Tabangi ang Uban sa Pagkahimong Hanas sa Paggamit sa Pulong sa Diyos
1 Si Jehova naghimog daghang mga tagana para sa pagbansay kanato nga mahimong epektibo sa atong personal nga ministeryo. Ingong ehemplo, duolan na sa 50 anyos nga ang Teokratikanhong Ministeryong Tunghaan mihatag ug mauswagong pagbansay diha sa pagpanulti ug pagpanudlo. Kini gidugangan sa Tigom sa Pag-alagad, uban sa mapuslanong mga pakigpulong, mga pasundayag ug mga yugto sa panaghisgot.
2 Kita nakabenepisyo gikan sa regular nga mga duaw sa mga magtatan-aw sa sirkito. Ang magtatan-aw sa pag-alagad nagaduaw sa kada grupo sa pagtuon sa libro ug nagahatag mahigugmaong tabang sa pagpauswag sa atong mga katakos sa ministeryo. Sa matag higayon nga kita magkatigom sa dayon nang pagsangyaw sa kanataran atong madawat ang napulo ka minutos sa mapuslanong instruksiyon ug makabulig nga mga sugyot alang sa maong adlaw.—Heb. 10:23-25.
TABANGI ANG MGA BATAN-ON UG MGA ESTUDYANTE SA BIBLIYA
3 Ang batan-ong mga magmamantala ug mga bag-ohan nagakinahanglan ug makanunayong pag-abag diha sa publikong ministeryo. Ang unang kaakohan alang niini anaa sa mga ginikanan ug kanilang nagadumalag mga pagtuon sa Bibliya uban sa maong mga tawo. (Gal. 6:6; Efe. 6:4) Ang pagkaepektibo dili man moabot nga awtomatiko kondili aduna ing panginahanglan sa sistematikong mahigugmaong personal nga pagbulig ug pagbansay.
4 Ang personal nga pagtabang kinahanglang magsugod antes ang tawo sa aktuwal makig-ambit sa ministeryo. Sublia ang Ulohan nga Mahisgotan. Abagi siya sa pagtagik sa yanong presentasyon, tingali nagagamit ug usa lang ka teksto sa sinugdanan. Samtang duyog kamong nagasangyaw gahinig panahon sa paghatag ug komendasyon ug malulot nga sugyot alang sa pag-uswag. Ipasiugda ang panginahanglan sa paghupot kanunay ug mainampoong tinamdan sa tanang panahon.—Efe. 6:18, 19.
5 Maoy maayo kaayo kon ang batid nga mga magmamantala ug mga regular payunir makaeskedyol sa ilang panahon aron sa pagsuportar sa hinapos-semanang pag-alagad sa kanataran sa tuyo nga makatabang sa mga bag-ohan pinaagig pagkuyog kanila sa pagsangyaw. Ang maong personal nga sakripisyo sa ilang bahin pabilhan gayod niadtong buot mouswag pinaagig pagsangyaw uban sa mga eksperiyensiyado.—Eccl. 4:9, 10.
6 Dihay panahon nga ang tanan kanato mga bag-ohan ug di-batid apan kita nakadawat ug pagpalig-on ug pagbansay gikan sa mas mga eksperiyensiyado. (Prov. 27:17; Buh. 20:35) Hinaot ang apresasyon niini magpalihok kanato sa pagbulig sa uban sa pagkahimong mas hanas sa paggamit sa Pulong ni Jehova.