Palagsika ang Kalamboan Pinaagig Makahuloganong mga Balikduaw
1 Aron mabuligan kadtong nagapakitag interes, maoy hinungdanon nga atong tagan-an sila sa agos sa espirituwal nga pagkaon pinaagig makanunayong mga balikduaw. Ang atong mga duaw mauswagong magabulig sa pagpalagsik sa ilang espirituwal nga kalamboan. (1 Cor. 3:6-9) Aron nga ang atong mga duaw mahimong makahuloganon, hinunoa, kinahanglan nga kita mangandam nga abante sa panahon, nga anaa sa hunahuna ang maong tawo.
2 Pagbalikduaw Niadtong Atong Gikabinlan ug Usa ka Tract: Tingali ang Malinawong Bag-ong Kalibotan nga tract ang napahiluna sa unang duaw.
Human nga marepaso sa mubo ang nahisgotan, kita makasukna:
◼ “Unsa nga kagamhanan ang makapahinabo niining mga kausabana? [Tugoting motubag.] Sa walay duhaduha malipay ka nga magkinabuhi diha sa mga kahimtang nga sama niini. Sa unsang paagi kini mahimo?” Unya tagda ang materyal ubos sa sub-ulohang “Kon sa Unsang Paagi Kini Posible Alang Kanimo.” Kon gipakita ang interes, madala ang pagtagad ngadto sa librong Mabuhing Walay Kataposan, sa Kapitulo 15, “Pagkahimong Sakop sa Kagamhanan sa Diyos.” Mahimong hisgotan nato ang unang duha ka parapo ug unya isukna ang pangutana: “Sa unsang paagi makaapektar kanato ang pagkat-on bahin sa Diyos?” Tubaga ang pangutana ug hikaya nga mapadayon ang panaghisgot sa sunod duaw.
3 Sa dihang nagabalikduaw niadtong atong nabinlan sa brosyur nga “Tinuod Bang May Pagtagad ang Diyos Kanato?”, kita makaingon:
◼ “Sa akong miaging duaw atong nahisgotan ang daghang suliran nga giatubang sa katawhan ug kon unsa ang gisaad sa Diyos nga pagabuhaton bahin niana. Ngano, bisan pa niana, gitugotan sa Diyos ang pag-antos sa dugay na kaayo? Ang tubag makaplagan diha sa bahin 6 sa brosyur nga akong gikabilin kanimo.” Human matagad ang pipila ka parapo, kita makasukna: “Unsa may atong gikinahanglang buhaton aron makakuhag kaayohan gikan sa mga saad sa Diyos?” Ang materyal ubos sa Bahin 11, “Ang Patukoranan sa Bag-ong Kalibotan Ginaporma na Karon,” sa mga panid 28-31, mahimong ikapatugbaw alang sa panaghisgot sa sunod duaw.
4 Pagbalikduaw Niadtong Atong Nabinlan ug mga Magasin: Kon napili nimo ang usa ka tinong artikulo nga nakapainteres sa tagbalay, tagika ang dugang mga puntos diha sa artikulo sa dihang ikaw mobalik, nga magapunting sa usa ka yawing kasulatan ug sa materyal nga nagahisgot niana. Usab, madala ang pagtagad ngadto sa sunod gula sa magasin kon kini nagaunod ug artikulo sa samang ulohan. Kon dili, ikapunting ta ang materyal diha sa librong Mabuhing Walay Kataposan sa maong ulohan ug hikayon nga hisgotan kana sa atong sunod nga duaw.
5 Ang atong pagpakitag personal nga interes pinaagig paghimog makanunayong mga balikduaw magapasundayag sa atong gugma alang kanila ug kang Jehova. (Juan 13:34, 35) Hinaot nga magapadayon kita sa pagpalagsik sa espirituwal nga kalamboan kanilang anaa sa atong teritoryo pinaagig makanunayong paghimo ug makahuloganong mga balikduaw.