Kon sa Unsang Paagi ang mga Magtatan-aw sa Pagtuon sa Libro sa Kongregasyon Makapakitag Personal nga Interes
1 Ang Pagtuon sa Libro sa Kongregasyon gidisenyo aron “ang paghatag ug dugang personal nga atensiyon alang sa espirituwal nga tingusbawan sa matag indibiduwal mahimong posible. . . . Ania dinhi ang pagsumbaliksilaw sa mahigugmaong-kalulot ni Jehova ug sa iyang malumo nga pag-amoma sa iyang katawhan.” (om p. 75; Isa. 40:11) Ang magtatan-aw sa pagtuon sa libro adunay dakong bahin sa paghatag sa maong personal nga atensiyon.
2 Diha sa Pagtuon sa Libro: Tungod kay ang mga grupo sa pagtuon sa libro gituyo nga huptang gamay, ang magtatan-aw sa pagtuon sa libro makaarang sa pagsinati gayod sa mga sakop sa iyang grupo. (Prov. 27:23) Kasagarang adunay mga kahigayonan sa panag-ubanay sa dili pa o human sa pagtuon matag semana. Sulod sa usa ka bulan, mahimong nakaestorya na niya halos ang tanan diha sa grupo. Makatabang kini sa mga membro sa pagtuon sa libro nga mobating komportable sa pagduol kaniya sa dihang atubangon nila ang mga pagsulay o nagkinahanglag pagdasig.—Isa. 32:2.
3 Ang magtatan-aw sa pagtuon sa libro maningkamot sa pagdasig sa tanan diha sa grupo nga makig-ambit panahon sa pagtuon. Ang usa ka paagi nga iyang himoon kini maoy pinaagi sa pagdumala sa pagtuon sa maluloton ug malumo nga paagi. (1 Tes. 2:7, 8) Mangita siyag mga paagi aron makaapil ang tanan sa panaghisgot, lakip na ang mga batan-on. Kon ang uban medyo maulaw sa pagkomento, mahimong personal niyang tabangan sila pinaagi sa pag-andam daan kanila nga pabasahon ug teksto o pakomentohon sa usa ka tinong parapo. O mahimong ipakita niya kanila kon unsaon sa pagkomento sa kaugalingon nilang mga pulong.
4 Kon usa ka ministeryal nga alagad ang katabang sa magtatan-aw sa pagtuon sa libro, ang magtatan-aw maghikay alang kaniya sa pagdumala sa pagtuon kas-a sa matag duha ka bulan. Kini magtugot sa magtatan-aw nga maobserbahan ang katabang ug makahatag ug mapuslanong mga sugyot. Pagkamaayong kahikayan nga tabangan ang mga igsoon nga mouswag ang ilang arte sa pagpanudlo!—Tito 1:9.
5 Diha sa Ministeryo sa Kanataran: Usa sa pangunang kaakohan sa magtatan-aw sa pagtuon sa libro mao ang pagpanguna diha sa pagsangyaw. (Num. 27:16, 17) Mohimo siyag praktikal nga mga kahikayan alang sa pagsangyaw sa grupo ug maningkamot sa pagtabang sa tanan diha sa grupo nga malipay sa ilang ministeryo. (Efe. 4:11, 12) Aron molampos kini, himoon niyang tumong ang pagsangyaw kauban sa matag membro sa grupo. Tabangan usab niya ang magtatan-aw sa pag-alagad sa paghimog kahikayan alang niadtong buot mapauswag ang pipila ka bahin sa ilang ministeryo nga makadawat ug tabang gikan sa mas eksperyensiyadong magmamantala.
6 Ingong Usa ka Mahigugmaong Magbalantay: Ang magtatan-aw sa pagtuon sa libro interesado niadtong kinsa tungod sa ilang mga kahimtang gamay lang ug mahimo diha sa buluhatong pagsangyaw. Paneguroon niya nga kadtong diyutay lang gayod ang mahimo tungod sa katigulangon o tungod kay dili na makagawas sa balay ug kadtong temporaryong dili makahimo tungod sa grabeng sakit o kadaot mahibalo nga adunay kahikayan nga magtugot kanila sa pagtaho sa oras sa pag-alagad diha sa tag-15-minutos nga gidaghanon kon dili sila makaarang sa pagtaho ug usa ka oras sulod sa usa ka bulan. (Tinoon sa Komite sa Pag-alagad sa Kongregasyon kon kinsay kuwalipikado niining kahikayana.) Interesado usab siya niadtong giasayn sa grupo nga nahimong di-aktibo, nga maningkamot sa pagtabang kanila nga mapadayon ang ilang kalihokan uban sa kongregasyon.—Luc. 15:4-7.
7 Pagkamapasalamaton nato alang sa mahigugmaong interes nga gipakita sa mga magtatan-aw sa pagtuon sa libro! Ang personal nga pagtagad nga ilang gihatag makatabang sa “tanan [aron] makadangat sa pagkausa sa pagtuo . . . , sa gidak-on nga iya sa kabug-osan ni Kristo.”—Efe. 4:13.