Magmauswagon Diha sa Pagsangyaw
1 Ang atong langitnong Amahan malipay sa pagkakita sa iyang mga alagad nga mouswag diha sa kamatuoran. Kana naglakip sa pagkahimong hamtong ug epektibong magsasangyaw sa maayong balita. Si Pablo nagdasig sa magtatan-aw nga si Timoteo nga magmakugihon aron ang iyang pag-uswag madayag. (1 Tim. 4:13-15) Kitang tanan angayng maningkamot sa pagpauswag sa kalidad sa atong pagsangyaw, bisan kon kita eksperyensiyado na nga mga magmamantala.
2 Paghimog Personal nga mga Tumong: Aron mouswag, kinahanglan kitang mohimog personal nga mga tumong. Unsa ang pipila ka tumong nga mahimo natong kab-oton? Mahimo kitang maningkamot aron mahanas sa paggamit sa atong espirituwal nga espada, ang Bibliya. (Efe. 6:17) Tingali adunay bahin sa ministeryo nga kinahanglan natong pauswagon, sama sa pagsangyaw sa kadalanan, pagsangyaw pinaagig telepono, o diha sa dapit negosyohanan. O kaha maningkamot kita nga mahimong mas epektibo diha sa mga pagbalik-duaw. Ang laing maayong tumong mao ang pagpauswag sa atong katakos sa pagsugod ug pagdumalag mga pagtuon sa Bibliya.
3 Mga Tagana: Ang mga tigom sa kongregasyon, ilabina ang Teokratikanhong Tunghaan sa Ministeryo ug Tigom sa Pag-alagad, gidisenyo aron tabangan kita nga mouswag ingong mga ministro. Daghang kaayohan ang atong madawat kon kita maningkamot sa pagpangandam ug sa pagtambong sa maong mga tigom ug sa pagpadapat sa mga sugyot niini.—2 Cor. 9:6.
4 Angay usab nga tabangan nato ang matag usa nga mouswag. (Prov. 27:17) Ang pagpaniid pag-ayo sa presentasyon sa atong kauban diha sa pagsangyaw makatabang kanato nga mouswag. Dugang pa, ang atong magtatan-aw sa CBS makahimog kahikayan aron matabangan kita sa personal. Dako gayong panalangin nga ikauban ang usa ka eksperyensiyadong payunir o ubang magmamantala nga makatabang kanato aron mahimong mas epektibo ug mas malipayon diha sa ministeryo! Aduna bay bag-ong magmamantala diha sa atong CBS? Mahimong dapiton nato siya nga mosangyaw uban nato.
5 Ang labing hinungdanong buluhaton nga ginahimo karon mao ang pagsangyaw. Samtang atong itanyag kang Jehova ang atong “halad sa pagdayeg,” buot natong ihatag kaniya ang atong kinamaayohan. (Heb. 13:15) Kon maningkamot kita nga magmauswagon diha sa ministeryo, mahimo kitang mga mamumuo “nga walay angayng ikaulaw, nga nagagamit sa pulong sa kamatuoran sa hustong paagi.”—2 Tim. 2:15.