Gigamit Mo ba ang Gikinahanglan nga Brosyur sa Pagsugod ug mga Pagtuon?
1 Naamgohan mo ba nga kon makighisgot kag Bibliya sa regular ug sa sistematikong paagi, bisag kadiyot lang, uban sa interesadong tawo ug hisgotan ang materyal diha sa usa sa gisugyot nga mga publikasyon, nagadumala ka na ug pagtuon sa Bibliya? Oo, giisip kana nga usa ka pagtuon bisan kon ang pagtuon diha himoa sa ganghaan o pinaagig telepono. Nganong dili mohimog linaing paningkamot sulod sa Mayo ug Hunyo aron makasugod ug usa sa maong pagtuon ginamit ang Gikinahanglan nga brosyur?
2 Pangandam Aron Molampos: Sa dihang itanyag ang Gikinahanglan nga brosyur, hunahunaa pag-ayo kon unsay buot mong hisgotan. Kon mohimo kag balikduaw, hunahunaa ang inyong nahisgotan sa unang duaw. Pangutan-a ang imong kaugalingon: ‘Unsang mga parapoha sa brosyur ang akong ikapasiugda aron maugmad pa ang maong panaghisgot ug motultol ngadto sa pagtuon sa Bibliya?’ Kon namalaybalay ka, tagda ang mga ulohan nga makadani sa usa ka tin-edyer, edaran nga tawo, lalaki, o babaye. Repasoha ang pangunang mga ulohan nga gihisgotan sa brosyur, ug pilia ang makapainteres nga ulohan. Human makahukom ug paagi nga gamiton, bansaya sa makadaghan. Kini mao ang usa sa mga yawi aron magmalamposon.
3 Ang pasukip niining gulaa sa Atong Ministeryo sa Gingharian naghatag ug walo ka “Mga Sugyot sa Pagtanyag sa Gikinahanglan nga Brosyur.” Ang kahong “Ang Deretsong Paagi” nagpakita kon unsaon paggamit ang brosyur sa pagsugod ug mga pagtuon. Mahimo mong ipahiangay ang unang sugyot sama sa mosunod:
◼ “Nahibalo ka ba nga sa pipila lang ka minuto, mahimong makaplagan mo ang tubag sa usa ka hinungdanong pangutana sa Bibliya? Pananglitan, nganong daghan man kaayong relihiyon nga nag-angkong Kristohanon? Nahibulong ka ba gayod bahin niana?” Human makatubag ang maong tawo, paklia ang leksiyon 13 ug hisgoti ang unang duha ka parapo. Segun sa itugot sa panahon, basaha ug hisgoti ang usa o duha ka teksto. Dayon basaha ang kataposang pangutana nga anaa sa ibabaw sa panid, ug ingna: “Ang nahibilin pa nga leksiyon nagpasiugda sa lima ka ilhanan sa matuod nga relihiyon. Malipay akong mobalik ug hisgotan kini uban nimo.”
4 Magmalahutayon: Pahimusli ang matag higayon sa pagpasundayag ug pagtuon sa Bibliya ginamit ang Gikinahanglan nga brosyur. Hangyoa ang panalangin ni Jehova. (Mat. 21:22) Pinaagi sa imong padayong mga paningkamot, mahimong imong matagamtam ang kalipay sa pagtabang ug tawo nga mosanong sa maayong balita!