Ang Pagtuon sa Libro sa Kongregasyon—Kon Nganong Atong Gikinahanglan Kini
1. Unsa ang unang mga pagsugod sa kahikayan sa Pagtuon sa Libro sa Kongregasyon?
1 Sa 1895, ang mga grupo sa pagtuon sa mga Estudyante sa Bibliya, ingon sa pagtawag kaniadto sa mga Saksi ni Jehova, nailhan ingong Dawn Circles for Bible Study. Ang mga tomo sa Millennial Dawn mao ang gigamit ingong pasukaranan sa pagtuon. Sa ulahi, kining mga tigoma gitawag nga Berean Circles for Bible Study. (Buh. 17:11) Kasagaran ang gamayng grupo nagtigom diha sa pribadong balay sa gabii nga kombenyente sa maong grupo. Kining mga tigoma mao ang mga sinugdanan sa Pagtuon sa Libro sa Kongregasyon.
2. Sa unsang paagi kita makaamot sa “pagdinasigay” diha sa pagtuon sa libro?
2 Pagdasig ug Tabang: Sanglit ang mga grupo sa pagtuon sa libro gituyo nga huptang gamay, dunay mas dakong kahigayonan ang mga manambong sa pagpahayag sa ilang pagtuo pinaagi sa ilang mga komento. Ang resulta mao ang “pagdinasigay . . . , sa pagtuo sa tagsatagsa.”—Roma 1:12.
3, 4. Sa unsang paagi ang kahikayan sa pagtuon sa libro makatabang kanato sa pagtuman sa atong ministeryo?
3 Ang pagpaniid sa paagi sa pagpanudlo sa magtatan-aw sa pagtuon sa libro makatabang kanato sa ‘paggamit sa pulong sa kamatuoran sa hustong paagi.’ (2 Tim. 2:15) Matikdi kon giunsa niya pagpasiugda ang Kasulatanhong pasikaranan sa materyal. Kon haom alang sa publikasyon nga ginatun-an, mahimo niyang ipasiugda ang pangunang mga punto pinaagi sa paniklop nga repaso, ginamit lamang ang Bibliya. Ang iyang maayong panig-ingnan makatabang kanato sa pagpauswag sa atong pagpanudlo diha sa Kristohanong ministeryo.—1 Cor. 11:1.
4 Gawas pa sa pagdumala sa senemanang leksiyon, ang magtatan-aw sa pagtuon sa libro manguna sa pagsangyaw. Pinaagi sa pagpakigtambayayong sa magtatan-aw sa pag-alagad, mohimo siya ug praktikal nga mga kahikayan alang sa pag-alagad sa kanataran. Paningkamotan niyang matabangan ang tanan diha sa grupo sa pagtuman sa ilang Kristohanong responsabilidad sa pagsangyaw sa maayong balita ug paghimog mga tinun-an.—Mat. 28:19, 20; 1 Cor. 9:16.
5. Unsang personal nga tabang ang mabatonan pinaagi sa pagtuon sa libro?
5 Ang magtatan-aw sa pagtuon sa libro interesado sa espirituwal nga kaayohan sa matag usa diha sa grupo. Ipasundayag niya kini nga interes diha sa mga tigom sa kongregasyon ug sa dihang mokuyog siya sa uban sa pag-alagad sa kanataran. Iyang gamiton usab ang mga higayon sa dihang mobisita siya sa mga igsoon sa ilang mga balay aron sa pagpalig-on sa espirituwal. Ang tanan angayng mobating giabiabi sa pagduol sa magtatan-aw sa pagtuon sa libro alang sa espirituwal nga tabang sa panahon nga sila manginahanglan.—Isa. 32:1, 2.
6. (a) Sa unsang paagi ang atong mga igsoon sa pipila ka nasod napalig-on pinaagi sa pagtigom diha sa mas gagmayng mga grupo? (b) Sa unsang paagi ikaw personal nga nakabenepisyo gikan sa kahikayan sa pagtuon sa libro?
6 Maglig-onay ang Usag Usa: Diha sa mga nasod diin ang kalihokan sa katawhan sa Diyos gidili, ang mga igsoon sagad magtigom diha sa mas gagmayng mga grupo. Usa ka igsoong lalaki nahinumdom: “Bisan kon gidili ang among Kristohanong kalihokan, sa dihang posible gihimo namo ang among senemanang mga tigom sa mga grupo nga tali sa 10 ug 15. Gikan sa mga tigom kami nakakuhag espirituwal nga kusog, diha sa among pagtuon sa Bibliya ug sa among panag-uban human sa pagtuon. Gitandi namo ang among mga kasinatian, ug nakatabang kadto kanamo sa pag-amgo nga matag usa kanamo may samang pakigbisog.” (1 Ped. 5:9) Sa samang paagi, hinaot mapalig-on nato ang usag usa pinaagi sa bug-os nga pagpaluyo sa kahikayan sa Pagtuon sa Libro sa Kongregasyon.—Efe. 4:16.