Pag-ugmad sa Interes Diha sa mga Balikduaw
1 Ang ministeryo gipakasama sa pagpanguma, ug ang paghimog mga balikduaw gitandi sa pag-ugmad ug pagbisibis. (Mat. 13:23; Luc. 10:2; 2 Cor. 9:10) Ingong “isigkamagbubuhat sa Diyos,” kita may obligasyon sa pagtabang sa bisan unsang bag-ong migitib nga binhi aron motubo sa pagkahamtong ug mahimong mabungahon. (1 Cor. 3:6, 9) Sa unsang paagi mapalampos nato kini sa labing maayo?
2 Magmauntop sa paghimog mga balikduaw. Repasoha ang imong house-to-house record, ug tinoa kon unsa ang mahisgotan, pinasukad sa inyong nahisgotan sa unang duaw. Maayo kanunay ang paggamit sa Bibliya, nga nagaila sa gahom niini sa pag-abot sa kasingkasing.—Heb. 4:12.
3 Kon imong gikabilin ang brosyur nga “Tinuod Bang may Pagtagad ang Diyos Kanato?,” hayan makasugod ka pinaagig pag-ingon nga sama niini:
◼ “Daghang tawo nagatuo nga ang Diyos magalaglag sa yuta, samtang ang uban nahadlok nga ang tawo mismo ang magabuhat niana. Unsay imong hunahuna? [Tugoting motubag.] Ang Bibliya nagatug-an kanato nga inay kay laglagon ang yuta, ang Diyos magahinlo niini sa pagkadilimatarong, nga maghimo niining usa ka dapit sa kalinaw ug kasegurohan.” Paklia ngadto sa panid 22, ug basahang Proverbio 2:21, 22, nga gikutlo diha. Isaysay ang kahikayan sa pagtuon sa Bibliya sa balay.
4 Kon imong napahiluna ang brosyur nga “Tan-awa!,” makaingon ka:
◼ “Sa akong miaging duaw, atong nabasa ang mahitungod sa saad sa Diyos nga himoong bag-o ang tanang butang. Kita ug ang atong mga minahal makatagamtam niining panalangina pinaagig pagkat-on ug dugang bahin sa kabubut-on sa Diyos ug unsaon pagpadapat niana sa atong mga kinabuhi.” Basaha ang Juan 17:3, ug unya paklia ngadto sa mga parapo 52 ug 53 sa panid 27.
5 Sa dihang nagapaloap sa napahimutang nga “Katuyoan sa Kinabuhi” nga brosyur sa usa ka tawo nga mahiligon sa relihiyon, makaplagan nimong tukma ang pag-ingon:
◼ “Malagmit nasubli na nimo sa daghang higayon ang pag-ampo sa Ginoo. Unsay mosantop sa imong hunahuna sa dihang ikaw magahangyo nga moanhi ang Gingharian sa Diyos?” Human sa tubag sa tagbalay, ipunting ngadto sa mga parapo 8 ug 9 sa panid 26, ug unya basaha ang Daniel 2:44. Isaysay nga ang pag-anhi sa Gingharian sa Diyos magakahulogan sa pagtapos sa pagkadaotan ug pag-antos.
6 Hinumdomi nga ang usa ka balikduaw mahimo kang bisan kinsa nga andam magpatalinghog, bisan kon napahiluna man o wala ang basahon. Sulayi ang pag-eskedyol ug pipila ka panahon sa paghimog mga balikduaw matag semana. Hinaot si Jehova magapanalangin sa imong makugihong panikaysikay nga magmabungahon ngadto sa iyang kadayegan.—Juan 15:8.