Pagsugod ug mga Pagtuon sa Gikinahanglan nga Brosyur
1 Ang mga taho gikan sa tibuok kalibotan nagpakita nga ang brosyur nga Unsay Gikinahanglan sa Diyos Kanato? maoy usa ka gamhanang himan sa pagtudlo sa mga tawo sa kamatuoran. Libolibo ka pagtuon sa Bibliya ang ginasugdan matag semana niining brosyura. Nagmalamposon ka na ba sa pagsugod ug pagdumalag pagtuon sa Bibliya diha sa Gikinahanglan nga brosyur?
2 Samtang nasayonan ang kadaghan sa pagpahiluna sa brosyur, ang uban nalisdan sa pagkahibalo kon unsay isulti aron makasugod pagtuon. Unsang mga metodo ang nakaplagan sa uban nga epektibo sa pagsugod ug mga pagtuon sa Bibliya ginamit ang Gikinahanglan nga brosyur? Ang mosunod nga mga sugyot makatabang gayod.
3 Tanyagi nga Ipasundayag ang Pagtuon: Sa unang pagduaw o sa balikduaw, inay tanyagan lamang ug pagtuon sa Bibliya ang tagbalay, atong ipasundayag kon sa unsang paagi ang kurso sa pagtuon sa Bibliya dumalahon. Kini lagmit maghanaw sa misteryo ug sa mosunod nga kabalaka nga gilangkit sa daghang tagbalay uban sa pulong “pagtuon.” Inigkakat-on nato sa pagpasundayag niana, atong makaplagan kana nga sa yanong pasiuna, kita makaderetso dayon sa pagtuon.
4 Pagpangandam Mao ang Yawi: Ang atong kasibot sa pagsugod ug mga pagtuon sa Bibliya deretsong nalangkit kon unsa ka maayo ang atong pagpangandam. Ang abanteng pagpangandam makatabang nato sa pagbuntog sa bisan unsang pagpanuko nga hayan anaa kanato sa pagpakig-ambit sa pagtuon sa Bibliya nga buluhaton. Pinaagig pag-ensayo sa atong presentasyon sa ubay-ubayng higayon, kita mahimong mas pa nga kombersisyonal, nga makaarang sa pagsulti sa atong kaugalingon sa natural nga paagi ug diha sa atong kaugalingong mga pulong. Kini motabang kanato dili lamang nga marelaks kondili mopabati usab sa tagbalay nga nahimutang.
5 Sa pag-ensayo, makatabang nga tagalan ang imong presentasyon aron imong masultihan ang tagbalay kon unsa ka dugay mahuman ang pagpasundayag sa pagtuon. Human mapaila ang iyang kaugalingon, ang usa ka igsoon moingon: “Mihapit ako aron ipakita nimo ang among libreng programa sa pagtuon sa Bibliya. Mokabat ug mga lima ka minutos ang pagpasundayag. Makagahin ka bag singko minutos?” Ang Leksiyon 1 sa Gikinahanglan nga brosyur ikapasundayag sa mga lima ka minutos. Siyempre, ang piniling mga kasulatan lamang ang mabasa niining gidugayona, apan pinaagig pagkompleto sa unang leksiyon sa pipila ka minutos, ang tagbalay makasinati sa iyang unang pagtuon. Dayon pahibaloa siya nga sa imong pagbalik aron tun-an ang Leksiyon 2, mogahin ka lang ug 15 minutos.
6 Ang mosunod nga presentasyon napamatud-ang epektibo:
◼ “Gusto kong ipasundayag para nimo ang yano, apan gipadali, nga kurso sa pagtuon sa Bibliya sa balay ginamit kining brosyura nga Unsay Gikinahanglan sa Diyos Kanato? Nakaplagan sa daghan nga 15 minutos ka dali sa matag semana sulod sa 16 ka semana, ilang masayran ang makapatagbawng Kasulatanhong mga tubag niining hinungdanong mga pangutana sa Bibliya.” Sa mubo ipakita ang kaundan. Sa pagpakli sa Leksiyon 1, moingon: “Kon makahatag ka namo ug mga lima ka minutos, buot namong ipakita nimo kon sa unsang paagi kini himoon. Ang Leksiyon 1 nag-ulohag ‘Kon sa Unsang Paagi Masayran Nimo Kon Unsay Gikinahanglan sa Diyos.’” Sunod basaha ang tulo ka pangutana, ug isaysay ang mga numero diha sa mga parenteses. Basaha ang parapo 1, ug ipakita sa tagbalay kon unsaon pagpangita ang tubag. Mahimong hangyoon ang tagbalay sa pagbasa sa parapo 2. Dayon moingon: “Pinasikad niining impormasyona, unsaon nimo pagtubag niining pangutanaha? [Basaha ang pangutana pag-usab, ug pakomentoha ang tagbalay.] Mamatikdan mo nga dunay mga kasulatan nga nalangkit sa matag parapo. Magtultol kini sa atong pagtagad ngadto sa tubag sa Bibliya niining mga pangutanaha. Pananglitan, atong basahon ang 2 Timoteo 3:16, 17 ug tan-awa kon mosuportar ba kini sa tubag nga imong gihatag bahin sa awtor sa Bibliya.” Human mabasa ang parapo 3, matagad ang pangutana, ug mabasa ang Juan 17:3, kuhaa ang pagtagad sa tagbalay sa kahibalo nga iyang nabatonan pinaagig pagrepaso sa Leksiyon 1. Niining puntoha mapakli mo ngadto sa Leksiyon 2 ug basaha ang kataposang pangutana, “Unsa ang duha ka paagi nga kita makakat-on bahin sa Diyos?” Dayon suknaa: “Kanus-a ka makalugar ug mga 15 minutos aron atong matun-an ang Leksiyon 2 ug sayron ang tubag?”
7 Hinungdanon ang paghupot sa panaghisgot nga yano ug dayega ang tagbalay sa higayong posible. Sa dihang maghikay sa laing duaw, inay suknaon kon buot ba niyang mopadayon, dasiga lamang siya sa pagsunod sa samang paagi alang sa sunod nga leksiyon. Pahibaloa siya nga ikaw nagpaabot nga mobalik. Ang ubang mga magmamantala mitanyag sa pagtuon ug leksiyon pinaagig telepono kon lisod ang pag-eskedyul. Mahimo mo usab nga dasigon ang estudyante sa pagtipig sa brosyur diha sa hilwas, kombenyenteng dapit aron daling mabatonan kini sa imong sunod duaw.
8 Magmadeterminado: Samtang ang yawi sa kalamposan mao ang pagpangandam, kita kinahanglang magmadeterminado sa pagpadayon. Ang pagtudlog leksiyon sa pipila ka minutos mahimong hagit, busa magmadeterminado sa pagpraktis sa presentasyon sa daghang higayon segun sa gikinahanglan aron mahimong larino sa dihang magpasundayag sa pagtuon. Sulaying ipasundayag ang pagtuon sa matag usa nga imong ikahibalag sa pultahan, sa impormal nga paagi, ug sa pagsangyaw pinaagig telepono. Kon nalisdan ka sa pagsugod ug pagtuon sa Bibliya, ayawg kaluya. Ang kalamposan sa pagsugod ug mga pagtuon sa Bibliya nanginahanglag determinasyon ug sinserong tinguha sa pagpaambit sa kamatuoran ngadto sa uban.—Gal. 6:9.
9 Pinaagig pagpadapat niining mga sugyota, ikaw usab hayan makabatog pribilehiyo sa pagtabang sa usa sa pagsubay sa dalan ngadto sa kinabuhi, pinaagig pagsugod ug pagdumalag pagtuon sa Bibliya diha sa Gikinahanglan nga brosyur.—Mat. 7:14.