Mga Payunir Motabang sa Uban
1 Si Jesus miingon: “Ang anihon, sa pagkatinuod, dako, apan ang mga mamumuo diyutay. Busa pangamuyo kamo sa Agalon sa pag-ani nga magpadalag mga mamumuo ngadto sa iyang pag-ani.” Sanglit ang unang-siglong mga mangangani diyutay lamang ug dako ang ilang kobrehang teritoryo, mahimo untang sugoon sila ni Jesus sa pag-abot sa mas daghan kutob sa maarangan dala ang maayong balita pinaagig pagpadala kanila nga tinagsatagsa. Hinunoa, iyang “gipadala sila nga tinagduha.” (Luc. 10:1, 2) Nganong tinagduha?
2 Kadtong mga tinun-an maoy mga bag-ohan ug walay kasinatian. Pinaagi sa duyog nga pagsangyaw magkat-onanay ug magdinasigay sila sa usag usa. Sumala sa giingon ni Solomon, “mas maayo ang duha kay sa usa.” (Eccl. 4:9, 10) Bisan human sa pagbubo sa balaang espiritu sa Pentekostes 33 K.P., sila si Pablo, Bernabe, ug uban pa mikuyog sa kaubang mga magtutuo diha sa ministeryo. (Buh. 15:35) Pagkadakong pribilehiyo gayod kadto alang sa uban nga nabansay sa personal pinaagi sa maong takos nga mga lalaki!
3 Usa ka Maayong Programa sa Pagbansay: Sama sa unang siglong katumbas niini, ang modernong Kristohanong kongregasyon maoy organisasyon nga nagasangyaw. Nagatagana usab kini kanatog pagbansay. Ingong mga indibiduwal, ang atong kinasingkasing nga tinguha mao gayod ang pagpresentar sa maayong balita nga epektibo kutob sa maarangan. Aron dugang mga magmamantala ang makapauswag sa ilang kaepektibo, ang tabang mabatonan.
4 Sa Tunghaan sa Ministeryo sa Gingharian nga gihimo di pa dugay, ang Sosyedad nagpahibalo bahin sa usa ka programa alang sa mga payunir sa pagtabang sa uban diha sa ministeryo sa kanataran. Aduna ba ing panginahanglan niini? Oo, aduna. Kapin sa usa ka milyong magmamantala ang nabawtismohan sa miaging tulo ka tuig, ug daghan niini nila nagkinahanglag pagbansay aron mahimong mas epektibo sa buluhatong pagsangyaw. Kinsay magamit sa paghulip sa maong panginahanglan?
5 Makatabang ang bug-os-panahong mga payunir. Ang organisasyon ni Jehova nagtagana kanila ug daghang tambag ug pagbansay. Makadawat ang mga payunir ug instruksiyon nga gipasibo sa ilang mga panginahanglan diha sa duha ka semanang Tunghaan sa Payunir nga Pag-alagad. Makabenepisyo usab sila gikan sa mga miting uban sa mga magtatan-aw sa sirkito ug distrito, maingon man gikan sa paggiya sa mga ansiyano. Bisan tuod dili tanang payunir mga eksperyensiyado sama kang Pablo ug Bernabe, nakadawat silag hinungdanong pagbansay, nga niana sila malipay nga ipaambit.
6 Kinsay Makabenepisyo? Ang pagduyog ba niining programaha alang lamang sa bag-ohang mga magmamantala o sa bag-ong mga nabawtismohan? Dili gayod! Adunay mga batan-on ug mga gulanggulang nga nakakat-on sa kamatuoran sa katuigan apan moapresyar ug tabang sa ubang bahin sa ministeryo. Ang uban maayo kaayong mopahilunag literatura apan malisdan sa paghimog mga pagbalikduaw o sa pagsugod ug mga pagtuon sa Bibliya. Ang uban sayonan ra sa pagsugod ug mga pagtuon sa Bibliya apan makapaniid nga ang ilang mga estudyante wala mouswag. Unsay nakapugong kanila? Ang eksperyensiyadong mga payunir mahimong hangyoon sa pagtabang niining mga bahina. Ang pipila ka payunir epektibo sa pag-ugmad ug interes, sa pagsugod ug mga pagtuon sa Bibliya, ug sa pagtultol sa bag-ohang mga estudyante ngadto sa organisasyon. Ang ilang kasinatian makatabang niining bag-ong programa.
7 Imo bang nakaplagan nga ang imong eskedyul dili motugot kanimo sa pagsuportar sa regular nga mga tigom sa kongregasyon sa dayon na nga pagsangyaw nga mao gayod untay imong gusto? Ang usa ka payunir hayan makakuyog kanimo sa pagsangyaw sa mga panahong ang ubang mga magmamantala dili ikauban.
8 Maayong Kooperasyon Gikinahanglan: Kaduha sa usa ka tuig, ang mga ansiyano maghimo ug mga kahikayan para sa mga magmamantala nga matinguhaon sa personal nga tabang sa pagduyog diha sa Mga Payunir Motabang sa Uban nga programa. Kon mouyon ka sa pagdawat sa maong tabang, pakigduyog sa payunir nga magmamantala nga gitudlo sa pagtabang kanimo, paghimog praktikal nga eskedyul sa pag-alagad, ug sunda kana. Tumana ang matag kasabotan. Samtang kamo mag-uban, matikdi ang epektibong mga paagi sa pagpresentar sa maayong balita. Analisaha kon nganong epektibo ang tinong mga paagi. Tagda ang mga sugyot nga hayan ihatag sa payunir nga magmamantala aron sa pagpauswag sa imong presentasyon. Samtang imong ipadapat ang mga butang nga nakat-onan, ang imong pag-uswag diha sa ministeryo madayag, diha kanimo ug sa uban. (Tan-awa ang 1 Timoteo 4:15.) Kanunayng mag-uban sa pagsangyaw kutob sa mahimo, nga makig-ambit diha sa tanang bahin sa ministeryo, lakip ang di-pormal nga pagsangyaw apan magpunting sa bisan hain sa partikular nga luna nga ikaw nagkinahanglag personal nga tabang.
9 Maikagon ang magtatan-aw sa pag-alagad sa mahimong pag-uswag. Popanahon, siya mosusi uban sa konduktor sa Pagtuon sa Libro sa Kongregasyon aron sa pagtino kon sa unsang paagi ikaw nabenepisyohan gikan sa programa. Ang magtatan-aw sa sirkito motabang usab kanimo sa dihang siya moduaw sa kongregasyon.
10 Buot ni Jehova nga ang iyang katawhan mabansay ug “masinangkapan alang sa tanang maayong buhat.” (2 Tim. 3:17) Lantawa ang kahikayan nga Mga Payunir Motabang sa Uban ingong usa ka maayong tagana sa pagtabang niadtong buot mopauswag sa ilang katakos sa pagsangyaw sa pulong. Kon maoy imong pribilehiyo nga mopakig-ambit niana, buhata kana uban ang pasalamat, pagkamapaubsanon, ug kangaya.