Tabanging Mahigugmaon Kadtong Nagapakitag Interes
1 Sa dihang gitultolan sa manulonda ni Jehova ngadto sa usa ka Etiopiano nga nagpakitag interes sa Pulong sa Diyos, si Felipe mahigugmaong mitabang kaniya sa pagsabot sa iyang gibasa. (Buh. 8:26-39) Gihimo ba nato ang espesyal nga panlimbasog sa pagtabang kanilang nagapakitag interes? Unsay atong mahimo sa pagtabang kanila?
2 Pag-eskedyol ug panahon kada semana sa paghimog mga balikduaw. Ipadayon ang mga puntos nga nahisgotan sa imong unang duaw. Ibutang sa hunahuna ang tumong sa pagsugod ug pagtuon sa Bibliya. Balik nga makanunayon sa pagtanyag sa kinabag-ohang mga gula sa mga magasin. Sa dihang ang interes makaplagan, ikatanyag mo ang suskrisyon.
3 Kon imong nahisgotan ang kahinungdanon sa Bibliya sa imong unang duaw, hayan masugdan nimo ang panaghisgot nga nagagamit sa usa ka sugyot gikan sa panid 82 sa librong “Nangatarongan” (p. 66 sa Ingles) ug moingon:
◼ “Ang pipila mibati nga ang tambag sa Bibliya dili mapuslanon sa atong modernong kalibotan. Unsay imong pagbati bahin niana? [Tugoting motubag.] Dili ka ba mouyon nga ang usa ka basahon nga nagataganag tambag kon unsaon pagbaton sa usa ka malipayong kinabuhing pamilyahanon maoy mapuslanon? [Tugoting mokomento.] Ang mga pamilya nga nagapadapat sa gisulti sa Bibliya maoy malig-on ug malipayon.” Basaha ang Colosas 3:18-21.
4 Ikaw makasugod ug panaghisgot bahin sa kahimtang sa mga patay niining paagiha:
◼ “Unsay imong gihunahunang mahitabo kanato kon kita mamatay? [Tugoting motubag.] Ang kadaghanang relihiyon nagatudlo nga magpadayon tang maglungtad sa pipila ka laing dagway. Daghan ang natingala sa pagkakat-on kon unsa ang giingon sa Bibliya niining bahina. [Basaha ang Ecclesiastes 9:5.] Bisan tuod walay panimuot ang mga patay, sila wala hikalimti. Ang Diyos nagsaad sa pagbanhaw kanila ubos sa iyang Gingharian.” Pakliang Oktubre 15, 1994, nga Bantayanang Torre o ang panid 162 sa librong Mabuhing Walay Kataposan, ug hisgoti ang mga kasulatan ug mga ilustrasyon. Hikayang mobalik aron sugdan ang usa ka pagtuon sa Bibliya.
5 Kon buot nimong mohatag ug dugang saysay bahin sa Kristohanong panglantaw sa panaggubatay sa mga nasod, hayan buot nimong moingon:
◼ “Ang pipila nagatuo nga ang pagpakig-away mao lamang ang paagi sa paghusay sa mga kabingkilan. Unsay imong pagbati bahin niana? [Tugoting motubag.] Ang Bibliya nagapakita nga buot sa Diyos nga ang katawhan magpuyo diha sa kalinaw. [Basaha ang Roma 12:17, 18.] Kana mahimong tinuod sa tibuok-kalibotan ubos sa Gingharian sa Diyos.” Ipunting ang brosyur nga Tinuod Bang May Pagtagad ang Diyos Kanato?, panid 25-6. Itanyag nga mobalik aron paghatag ug dugang saysay sa sunod nga higayon.
6 Ang Etiopianong yunuko midawat sa iyang pagkadilitakos nga makasabot kon walay usa nga motultol kaniya. (Buh. 8:31) Si Felipe mahigugmaong mitabang kaniya. Kita makapakita sa atong gugma sa uban pinaagig pagtabang kanila sa samang paagi.