Kon sa Unsang Paagi Ugmaron ang Interes
1 Sumala sa usa ka diksiyonaryo ang “pag-ugmad” nagakahulogan sa pag-andam alang sa o pagpalambo sa pagtubo. Apan nagakahulogan usab kini sa pagpauswag pinaagig paghago, pag-amoma, o pagtuon. Ang paghimog mga tinun-an maoy usa ka mahinungdanong tumong sa atong ministeryo. (Mat. 28:19, 20) Busa, gikinahanglan tang maghago sa pag-ugmad sa interes nga atong makaplagan diha sa ministeryo sa kanataran.
2 Ang subsob nga pagduaw sagad gikinahanglan aron mapalambo ang espirituwal nga pagtubo sa mga mabuot-kasingkasing. Ang mabungahong mga balikduaw kinahanglang motultol ngadto sa regular nga pagtuon sa Bibliya.
3 Ikaw ba nagabalikduaw lamang niadtong mikuhag mga basahon? Usa ka payunir nga sagad dili makapahilunag daghang basahon sa unang duaw mibalikduaw sa tanang mahigalaon. Ang usa ka maayong Kasulatanhong panaghisgot nagataganag usa ka maayong pasukaranan sa pagbalikduaw.
4 Gamitang ‘Tracts’ sa Pagsugod og mga Pagtuon sa Bibliya sa mga Balikduaw: Ang nagkalainlaing mga ulohan sa atong tracts may kalabotan sa atong adlaw. Gipasiugda niini ang panginahanglan sa pagkuhag kahibalo sa Bibliya ug pagpadapat niana.
Makaingon ka:
◼ “Sa miagi atong nahisgotan kon nganong makasalig ta sa Bibliya. Unsang matanga sa umaabot ang gihisgotan sa Bibliya?” Sugdi pagbasa gikan sa ikaduhang parapo sa panid 3 sa tract nga Kinabuhi sa Malinawong Bag-ong Kalibotan. Tan-awang mga kasulatan. Tiklopi pinaagig pagtagad sa materyal ubos sa sub-ulohang “Kon sa Unsang Paagi Kini Posible Alang Kanimo” sa panid 5.
5 Sa susamang paagi, magamit mo ang tract nga Unsay Paglaom Alang sa Namatay nga mga Minahal?
Makaingon ka:
◼ “Sumala sa mubo tang panaghisgot sa miagi, daghang tawo ang nakulangag pagsalig sa Diyos. Pananglitan, sila mangutana: ‘Kon gamhanan kaayo ang Diyos, nganong gitugotan man ang mga tawo nga mamatay?’ Kining maong tract makatabang sa pagtubag nianang pangutanaha.” Paklia ngadto sa seksiyon sugod sa ikaupat nga parapo sa panid 2. Pagsuknag pangutana human sa kada parapo, ug basaha ang mga kasulatan nga wala kutloa.
6 Pagpadayon sa Pagtuon: Pinaagig pagsunod sa mga paagi nga gisugyot dinhi, ikaw nagasugod og usa ka pagtuon sa Bibliya sa balay. Aron sa pagpadayon sa panaghisgot diha sa regular nga paagi, suknaang tagbalay: “Namatikdan ba nimo nga gitubag ta ang daghang pangutana sa pipila lamang ka minuto? Sa sunod semana makagugol tag pipila ka dugang pang panahon sa paghisgot bahin sa paglaom sa pagkabanhaw.” Magamit mo ang usa lamang sa mga pangutanang gihisgotan niining mga artikuloha sa matag panahon nga ikaw moduaw. Diha sa tukmang panahon, ikabalhin mo ngadto sa usa ka brosyur o mosugod og usa ka pagtuon diha sa librong Mabuhing Walay Kataposan.
7 Pagkamakapatagbaw gayod ang pagdumalag usa ka pagtuon sa Bibliya uban sa usa nga tiunay nga nagapangita-kamatuoran! Hinaot nga mapanalanginan ta uban sa mabungahong ministeryo pinaagig pagpadapat sa mga sugyot nga gihatag kon unsaon pag-ugmad ang interes nga atong makaplagan.