Kon sa Unsang Paagi Matabangan Kita sa Pagtuon sa Libro sa Kongregasyon
1. Sa unsang paagi makatabang kanato ang lima ka senemanang panagkatigom?
1 Matag semana ang atong lima ka senemanang panagkatigom gidumala sa lainlaing paagi ug katuyoan. Bisan pa niana, ang tanan niini hinungdanon aron matabangan kita nga ‘magmahunahunaon sa usag usa aron sa pagdasig ngadto sa paghigugma ug sa maayong mga buhat.’ (Heb. 10:24, 25) Unsa ang pipila ka talagsaon ug mapuslanong mga bahin sa Pagtuon sa Libro sa Kongregasyon o CBS?
2. Unsay mga kaayohan sa gagmayng panagkatigom sama sa CBS?
2 Tabang Aron Mouswag sa Espirituwal: Diyutay ra ang manambong sa CBS kon itandi sa ubang mga tigom sa kongregasyon. Tungod niini, mas daling maugmad ang panaghigalaay nga makapalig-on kanato sa espirituwal. (Prov. 18:24) Gisulayan mo na ba pag-ilaila ang tanang membro sa inyong CBS, nga tingali naghangyo sa matag usa sa pag-uban kanimo sa ministeryo? Ang CBS magpaarang usab sa magtatan-aw sa pagtuon sa pagkahibalo sa lainlaing mga kahimtang sa matag usa sa grupo ug sa pagtanyag ug personal nga pagdasig.—Prov. 27:23.
3. Sa unsang paagi ang CBS magdasig kanato ug sa mga gitun-an sa Bibliya sa pagkomento ug pagtambong?
3 Naimbitar mo na ba ang imong mga gitun-an sa Bibliya sa pagtambong uban kanimo sa CBS? Ang mga interesado nga magpanuko sa pagtambong sa atong dagkong mga panagkatigom mahimong dili kaayo maulaw sa pagtambong sa ginagmayng tigom, ilabina diha sa pribadong balay. Ang mahigalaong kahimtang magpasayon sa mga batan-on ug mga bata ug sa mga bag-ong nakig-uban sa pagkomento. Ug kay gamay ra man ang grupo, mas daghan kitag kahigayonan sa pagkomento ug sa ingon atong madayeg si Jehova.—Sal. 111:1.
4. Sa unsang mga paagi nga kombenyente ang CBS?
4 Ang mga CBS kasagarang gipahigayon diha sa mga dapit nga kombenyente sa mga magmamantala. Bisan tuod dili posible para sa tanan nga maasayn diha sa dapit nga labing duol kanila, ang pagtambong sa CBS diin kita naasayn lagmit wala ra manginahanglan ug daghang pagbiyahe kon itandi sa ubang mga tigom sa kongregasyon. Ang dapit sa CBS mahimong usa usab ka kombenyenteng dapit nga tigomanan sa dili pa mosangyaw.
5. Sa unsang paagi ang magtatan-aw sa CBS makatabang kanato sa ministeryo?
5 Tabang Alang sa Ministeryo: Ang magtatan-aw sa CBS interesado sa pagtabang sa matag usa aron sila adunay regular, mabungahon, ug malipayong pagpakigbahin sa ministeryo. Busa, siya maningkamot sa pagpakig-uban sa matag membro sa grupo, nga maghatag ug personal nga tabang diha sa nagkalainlaing bahin sa ministeryo. Kon nalisdan ka sa usa ka bahin sa ministeryo, sama sa pagbalikduaw, sultihi ang imong magtatan-aw sa CBS. Basin hangyoon niya ang usa ka eksperyensiyadong magmamantala sa grupo nga ubanan ka. Ang imong katakos sa pagtudlo sa mga gitun-an sa Bibliya mouswag pinaagi sa pagpaniid pag-ayo sa maayong paagi sa pagpanudlo sa magtatan-aw samtang siya nagdumala sa CBS.—1 Cor. 4:17.
6. Nganong angay natong pahimuslan sa bug-os ang CBS?
6 Usa gayod ka mahigugmaong kahikayan ang Pagtuon sa Libro sa Kongregasyon! Gikan kini kang Jehova, ug kini motabang kanato nga magpabiling lig-on sa espirituwal bisan pa sa malisod nga mga panahon nga kita nagkinabuhi.—Sal. 26:12.