Pahibaloa ang Tanan nga Haduol Na ang Tibuok-kalibotang Kasegurohan
1 Sa dimadugay, ang “Prinsipe sa Pakigdait” magtukod ug tinuod nga kalinaw ug kasegurohan sa tibuok nga yuta. Ang atong pagtuo niining saara sa Bibliya kinahanglang magpalihok kanato nga ipaambit kini sa uban. (Isa. 9:6, 7; Miq. 4:3, 4) Sa bulan sa Pebrero, atong itanyag ang daandaang mga basahon ingon sa una nang gipahibalo. Ang mga kongregasyon nga wala nianang mga libroha diha sa ilang pinulongan mahimong motanyag sa librong Worldwide Security Under the “Prince of Peace.”
2 Sa panid 4 niining gulaa sa Atong Ministeryo sa Gingharian, among gipresentar ang pipila ka pasiuna nga basin gusto mong gamiton diha sa ministeryo sa Pebrero. Tulo ka pagbalhin (transition) nga makatabang sa pagtanyag sa librong Worldwide Security ang gisugyot diha sa mosunod nga mga parapo. Kini mahimong ikapahiangay sa bisan unsang libro nga igatanyag mo.
3 Pagbalhin Isip 1: Human sa introduksiyon mo, paklia ngadto sa panid 13 ug moingon: “Ang Isaias 9:6, 7 gikutlo gikan sa Bibliya niining unang parapo. Tugoti akong basahon kini kanimo.” Dayon mosukna: “Kinsa ang ‘Prinsipe sa Pakigdait’?” Tugoting motubag, dayon mopadayon: “Kining libroha matin-awng nagabutyag sa ‘Prinsipe sa Pakigdait’ ug nagapatin-aw kon sa unsang paagi iyang patunghaon ang tibuok-kalibotang kalinaw nganhi sa yuta sa atong panahon. Gusto mo bang makakat-on ug dugang bahin niini?”
4 Pagbalhin Isip 2: Human mabasa ang Isaias 9:6, 7, paklia ngadto sa panid 4 ug suknaa ang tagbalay: “Unsang malinawong mga kahimtang ang makita mo sa ilustrasyon?” Tugoting motubag, dayon mopadayon sa pag-ingon: “Adunay kalinaw taliwala sa katawhan ug kalinaw uban sa mga mananap. Ang pipila mahimong maghunahuna nga ang tawhanong mga gobyerno magpatungha sa maong kalinaw. Apan ang tinuod nga kalinaw ug kasegurohan ingon sa gitagna sa Bibliya kinahanglang hinimo-Diyos, dili hinimo-tawo. Di ba mao?” Tugoting motubag, dayon basaha ang parapo 4 sa panid 5 ug ipatin-aw nga kining libroha nagatubag sa daghang pangutana bahin sa Gingharian ug kalinaw ibabaw sa yuta.
5 Pagbalhin Isip 3: Sa mga dapit nga ang mga tawo mahilig sa pagbalda ug dili ka tugotang makahuman sa imong presentasyon, mahimong gamiton mo kining paagiha: “Mahimo bang mosukna kog usa ka pangutana?” Kon ang tagbalay mouyon, padayon: “Si Jesus miingon nga ang iyang mga sumusunod maghimog mga tinun-an sa katawhan sa tanang kanasoran. Ang pangutana mao: Ang tibuok kalibotan ba kinahanglang makomberte sa dili pa siya magmando ingong ‘Prinsipe sa Pakigdait’? Unsa ang imong opinyon?” Tugoting motubag, dayon moingon: “Ang tubag sa Bibliya sa maong pangutana makaplagan dinhi sa panid 21.” Dayon basaha ang parapo 2 sa panid 21.
6 Hayan may gipili kang pasiuna nga imong nagustohan gikan sa panid 4 sa Atong Ministeryo sa Gingharian. Human masubli ang mga pagbalhin (transitions) niining artikuloha, mahimong makaplagan mo ang usa nga nalipay ka sa paggamit. Bansaya ang imong pasiuna ug pagbalhin sa dili pa mogula sa pagsangyaw. Ang imong pangandam ug personal nga hugot nga pagtuo mopadugang sa imong kasibot sa pagtanyag sa librong Worldwide Security.