Pagtanyag sa Maayong Balita—Uban sa Librong Pulong sa Diyos
1 Sa iyang sulat ngadto sa isigkamagwawali, ang apostol nga si Pablo misulat: “Ang tibuok Kasulatan dinasig sa Diyos ug makaayo alang sa pagpanudlo, sa pagbadlong, sa pagtul-id sa mga butang, sa pagpanton diha sa pagkamatarong.”—2 Tim. 3:16.
2 Ingong moderno-adlaw nga mga magmamantala sa maayong balita, kita nagatuo niining pulonga sa tibuok tang kasingkasing. Gidawat ta ang Bibliya ingong dinasig nga Pulong sa Diyos. Atong giabiabi ang paggiya niini diha sa tanang bahin sa atong kinabuhi. (Sal. 119:105; Juan 17:17) Pero sa unsang paagi atong matabangan ang uban sa pagdawat sa Bibliya ingong Pulong sa Diyos ug pagpadapat sa mga prinsipyo niini diha sa ilang inadlaw nga pagkinabuhi?
KON UNSAON SA PAGBUHAT NIINI
3 Samtang kita moambit sa unang publikong pagpanagtag sa bag-ong librong Ang Bibliya—Pulong sa Diyos o sa Tawo? sa bulan sa Nobyembre, kita magtukod ug pagsalig diha sa Bibliya ug moabag sa katawhan sa pagkakita sa mga kaayohan tungod sa pagkinabuhi sumala sa dinasig nga tambag niini. Pagkadakong pribilehiyo kini!
4 Unsa may atong ikasulti sa dihang itanyag ang libro? Human sa mahigalaong timbaya, kita makapatagad sa Proverbio 14:12 aron ipakita nga ang malamposong pagkinabuhi nagakinahanglan ug maalamong pagtultol. Ang sayop nga pagtultol maoy malaglagon. Dayon basaha ang Proverbio 2:6, 7 sa pagpakita nga si Jehova nagatagana sa matuod nga kaalam. Kita makapangatarongan uban sa tagbalay maylabot sa panginahanglan nga modangop sa Bibliya aron kaplagon ang diyosnong kaalam. Dayon kita makaingon: “Kining basahona nagapakita nga ang Bibliya maoy kasaligang tinubdan sa mapuslanong tambag bahin sa mga gumonhap nga ginaatubang sa katawhan. Palihog matikdi ang giingon dinhi sa parapo 2 sa panid 5. [Basahang parapo 2, ug kon may panahon pa, basahang parapo 4.] Kining basahona makabulig kanimo sa pag-apresyar nga ang Bibliya mao gayoy Pulong sa Diyos ug nasudlan kini sa mapuslanong giya sa tanang bahin sa kinabuhi. Maimo kining libroha sa amot nga ₱16.00 lamang.”
5 Ang usa ka tagbalay daw puliki o moingon nga siya dili interesado, nga dili buot malangkit diha sa taas nga panaghisgot. Sa paghimog mubong presentasyon ikaw makaingon: “Sa wayduhaduha ikaw mouyon nga daghang suliran ang giatubang sa katawhan.” Dayon basaha ang pasiunang parapo sa kapitulo 1. Human ang tagbalay makakomento sa paniklop nga pangutana sa maong parapo, ikaw makaingon: “Ang Bibliya nagatug-an kanato nga sa di na gayod madugay karon ang Diyos mismo mosulbad sa tanang nagapalibog nga mga problema sa katawhan. Kining basahona nagabutyag sa kusganong pamatuod sa pagpakita nga ang Bibliya maoy matuod, kay kini maoy Pulong sa Diyos ug dili sa tawo. Gusto ko nga mabatonan mo kini sa amot nga ₱16.00 lamang.”
PAGHULIP SA PANGINAHANGLAN
6 Kining bag-ong basahon, Ang Bibliya—Pulong sa Diyos o sa Tawo?, magpaarang sa sinserong mga magbabasa sa pagkasabot ug pagpabili nga ang Bibliya mao gayoy Pulong sa Diyos. Ang tininuod nga pagtagad sa ginaingon niana mahimong magpasugod nila sa pagsubay sa dalan ngadto sa kinabuhi. Busa, himoang linaing panlimbasog sa pagpahimutang niining basahona sa daghang mga tawo nga imong maarangan. Atong hatagan kining libroha sa mas dakong pagpanagtag nga maarangan.