Balik Aron Halingon ang Interes sa Bibliya
1 Usahay ikahibalag nato ang mga tawo diha sa pag-alagad sa kanataran nga magpakitag interes sa maayong balita apan puliki kaayo sa pagpakigsulti kanato sa dihang kita moduaw. Gisulayan ba nato ang pagbalikduaw sa laing higayon aron ikapaambit ang kamatuoran kanila? O tingali may makapainteres kitang panaghisgot uban sa tagbalay, apan wala siya modawat ug bisan unsang basahon. Mobalik ba kita aron dugang makigsulti kaniya?
2 Mahinungdanon ang pagpaloap sa tanang interes nga atong makaplagan. Nagahimo ba lamang kitag mga balikduaw niadtong modawat ug basahon? Kon mao, mahimong malaktawan nato ang pipila ka interesadong tawo. Dili gayod nato buot nga hukman ang usa ingong dili-takos tungod lamang kay wala siya midawat ug basahon. (Itanding Roma 14:4.) Tingali human sa atong duaw, ang tagbalay magahunahuna bahin sa atong gisulti ug busa mahimong labaw nang matinagdanon sa dihang kita mobalik.
3 Sa dihang mobalikduaw sa tawo nga puliki, ikaw makaingon:
◼ “Nalipay ko sa pagpakigkita kanimo pag-usab. Sa miaging higayon nga dinhi ko, wala ta magkaestorya tungod kay wala kay panahon. Akong nasabtan nga ikaw puliki nga tawo, ug kadiyot ra ko. Malagmit ikaw nabalaka bahin sa maayong kahimsog alang sa imong kaugalingon ug niadtong imong gimahal. Buweno, nahibalo ka ba nga ang Diyos nagsaad nga wad-on ang tanang balatian? [Tugoting motubag.] Matikdi ang punto sa parapo 4 niining brosyura nga nag-ulohag ‘Tan-awa! Ginabag-o Ko ang Tanang Butang.’” Kon itugot sa panahon, basahang parapo ug unya tagdang usa sa mga kasulatan sa ubos sa panid 4 nga nagahulagway sa mga kahimtang sa bag-ong kalibotan. Kon madinawaton ang tagbalay, mahimong makasugod ka ug pagtuon sa Bibliya.
4 Sa dihang mobalikduaw sa tawong midawat ug ‘tract,’ ikaw makaingon sama niini:
◼ “Sa kataposang higayon nga nagkita ta, ikaw midawat ug kopya niining maong tract nga nag-ulohag Kinsa Gayod ang Nagamando sa Kalibotan? Malisod ba kanimo ang pagdawat nga si Satanas nagamando niining kalibotana? [Tugoting motubag.] Matikdi ang unang parapo sa panid 6.” Basahang parapo, unya mangutana: “Nganong buot man kitang limbongan ni Satanas?” Human nga motubag ang tagbalay, duyog nga tagda ang ikaupat nga parapo sa panid 3. Mahimong ipadayon mo ang bug-os nga paghisgot sa tract, o hayan buot mong ipaila ang brosyur nga Tinuod Bang May Pagtagad ang Diyos Kanato? ug tagdon ang parapo 8 sa panid 13.
5 Adunay maayong rason nga magmapositibo ug paloapon ang interes nga atong makaplagan sa atong pagsangyawng buluhaton bisan kon kini gipahayag sa limitadong paagi.
6 Kon ikaw may maayong panaghisgot uban sa usa nga mahimong interesado lamang ug diyutay, ayawg kalimte ang pagbalikduaw aron ugmaron ang interes. Mahimong moresulta kana sa pagsugod ug pagtuon sa Bibliya sa balay ug magbutang sa usa ngadto sa dalan sa kinabuhi.—1 Tim. 4:16.