Kon Unsaon nga Magbuliganay ang mga Membro sa Banay Alang sa Bug-os nga Pakig-ambit—Diha sa Pagtuon sa Bibliya
1 Ang kamatuoran makadugang sa tinuod nga kahulogan ug katuyoan sa kinabuhi sa banay, apan ang kalamposan sa pag-alagad kang Jehova dili modangat sa awtomatikong paagi. Nagakinahanglag panahon ug paningkamot ang pagtukod ug malig-on sa espirituwal nga panimalay. Aduna ing dakong panginahanglan para sa mga membro sa banay sa duyog gayod nga pagbuhat niining tumonga. Kining unang artikulo sa tulo ka bahin nga serye magpunting kon sa unsang paagi ang mga banay magbuliganay sa pag-ugmad ug maayong mga batasan sa pagtuon.
2 Pinaagig Pagbasa sa Bibliya Adlaw-Adlaw: Ang Proverbio 24:5 nag-ingon nga “ang tawo sa kahibalo nagadugang ug gahom.” Ang kahibalo nga makuha gikan sa regular nga pagbasa sa Pulong sa Diyos maghatag sa usa ka tawo sa pangsulod nga kusog nga gikinahanglan sa pagsukol sa mga atake ni Satanas sa iyang espirituwalidad. (Sal. 1:1, 2) Duyog ba ninyong ginabasa ang Bibliya adlaw-adlaw ingong usa ka banay? Ang Eskedyul sa Tunghaan sa Teokratikanhong Ministeryo naglaraw ug “Eskedyul sa Suplemental nga Pagbasa sa Bibliya” alang sa matag semana sa tuig. Ang pagsunod niana nagakinahanglan lamang ug napulo ka minutos sa kada adlaw sa panahon nga iya sa pamilya. Pagpilig kombenyenteng panahon, sama sa pagpamahaw, human sa panihapon, o una pa matulog, sa pagbasa sa Bibliya ug pagtagad sa teksto sa adlaw gikan sa Pagsusi sa Kasulatan. Himoa kining bahin sa inyong matag adlaw nga rutina sa pamilya.
3 Pinaagig Duyog nga Pagtuon sa Kada Semana: Ang pagtuon sa Bibliya sa pamilya angay nga maoy dugokan sa semana sa banay. Ang matag membro angayng mopaluyo niana pinaagig maikagong pagpakig-ambit sa pagtuon. Ang ulo sa pamilya angayng magtagad sa mga panginahanglan sa banay sa dihang mopili sa tun-anang materyal ug sa adlaw, oras, ug gitas-on sa pagtuon. Unaha ang pagtuon sa banay diha sa eskedyul sa semana. Ayawg tugoti nga mobalda ang di-kaayo hinungdanong mga butang.—Filip. 1:10, 11.
4 Usa ka amahan nga sagad makadawat ug mga tawag bahin sa negosyo diha sa iyang balay mipuwas sa telepono sa panahon sa pagtuon sa pamilya. Kon ang mga suki moanha sa balay, sila gidapit sa pag-apil sa pagtuon o maghulat hangtod nga kini natapos. Ang amahan determinado nga walay nakababag sa pagtuon sa pamilya. Nakahimo kinig halalom nga pag-ila sa iyang mga anak, ug bahin sa iyang negosyo, kini miasenso.
5 Pagkamakapalipay niana sa dihang ang mga membro sa banay magbuliganay sa espirituwal nga mga kalihokan! Ang pagkamatinumanon sa atong mga paningkamot sa pagbaton ug bug-os nga pakig-ambit sa pagtuon sa Bibliya sa pamilya magdala sa panalangin ni Jehova.—Sal. 1:3.