Mga Balikduaw nga Adunay Katuyoan
1 Sa dihang magahimog balikduaw, sulayi ang paggamit ug usa ka teksto nga makadugang sa kahibalo sa maong tawo sa ulohan sa Bibliya nga inyong nahisgotan sa miagi.
2 Kon imong napahimutang ang artikulong “Usa ka Kalibotan nga Walay Gubat—Kanus-a?” (Ang Bantayanang Torre, Oktubre 1), ikaw makaingon:
◼ “Unsang matanga kaha sa kinabuhi ang maanaa niining kalibotana kon wala na unyay mga gubat? [Tugoting motubag.] Tugoti ko nga ipakita nimo kon unsa ang gisaad sa Diyos nga iyang himoon.” Basaha ang Salmo 37:10, 11. Pahinumdomi ang maong tawo kon unsa ang gitudlo ni Jesus sa iyang mga disipulo nga iampo nga natala sa Mateo 6:9, 10. Tabangi siya nga mangatarongan sa kahulogan sa mga pulong ni Jesus. Itanyag ang suskrisyon sa Ang Bantayanang Torre o Pagmata!, ug maghimog mga kahikayan nga mobalik alang sa dugang panaghisgot.
3 Kon ikaw mibalik alang sa dugang panaghisgot sa artikulong “Nganong Mubo Kaayo ang Kinabuhi?” (Pagmata!, Oktubre 22), ikaw makasugod niining paagiha:
◼ “Sa miagi nakong pagbisita, atong nahisgotan ang bahin sa gitas-on sa kinabuhi sa tawo. Sa walay duhaduha imong namatikdan diha sa mga artikulo sa Pagmata! nga ang mga siyentipiko nagahatag sa gamayng paglaom sa pagtabang kanato nga magkinabuhi nga labaw pa sa 70 ug 80 ka katuigan. Apan unsa ang imong hunahuna bahin sa ginasaad sa Bibliya? [Tugoting motubag.] Ang Bibliya nagapakita nga ang Diyos adunay mas labaw pang gihunahuna alang sa tawo.” Unya basaha ug isaysay ang Juan 17:3. Niining puntoha tingali ikatanyag mo ang pagtuon sa Bibliya sa balay o maghikay sa laing panaghisgot sa Bibliya.
4 Usa sa mga tumong sa paghimog mga balikduaw sa napahimutang nga mga magasin mao ang pagsugod ug rota sa magasin. Ang yanong presentasyon sama niini hayan epektibo:
◼ “Nagalaom ko nga napahimuslan nimo ang artikulo sa Bantayanang Torre nga akong nabilin kanimo nga nagsaysay kon nganong kinahanglang kahadlokan ang Diyos. Karong adlawa nagdala ako ug artikulo sa magasing Pagmata! nga nangutana, ‘Nganong Mubo Kaayo ang Kinabuhi?’ Maayong pangutana kana, di ba?” Ikaw makapadayon sa pag-ingon: “Ang nabantog kaayong mga pulong ni Jesus diha sa Juan 3:16 naghatag ug saad sa kinabuhing walay kataposan.” Unya isaysay nga mobalik ka sa pagdala sa sunod nga mga isyu ug tingali dugang mahisgotan kon unsa ang gisaad sa Diyos alang sa masinugtanong katawhan. Hinumdomi nga sa matag hatod nimo sa mga magasin, ikaw makataho ug usa ka balikduaw.
5 Ang pagsugod ug pagtuon sa Bibliya maoy hinungdanong tumong sa atong ministeryo. Tingali ikaw nakahimog ubay-ubay nga mga duaw sa usa ka tawo kinsa midawat sa mga magasin. Nganong dili sulayan kining paagiha sa sunod nimong pagbisita?:
◼ “Adunay daghan kaayong nagkasumpaking mga pagtuo kon nganong gitugotan sa Diyos ang pagkadaotan o nganong kita matigulang ug mamatay.” Paklia ang usa sa atong mga publikasyon sa pagtuon sa Bibliya sa ulohan nga imong gibating mainteres ang tagbalay, ipasundayag sa mubo kon unsaon pagdumala ang pagtuon.
6 Si Jehova maoy Diyos sa katuyoan. Atong sundogon siya sa Oktubre pinaagi sa paghimog mga balikduaw nga adunay katuyoan.