Kahikayan sa Pagtuon sa Libro sa Kongregasyon
Bahin 5—Duaw sa Magtatan-aw sa Pag-alagad
1 Ang magtatan-aw sa pag-alagad kinahanglang usa ka ebanghelista ug usa ka magtutudlo. Dakong papel ang iyang ginadula sa pagtabang sa kongregasyon nga makatuman sa kaakohan niini sa pagsangyaw ug pagtudlo sa maayong balita diha sa natudlong teritoryo niini.—Mar. 13:10.
2 Ang magtatan-aw sa pag-alagad magpunting una sa pagdasig sa mas dakong kalihokan diha sa ministeryo sa kanataran. Kini malampos una pinaagig Pagtuon sa Libro sa Kongregasyon. Sa kasagaran, ang magtatan-aw sa pag-alagad gitudlo sa pagdumalag usa ka pagtuon sa libro, apan makausa sa matag bulan ang iyang asistant mopuli kaniya samtang siya moduaw ug laing grupo.—km 12/81 p. 1, 3.
3 Pangandam Alang sa Duaw: Sa dili pa ang semana niining duawa, ang magtatan-aw sa pag-alagad kinahanglang mosusi sa ‘Congregation’s Publisher Record cards’ alang niadtong nakig-uban sa grupo. Iya usab nga hikayon nga makigtagbo sa konduktor ug repasohon ang kalihokan sa mga magmamantala nga natudlo sa maong grupo. Pagapahinumdoman ang konduktor sa pagtuon nga 45 minutos lamang ang gitas-on sa maong pagtuon aron igahin ang 15 minutos alang sa pakigpulong sa pag-alagad sa magtatan-aw sa pag-alagad.
4 Kining pakigpulonga kinahanglang magpalambo ug mas dakong apresasyon alang sa ministeryo. Kon ang mga magmamantala nagakinahanglag bulig sa pipila ka bahin sa ministeryo, ang magtatan-aw sa pag-alagad mohatag gayod ug mapuslanong mga sugyot sa pagpauswag. Ang iyang mga pulong kinahanglang positibo ug makapalig-on aron dili mapakaulawan o maluya ang bisan kinsa tungod sa negatibong mga komento. Ang iyang pahayag kinahanglang mopadasig sa tanan sa pag-uswag.
5 Ang magtatan-aw sa pag-alagad manlimbasog nga daghan ang maubanan sa pagsangyaw kutob sa mahimo. Samtang nagasangyaw uban sa mga magmamantala sa pamalaybalay, siya makahatag man ug mabuligong mga sugyot sa mga paagi sa pagpauswag sa ilang mga presentasyon. Kini himoon gayod dili sa paaging masawayon kondili uban sa tim-os nga tinguha nga makatabang. Siya usab makatanyag nga mokuyog sa mga magmamantala sa mga balikduaw ug mga pagtuon sa Bibliya. Kon ang bisan kinsa diha sa grupo daw nagakinahanglag personal nga pagtabang, mahimong iyang duawon sila sulod sa maong semana aron buligan sila. Kining mainiton, personal nga pagtagad nahimo nang paagi sa pagpasibot ngadto sa pipila nga nagmaluya sa ilang pag-alagad sa kanataran.
6 Tigom sa Dayon na nga Pagsangyaw: Ang mga tigom sa dayon na nga pagsangyaw sa maong semana kinahanglang dumalahon sa magtatan-aw sa pag-alagad. Kinahanglang sugdan nila kana sa hustong panahon bisan pa kon pipila ra ang presente. Ang maong tigom kutob ra sa 10 ngadto sa 15 minutos. Sa dili pa molakaw ang grupo, ang tanan kinahanglang nahibalo kon asa padulong ug kon kinsa ang iyang kauban sa pagsangyaw. (1 Cor. 14:33, 40) Ang magtatan-aw sa pag-alagad kinahanglang magpalig-on sa tanan nga molakaw na nga walay langan alang sa pag-alagad sa kanataran.
7 Ang regular nga mga duaw sa magtatan-aw sa pag-alagad ngadto sa mga grupo sa pagtuon sa libro mahimong tinuod nga panalangin ngadto sa kongregasyon. Pinaagig pagduyogay sa matag usa kanato uban kaniya sa dihang siya moduaw, ang atong ministeryo mahimong mahapsay ug epektibo. Dugang pa, siya makabaton ug kalipay gikan niining buluhatona.—Heb. 13:17.