Pagpabili sa Atong mga Payunir
1 Ang isigkamagbubuhat alang sa Gingharian sa Diyos nagalig-onay sa usag usa. (Col. 4:11) Sa dihang atong tagdon nga ang unang buluhaton sa Kristohanong kongregasyon mao ang pagsangyaw sa maayong balita, aduna ing matulorong mga rason sa pagpabili sa tibuok-panahong mga mamumuo diha sa atong taliwala.—Mar. 13:10; Roma 16:2; Filip. 4:3.
NGANO?
2 Diha sa laktod nga paagi, ang mga payunir nagapalig-on sa kongregasyon pinaagig pagsangyaw uban sa di-eksperiyensiyado nga mga magmamantala diha sa lainlaing bahin sa buluhatong pagsangyaw. Kini nagalakip sa magasing pagpamatuod, pag-andam ug paghimog mga balikduaw, ug pagsugod ug epektibong pagdumala sa mga pagtuon sa Bibliya sa balay. Dugang pa, ang mga payunir makahatag ug panig-ingnan diha sa maisogong pagpamatuod sa impormal nga paagi. Ang ilang suportar sa tungatunga-semanang grupong pagsangyaw nga mga kahikayan mohatag kanilag higayon nga makabulig sa uban. Ang ilang positibong impluwensiya diha sa kanataran mabati ilabina kon ang mga payunir mosuportar sa buluhaton sa kanataran sa hinapos-ang-semana, panahon nga ang kadaghanan sa ubang mga magmamantala makaarang sa pagpakig-ambit.
3 Ang mga payunir nagabulig sa mga kongregasyon sa bug-os ug sigi nga pagkobre sa teritoryo. Kini magpaarang sa mga tawo sa mas pang pagkasinati sa atong mensahe ug mas pang mobati nga hayahay sa dihang moduaw kita kanila tungod kay sila nakaila kon kinsa kita.
DIHA SA KONGREGASYON
4 Daghan ang napalig-on sa pagsulod sa tibuok-panahong pag-alagad tungod kay ang ilang kasingkasing natukbil pinaagig kasibot ug kadasig sa matinumanong mga payunir. Usa ka sister nagduhaduha sa pagkahimong regular payunir tungod kay walay payunir sa kongregasyon. Apan sa gipalig-on sa magtatan-aw sa sirkito, siya mipadayon ug nagpatala. Ang uban sa wala madugay misunod, ug ang kongregasyon sa pagkakaron aduna nay daghang masibotong mga payunir.
5 Mahimong may mga panahon nga hangyoon sa mga ansiyano ang usa ka payunir sa pagbulig sa usa ka tawo nga nahimong diregular o diaktibo. Kining maong pagtabang basin maglakip sa pagdumalag pagtuon sa Bibliya sa maong tawo. Ang pagtuo ug kasibot sa payunir sa ingon makaamot sa paghaling pag-usab sa gugma sa maong tawo sa kamatuoran ug makabulig kaniya nga madasig pag-usab sa pagbuhat diha sa pagtuman sa mga obligasyon sa iyang pahinungod.—1 Tes. 5:14.
PALIG-ONA ANG MGA PAYUNIR
6 Ang mga payunir, samtang dakog mahimo sa pagpalig-on sa uban, sa ilang kaugalingon nagakinahanglan ug pagpalig-on aron makapadayong malipayon sa ilang pag-alagad. (Roma 1:12) Ikaw ba nagasulting positibo bahin sa payunir nga ministeryo? Kanus-a man ang ulahing panahon nga gidayeg mo ang usa ka payunir tungod sa iyang buluhaton ug sakripisyo-kaugalingon nga espiritu? Ang mga payunir ilabinang nagaapresyar kon adunay ikakauban sa pagsangyaw sulod sa mga oras sa adlaw sa dihang pipila ra sa mga magmamantala ang mogula. Ikaw ba makakuyog sa mga payunir ug hayan makagugol ug mas pang mga oras sa pagsuportar sa buluhatong pagsangyaw?
7 Unsa pa ang laing paagi nga makapalig-on ka sa mga payunir? Gawas pa sa paghatag ug komendasyon, imong ikapatugbaw ang imong pagpabili alang sa maong mahagoong mga mamumuo diha sa paagi nga mabati pinaagig pagpaambit ug usa ka pagkaon kanila, sa boluntaryong paagi nagaabag kanila sa ilang mga galastohan sa pagbiyahe, ug diha sa ubang mga paagi nga nagasuportar kanila kutob sa imong maarangan.—Itanding 1 Tesalonica 5:12, 13.
8 Pinaagig mga ansiyano ug ministeryal nga mga alagad nga nagapanguna diha sa kongregasyon, ang mga payunir ug mga magmamantala bug-os nga mosuportar sa maayo-pagkaorganisar nga mga kahikayan sa pagsangyaw. Busa ang tanan kanato makagamit man sa atong mga hiyas nga nabatonan diha sa “pag-alagad sa usag usa.”—1 Ped. 4:10, 11.