Pagtanyag sa Maayong Balita Uban ang Positibong Tinamdan
1 Kitang tanan buot makakaplag ug kalipay kon unsay atong ginahimo, ilabina sa buluhatong paghimog tinun-an. Unsay maghatag kanato sa maong katagbawan? Magsugod kini sa atong pagmentinar ug positibong tinamdan sa hunahuna sa dihang nagatabang sa uban. (Prov. 11:25) Ang atong paagi sa pagtanyag sa maayong balita angayng magpakita nga kita gayod nagatuo kon unsay atong ginaingon. Kon kita nagasulting kinasingkasing, nan ang atong katim-os ug personal nga hugot nga pagtuo modan-ag. (Luc. 6:45) Pinaagig pagbansay sa atong presentasyon, labi pa kitang masaligon sa dihang makigsulti sa mga tawo. Makatabang kini kanato ilabina sulod sa Septiyembre sa dihang magtanyag sa basahong Life—How Did It Get Here? By Evolution or by Creation? Makaplagan nimong makatabang ang mosunod nga mga sugyot.
2 Sa dihang magtanyag sa basahong “Creation,” makasulti ka niini sa unang duaw:
◼ “Sa pagpakigsulti sa atong mga silingan, nakaplagan namong ang pipila adunay pagsalig sa Diyos. Nakaplagan sa uban nga lisod ang pagtuo kaniya. Unsay imong pagbati? [Tugoting motubag.] Matikdi kon giunsa pagpangatarongan sa Bibliya niining butanga. [Basaha ang Roma 1:20.] Atong makita ang pamatuod sa ‘dayong gahom ug pagka-Diyos’ sa Diyos pinaagig pagpaniid sa mga butang nga iyang gilalang.” Basaha ang kataposang parapo sa panid 48 sa basahong Creation, ug ipunting ang kakomplikado sa buhing selula. O gamita ang parapo 18 sa panid 147 aron ipakita kon nganong ang pagkakahibulongan sa circulatory system sa usa ka kahoy nagapasiugda sa buhat sa usa ka Maglalalang. Itanyag ang basahon ug hikaya ang pagbalik.
3 Sa dihang mobalik niadtong kinsa imong gikahinabi bahin sa Pagkamaglalalang sa Diyos, hayan buot nimong isulti kini:
◼ “Sa akong miaging duaw, nahisgotan nato ang bahin sa ebidensiya sa paglungtad sa Diyos—ang iyang kahibulongang kalalangan. Lisod ba nimong tuohan nga ang Usa nga milalang sa uniberso interesado usab sa atong umaabot? [Tugoting motubag.] Makapainteres ang pagkasayod nga ang atong umaabot gitino na sa Maglalalang.” Basaha ang Isaias 46:9, 10. Depende sa interes sa indibiduwal, gamita ang mga hulagway ug mga kapsiyon sa kapitulo 19 sa basahong Creation aron ipasiugda ang mithianong mga kahimtang nga gisaad sa Diyos. Basaha ang parapo 1 sa kapitulo 20, ug itanyag ang pagtuon sa Bibliya. Kon dawaton, sugdi ang pagtuon diha sa basahong Kahibalo.
4 Hayan masulayan nimo kining presentasyona sa dihang itanyag ang basahong “Creation”:
◼ “Sa pagpakigsulti sa imong mga silingan, akong namatikdan nga kadaghanan nangandoy sa usa ka luwas nga komunidad ug malinawong kalibotan. Sa imong hunahuna nganong napakyas man ang tawo sa pagkab-ot sa maong mga kahimtang? [Tugoting motubag.] Pipila ka pangulo tingali sinsero ug nagabuhat sa pipila ka maayo, apan matikdi kon unsay gitambag sa Bibliya.” Basaha ang Salmo 146:3, 4; dayon pangutan-a: “Aduna bay usa nga makatagbaw sa mga panginahanglan sa tawo?” Basaha ang mga bersikulo 5 ug 6. Ipakita ang hulagway sa panid 251 sa basahong Creation, ug ipunting ang mga kaayohan sa pagmando sa Diyos. Itanyag ang basahon.
5 Kon ang pagmando sa Diyos gihisgotan na sa miagi, masulayan nimo kining sugyota sa pagbalikduaw:
◼ “Sa dinhi ako pipila ka adlaw nga miagi, atong nahisgotan ang kapakyasan sa tawo sa pagpatunghag pakigdait sa yuta. Hayan imong mahinumdoman ang katarongan nga gihatag sa Bibliya sa maong kapakyasan. [Basaha pag-usab ang Salmo 146:3.] Namatikdan ba nimo nganong ang Diyos nagtambag kanatong dili ibutang ang atong mga paglaom sa mga tawo? [Tugoting motubag.] Hayan ikaw mouyon nga ang bisan unsang paglaom alang sa dumalayong solusyon kinahanglang magsumikad sa Diyos. Ang rason nga atong mabatonan kining pagsaliga gisaysay sa Salmo 146:10. [Basaha.] Kon buot natong mahimong sakop sa Gingharian sa Diyos, unsa may angay natong buhaton?” Paklia sa panid 250 sa basahong Creation, basaha ang parapo 13, ug ipasiugda ang Juan 17:3. Tanyagi nga ipasundayag kon unsaon sa pagbaton sa kahibalo nga motultol sa kinabuhing dayon. Kon tugotan, ipailaila ang basahong Kahibalo ug sugdi ang pagtuon.
6 Sa pagkobre sa katindahanan, hayan magamit nimo kining mubong paagi uban sa basahong “Creation”:
◼ “Among ginahimo karon ang linaing pag-alagad ngadto sa mga negosyante sa komunidad. Nabalaka kitang tanan sa pag-usbaw sa krimen ug kapintasan sa atong dapit. Gibati ba nimong adunay usa nga may tinuod nga sulbad sa suliran? [Tugoting motubag.] Ang Diyos adunay solusyon.” Paklia ang panid 146 sa librong Creation; basaha ug komentohi ang Proverbio 2:21, 22 sa parapo 19. Ipakita ang ulohan sa kapitulo 16, ug itanyag ang basahon.
7 Sa dihang mobalikduaw sa usa ka negosyante nga imong napahilunaan sa basahong “Creation,” ikaw makaingon niini:
◼ “Sa akong ulahing duaw, akong nahisgotan nga ang Diyos mao lamang ang usa nga may tinuod dumalayong solusyon sa krimen ug kapintasan. Sumala sa iyang saad, kita makasalig nga ang malinawong yuta matinuod. Matikdi ang kapilian nga gipahiluna sa atubangan sa matag usa kanato.” Basaha ang parapo 11 sa panid 250 sa basahong Creation, lakip na ang Salmo 37:37, 38. Komentohi ang hulagway sa panid 251, ug basaha ang unang tudlingpulong sa parapo 14. Itanyag ang libreng pagtuon sa Bibliya, nga mahimong dumalahon sa ilang dapit negosyohanan o sa ilang balay.
8 Ingong “mga isigkamagbubuhat sa Diyos,” aduna kita ing tanang katarongan nga magmapositibo sa dihang itanyag ang maayong balita. (1 Cor. 3:9) Ang atong paghupot kanunay niining tinamdana moresulta sa dagayang panalangin ni Jehova.