Paggamit sa Brosyur nga Maayong Balita Diha sa Pagpanudlo
1. Giunsa pagdisenyo ang brosyur nga Maayong Balita?
1 Sumala sa gihisgotan sa Atong Ministeryo sa Gingharian sa bulan sa Hulyo, usa sa hinungdanong mga himan sa pagpanudlo mao ang brosyur nga Maayong Balita Gikan sa Diyos! Ang mga teksto nga gisitar niini nga brosyur wala kutloa aron ang tagbalay makakat-on gikan mismo sa Bibliya. Daghan sa atong publikasyon ang gisulat sa paagi nga makakat-on ang mobasa bisag siyasiya ra, pero kini nga publikasyon gidisenyo nga tun-an uban sa magtutudlo. Busa dihang ato ning itanyag, kinahanglan natong ipakita kon unsaon kini pagtuon aron mainteres ang tagbalay nga mokat-on sa maayong balita gikan sa Bibliya.—Mat. 13:44.
2. Unsaon nato paggamit ang brosyur nga Maayong Balita sa unang pagduaw?
2 Sa Unang Pagduaw: Puwede kang moingon: “Daghang tawo ang nabalaka kon unsay mahitabo sa umaabot. Sa imong hunahuna, moarang-arang pa kaha ang kahimtang sa kalibotan? [Patubaga.] Dunay maayong balita diha sa Bibliya nga makahatag natog paglaom. Niay pipila ka pangutana nga gitubag sa Bibliya.” Itunol ang brosyur sa tagbalay, ug papilia siyag pangutana diha sa hapin sa likod. Dayon ipakita kon unsaon kana pagtuon gamit ang unang parapo sa leksiyon nga iyang napili. Ang laing paagi mao ang pagsuknag makapainteres nga pangutana base sa leksiyon nga imong napili, dayon ipakita kon sa unsang paagi niya makaplagan ang tubag diha sa Bibliya gamit ang brosyur. Kon ang leksiyon dunay katumbas nga video diha sa jw.org, ang ubang magmamantala magpakita niini nga video panahon sa presentasyon.
3. Ipatin-aw kon unsaon pagdumalag panagtuon gamit ang brosyur nga Maayong Balita.
3 Kon Unsaon Pagdumala ang Pagtuon: (1) Basaha ang ginumerohang pangutana aron masentro ang hunahuna sa tagbalay sa pangunang punto. (2) Basaha ang parapo. (3) Basaha ang pinahandag nga mga teksto, ug pagsuknag mga pangutana nga makatabang sa tagbalay nga makita kon giunsa pagtubag sa teksto ang ginumerohang pangutana. (4) Kon duna pay laing parapo ubos sa pangutana, himoa pag-usab ang paagi 2 ug 3. Kon dunay video nga poparehog ulohan sa pangutana ug wala pa nimo kini mapakita sa tagbalay, ipakita kini panahon sa inyong panaghisgot. (5) Dayon, isukna sa tagbalay ang ginumerohang pangutana aron matino kon nakasabot ba gyod siya.
4. Unsay makatabang nato aron mahanas ta sa paggamit niining hinungdanong himan?
4 Tun-i kining hinungdanong himan. Gamita kini sa matag nahiangayng higayon. Pangandam sa dili pa mo magtuon sa imong estudyante, ug hunahunaag maayo kon unsaon nimo pagpatin-aw sa mga punto gamit ang mga teksto diha sa leksiyon. (Prov. 15:28; Buh. 17:2, 3) Kon mahanas na ka sa paggamit niini nga brosyur, ganahan gyod kang mogamit niini sa pagtudlo sa mga tawo sa kamatuoran!