong, ug sa iyang organisasyon. (Gal. 6:6) Ang mga pangutana mahimong gamiton aron ipalutaw kini nga mga detalye segon sa itugot sa panahon.
4 Ang laing tumong mao ang pagtabang sa tanan nga gamiton ang materyal sa mapuslanon nga paagi. Sa unsang paagi magamit nila kini diha sa ministeryo sa kanataran? Sa pagdasig sa mga igsoon ingon man sa mga bag-ohan? Sa pagpalig-on sa ilang pamilya? Samtang nangandam sa matag leksiyon ang mga konduktor sa pagtuon, angay nilang sabton ang praktikal nga kagamitan sa espisipikong mga punto diha sa pagtuon.
5 Ang tinong impormasyon mahimong magamit sa pagtabang sa di-magtutuong mga paryente, mga kaklase, o mga katrabaho. Ang ubang materyal hayan makatabang niadtong nabahin nga mga panimalay. Ang konduktor mahimong motabang kanila sa paghimog mapuslanong pagpadapat sa materyal. Angayng huptan niyang makaiikag ang pagtuon, dili lamang basta pagkobre sa pangutanag-tubag.—Itandi ang 1 Corinto 14:9, 19.
IPAKITA ANG PERSONAL NGA INTERES
6 Pinaagi sa pagpakitag personal nga interes sa matag usa, ang konduktor makadasig sa bug-os nga pagpakig-ambit. Ang mga maulawon mahimong itudlo nga abante sa pagbasa sa kasulatan, o gihatagag pangutana nga abante sa pag-andam alang sa tubag. Ang tanan angay maningkamot sa pagkomento sa ilang kaugalingong mga pulong. Pinaagi sa pagpamati pag-ayo sa mga komento, makita sa konduktor kon ang pipila nanginahanglag personal nga tabang.
7 Ang Pagtuon sa Libro sa Kongregasyon mohatag kanato sa kahigayonan nga magtigom sa gagmay nga mga grupo ug makadawat ug dugang personal nga pagtagad. Dili gayod nato kini lantawon nga dili kaayo hinungdanon kay sa ubang mga tigom. Ang inyong konduktor sa pagtuon nagagamit sa pagtuon sa pagpalig-on sa inyong pagtuo ug tukoron ang inyong pagpabili alang sa mga tagana sa Diyos.