Paghalad sa Atong Kaugalingon nga Kinabubut-on

¹ Ang salmistang si David nagtagna nga ang katawhan ni Jehova “managtanyag sa ilang kaugalingon nga kinabubut-on.” (Sal. 110:3) Ingong katumanan niini, sulod sa matag usa sa miaging upat ka tuig sa pag-alagad, ang katawhan ni Jehova migahin ug kapin sa usa ka bilyong oras sa pagpakaylap sa maayong balita sa Gingharian. Ug adunay daghang paagi, dugang pa sa pagsangyaw ug paghimog tinun-an nga buluhaton, nga atong ikahalad ang atong kaugalingon nga kinabubut-on sa pagtabang sa uban.

² Mga Paagi nga Atong Ikapakita ang Atong Pagkahinangop: Ang pipila sa kongregasyon tingali manginahanglag tabang sa pag-adto sa mga tigom. Nganong dili moboluntaryo nga iuban sila kanimo? Ang uban tingali nasakit, baldado, o naospital. Makaduaw ka ba kanila o makatabang sa ubang paagi? Naghunahuna ka ba sa pagdapit niadtong nanginahanglag pagdasig aron moduyog usahay sa inyong pagtuon sa pamilya? Ang usa ka payunir o magmamantala hayan manginahanglag kauban diha sa ministeryo. Nganong dili motanyag nga mag-uban diha sa kanataran? Pipila kini sa mga paagi nga niana kita boluntaryong makabuhat kon unsay maayo ngadto niadtong iglabot nato sa pagtuo.​—Gal. 6:10.

³ Ang mga igsoong lalaki makapakita sa ilang pagkamahinangpon pinaagig pagpaningkamot sa pagkab-ot sa mga kuwalipikasyon alang sa mga ansiyano ug ministeryal nga mga alagad. (1 Tim. 3:2-10, 12, 13; Tito 1:5-9) Samtang kita padayong magdaghan, adunay panginahanglan sa dugang kuwalipikadong mga igsoong lalaki nga kinabubut-ong manguna sa pagsangyaw ug pagpanudlo ug sa pagbantay sa mga kongregasyon.​—1 Tim. 3:1.

⁴ Tingali ang pipila kanato makaarang sa atong kaugalingon nga magamit sa pag-alagad kang Jehova nga mas dako pa pinaagi sa pagpatala ingong mga oksilyare payunir sa popanahon. Usab, pinaagig pipila ka pagpasibo sa atong eskedyul, kita tingali makaoksilyare payunir nga mapinadayonon o magregular payunir. Ang ato bang mga kahimtang makaarang nga kita makabalhin ngadto sa usa ka dapit diin adunay mas dakong panginahanglan sa tabang? Kadtong kinsa naghalad sa ilang kaugalingon alang niining maayong mga buhat gidayeg pag-ayo, ug sila dagayang gipanalanginan!​—Luc. 6:38.

⁵ Bisan kanus-a nga si Jehova, pinaagi sa iyang organisasyon, magpaabot ug pagdapit sa pagpakig-ambit sa napadakong buluhaton sa Gingharian, maayong suknaon nato ang atong kaugalingon, ‘Ako ba sa gihapon nagahalad sa akong kaugalingon nga kinabubut-on?’ Ang atong diyosnong debosyon magtukmod kanato sa pagbuhat sa tanan natong mahimo diha sa sagradong pag-alagad, nga sa ingon nagalipay pag-ayo sa kasingkasing ni Jehova!​—Sof. 3:17.