Himoang mga Balikduaw Alang sa Mabungahong Ministeryo
1 Si apostol Pablo midayeg sa mga taga-Filipos tungod kay ilang ‘napabalik ang ilang paghunahuna alang kaniya.’ (Filip. 4:10) Kon atong ipadapat ang ilang panig-ingnan diha sa ministeryo sa kanataran, atong ‘mapabalik ang atong panghunahuna’ alang niadtong atong gisangyawan ug mapalihok sa paghimog mga balikduaw.
2 Kon imong napahimutang ang brosyur nga “Ang Kagamhanang Mopatunghag Paraiso,” makaingon ka ug sama niini:
◼ “Akong gihunahuna ang atong nahisgotan sa miaging adlaw. Mahinumdoman nimo nga atong nahisgotan ang bahin sa pagpuli sa Diyos sa pagkamagmamando sa yuta. Sa Bibliya, si Jehova nga Diyos nagsaad nga kini mahitabo. [Basaha ang Daniel 2:44.] Motuo ka ba nga mahitabo gayod kana? [Tugoting motubag.] Paminawa kon unsay giingon sa Diyos bahin sa pagtuman sa iyang mga saad. [Basahang Isaias 55:11.] Apan kanus-a man tumanon sa Diyos ang iyang mga saad?” Isaysay nga imong tubagon kanang pangutanaha sa imong sunod nga duaw.
3 Mahimong gamiton nimo kining paagiha sa dihang ikaw nagahimog balikduaw sa usa ka tawo nga mikuha sa brosyur nga “Sa Dihang ang Imong Minahal Mamatay”:
◼ “Gihimo nako ang linaing paningkamot aron makabalik, tungod sa atong panaghisgot bahin sa pagkanawad-an sa usa diha sa kamatayon.” Ipakita ang ilustrasyon sa panid 30 samtang ikaw moingon: “Nahinumdoman nimo kining malipayong talan-awon sa katawhan nga gibanhaw ug nahiusa pag-usab sa ilang mga minahal? Ako nangutana kanimo kon diin kini mahitabo, sa langit ba o sa yuta. Tingali imong nakaplagan ang tubag sa Bibliya sa panid 26 niining maong brosyur.” Hisgoti ang pangunang mga puntos diha sa ikatulo ngadto sa ikalimang mga parapo, ug basaha ang Juan 5:21, 28, 29.
4 Nakasugod ka ba ug pagtuon diha sa “Tan-awa! Ginabag-o Ko ang Tanang Butang”? Sa pagbalikduaw, ikaw makahimo niini:
◼ Ipunting gihapon sa panid 30, ug ipunting ngadto sa pangutanang: “Sa unsang mga paagi ang Bibliya talagsaon?” Paklia ngadto sa mga panid 3 ug 4, ug repasoha ang mga parapo 1-4 maingon man ang ilustrasyon diha sa hapin. Basaha ang usa o duha ka kasulatan nga gisitar diha sa potnot sa parapo 4. Isaysay nga ang Bibliya mao lamang ang basahon nga nagatanyag nianang kahibulongang paglaom. Hikaya ang imong sunod nga duaw.
5 Mahimong ikapadayon nimo ang panaghisgot diha sa “Ang Balaang Ngalan nga Magapadayon sa Walay Kataposan” niining paagiha:
◼ “Sa miagi, akong gipakita kanimo ang ngalan sa Diyos diha sa Bibliya. Ang pagkaila ug paggamit sa ngalang Jehova hinungdanong bahin sa atong pagsimba.” Paklia ngadto sa panid 31, repasoha ang mga puntos sa kataposang upat ka parapo, ug basaha ang Juan 17:3 ug Miqueas 4:5. Isaysay ang atong programa sa pagtuon sa Bibliya.
6 Busa, pabalika ang imong panghunahuna alang niadtong imong nakaestorya. Magmapinadayonon sa imong pagbalik, ug pangandam ug usa ka butang nga mapuslanong ipaambit. Mahimong ikaw usa “kinsa sa pagkatinuod nagapamunga” diha sa paghimog bag-ong mga tinun-an.—Mat. 13:23.