Imantala ang Matuod nga Kalinaw ug Kasegurohan
1 Ang matuod nga kalinaw ug kasegurohan moabot gikan lamang sa bugtong tinubdan, si Jehova nga Diyos. Nagbutyag kanato si Miqueas nga si Jehova “maghimo gayod ug paghukom taliwala sa daghang mga katawhan ug maghusay maylabot sa gamhanang mga nasod.” Ang resulta? “Dili sila mobakyaw sa espada, nasod batok sa nasod, ni sila makakat-on pa sa gubat.”—Miq. 4:3.
2 Sanglit kay si Jehova mao ang bugtong tinubdan sa matuod nga kalinaw, ang mga tawo kinahanglang “motungas sa bukid ni Jehova” ug matudloan bahin sa iyang mga dalan aron makasubay sa iyang mga alagianan. (Miq. 4:2) Sila makakat-on nga si Jehova magpatunghag matuod nga kalinaw nganhi niining yutaa pinaagi sa iyang Gingharian. Apan unsaon ta man sa pagbulig sa mas pang mga tawo sa pagkakat-on sa Tinubdan sa matuod nga kalinaw ug kasegurohan?
IPANAGTAG ANG DAANDAANG MGA LIBRO
3 Sa Enero ug Pebrero atong ipang-apod-apod ang daandaang mga libro. Kining tanan nasudlan sa nunot-panahong impormasyon alang niadtong buot “motungas sa bukid ni Jehova.” Usa ka doktor nakadawat ug kopya sa basahong True Peace and Security ug gibutang kana sa librarya nga wala basaha kadto. Sa ulahi ang iyang asawa nahinumdom sa maong libro ug gibasa kadto. Nakombensir siya nga kana ang kamatuoran ug misugod sa pagtuon. Karon siya ug ang iyang bana mga bawtismado na, ug ang ilang mga anak nagasangyaw na. Kini nagapakita sa kabililhon sa pagpahimutang sa atong mga basahon ngadto sa daghang mga balay nga maarangan.
4 Ang atong pangandam alang sa pag-alagad sa kanataran kinahanglang maglakip sa pagsubli sa mga kaundan ug mga kapitulo sa libro nga mosaler sa katawhan. Atong mapili ang tinong mga punto gikan sa maong libro nga gamiton sa mga panaghisgot uban sa mga tagbalay.
5 Pananglitan, ang atong bag-ong Ulohan nga Mahisgotan maoy “Ang Diyos Magpatunghag Kalinaw sa Dili Madugay.” Ang tanang publikasyon nga atong igatanyag nasudlan sa mga puntong igsusulti o mga ilustrasyon nga magamit mo uban niining ulohana. Diha sa basahong Worldwide Security imong magamit ang mga ilustrasyon sa mga panid 172 ug 173. Diha sa librong Matuod nga Kalinaw magamit mo man ang hulagway sa panid 157. Sa Kapitulo 12 sa librong Kamatuoran ug Kapitulo 16 sa basahong Kalipay nasudlan kini sa maayo kaayong mga puntos bahin sa paagi sa Diyos sa pagpatunghag kalinaw. Gamita kinig maayo ug magmapositibo sa pagtanyag sa kinabag-ohang tanyag sa Enero ug Pebrero.
6 Human ikapakita sa tagbalay ang usa ka punto o duha diha sa libro, mahimong mahangyo mo siya kon gusto ba niyang tagdon ang pipila ka punto diha sa sunod pipila ka parapo. Niining paagiha, ang usa ka pagtuon sa Bibliya mahimong masugdan gilayon. Ayaw pagdugay niining okasyona, kondili paghimog mga kahikayan sa pagbalik aron sa pagpadayon sa panaghisgot sa sunod higayon.
7 Ang panahon nagakamubo na alang sa mga tawo sa pagbaton ug kahigayonan sa pagliso ngadto sa tinuod nga Tinubdan sa kalinaw ug kasegurohan. Hinaot nga kita magabuhat kutob sa atong mahimo sa Enero ug Pebrero sa pagmantala sa mensahe sa kalinaw ngadto sa daghang mabuot-kasingkasing nga mga tawo diha sa atong teritoryo sa kongregasyon.