Paghimog Kauswagan sa Ministeryo
1 Adunay karaang panultihon bahin sa kauswagan nga nag-ingon: “Sugdi kon diin ka magbarog. Apan ayaw pagpabilin sa imong gibarogan.” Pagkamapadapat ang maong panultihon sa paghimog progreso diha sa ministeryo! Sa misugod ka sa ministeryo, basin mubong presentasyon lamang ang imong naarangan maylabot sa mensahe sa Gingharian. Pero kon miagi na ang pipila ka tuig ug ikaw wala mouswag sa maong kahimtang, nga nagpabilin sa imong gibarogan, unsa may imong mahimo?
2 Ang unang tikang mao ang pagpangayo kang Jehova sa kaalam nga gikinahanglan sa pagtudlo uban ang kahanas. (Prov. 15:14; Sant. 1:5) Ang ikaduhang tikang mao ang paghago uyon sa imong pag-ampo. Gahini ug pipila ka panahon sa pagrepaso sa mga presentasyon nga anaa sa librong Nangatarongan. Kaplaga ang usa nga gibati mong epektibong magamit, ug sublisublia ang maong presentasyon hangtod nga kana masilsil na sa hunahuna. Ang ikatulong tikang mao ang pagduyog sa imong kaigsoonan diha sa kanataran aron ikatanyag mo ang presentasyon nga imong giandam.
MGA HIGALA NGA MOTABANG KANIMO
3 Hayan ikaw moingon, ‘Sayon kanang sultihon kay sa buhaton.’ Tinuod, apan maoy hinungdan nga adunay mga higala nga moabag kanimo. Kon ikaw batan-on, pakigsulti sa imong mga ginikanan o sa bansay nga mga magmamantala kinsa mabungahong mga ministro. Hangyoa ang ilang mga sugyot kon unsaon sa pagpakigsulti sa mga tawo diha sa mga ganghaan. Basin sila mosugyot ug mga praktis sesyon nga imong masulayan ang imong presentasyon. Sila ang mahimo tingaling tagbalay, nga nagapatunghag kumon nga mga pagsupak nga masugamak diha sa mga ganghaan. Pinaagig pagpraktis ikaw makakat-on sa hanas nga pagpakigsulti sa katawhan.
4 Aduna ka ing ubang mga higala nga makabulig kanimo. Anaa ang mga payunir nga nakakat-on sa mga paagi sa pagsangyaw pinaagig kasinatian ug sa pagtambong sa ‘Pioneer Service School.’ Ang imong konduktor sa pagtuon sa libro o ang magtatan-aw sa pag-alagad makakuyog usab kanimo sa pagsangyaw sa pamalaybalay ug sa dugang makapasundayag sa paagi sa pagpakigsulti ug pagpangatarongan uban sa mga tawo.
BALIKA ANG INTERES NGA GIPAKITA
5 Kita interesado sa paghatag ug dugang espirituwal nga tabang ngadto sa mga tawo nga midawat sa atong mga basahon. Kana nagakahulogan nga kita gayod mobalik sa paghaling sa dugang interes. Sa di pa mobalikduaw, sublia ang imong gikahisgot sa unang duaw aron mas epektibo nga imong matagik ang ulohan nga nakabutad sa ilang interes. Hinumdomi, usab, samtang kita nagatanom ug nagabisibis, si Jehova mao ang nagapatubo. Hangyoa ang iyang giya sa dili pa moduaw. (1 Cor. 3:6; 2 Cor. 9:10) Samtang kita magatabang sa uban sa pagkat-on, kita sa atong kaugalingon magmauswagon.
6 Ang sunod importanteng tikang mao ang pagsugod ug pagdumalag pagtuon sa Bibliya. Kon wala pa nimo kanang bahina makab-ot sa imong tingusbawang ministeryal, padayon sa pagduol kang Jehova sa pag-ampo ug hangyoa siya sa pagbulig kanimo nga makakaplag ug makapasibsib sa usa ka karnerohon. Makaplagan mong mapuslanon sa pagpaniid kon sa unsang paagi ang epektibong magtutudlo nagadumala sa usa ka pagtuon sa Bibliya ug dayon sundoga ang iyang mga paagi sa pagpanudlo. Usab, sublia ang impormasyon sa pagpanudlo sama sa makaplagan diha sa Ang Bantayanang Torre sa Pebrero 1, 1985, mga panid 8-19 (Agosto 1, 1984 sa Ingles, pp. 8-17). Busa pinaagi sa pagpangandam sa imong kaugalingon, ikaw mahimong andam sa pagdumalag usa ka pagtuon sa dihang tubagon ang imong mga pag-ampo.
IPAHIMUTANG UG KAB-OTA ANG MGA TUMONG
7 Ang pagkab-ot sa mga tumong sa mas epektibong pagpanudlo, sa paghimog mga balikduaw, ug sa pagdumalag mga pagtuon nagakinahanglan ug panahon. Imo bang mapahimutang sa imong kaugalingon ang laing tumong, nga mao ang pagkahimong oksilyare payunir o regular payunir? Samtang ikaw padayong mouswag diha sa ministeryo, ikaw mahimong tinubdan sa kalig-on ngadto sa uban. Daghang panalangin gikan kang Jehova ang imong matagamtam kon ikaw dili magpabilin sa imong gitindogan kondili padayong mohimog kauswagan.