Ipakita ang Tinuod nga Kabalaka sa Tanang Interes nga Nakaplagan
1 Kadtong anaa sa organisasyon ni Jehova nagabuhat nga may pagbati sa pagkadinalian. Ang tibuok-yutang pagmantala sa Gingharian matapos sa dili madugay, nga human niana kadtong tanang “wala makaila sa Diyos” pagalaglagon. (2 Tes. 1:7-9) Busa, ang tiunay nga kabalaka alang sa mga kinabuhi sa uban nagtukmod sa katawhan ni Jehova nga abton ang daghan kutob sa mahimo uban ang mensahe sa Gingharian.—Sof. 2:3.
2 Matag bulan, minilyong oras ang gigugol sa pagpangita niadtong kinsa buot mamati sa “maayong balita sa butang nga mas maayo.” (Isa. 52:7) Sa pagsanong sa karong tanyag nga literatura, daghang indibiduwal ang midawat sa Ang Bantayanang Torre ug Pagmata! o sa brosyur nga Unsay Gikinahanglan sa Diyos Kanato? Ang tinuod nga kabalaka alang niining mga tawhana angayng magtukmod kanato nga ipadayon ang pag-ugmad sa tanang interes nga nakaplagan.—Prov. 3:27.
3 Hupti ang Tukmang mga Rekord: Daghan ang mahimo pinaagig paghupot sa kompleto ug tukmang rekord sa nakaplagang interes. Ang impormasyon sama sa ngalan ug adres sa tagbalay, adlaw ug oras nga ikaw miduaw, literatura nga napahimutang, ug ang topiko nga gihisgotan makatabang kanimo nga mas epektibo inigbalik. Lain pa, kon imong isulat ang pipila ka mga komento nga gipahayag sa tagbalay sa imong unang pakighisgot, ikaw mahimong makapunting niini samtang imong ipadayon ang panaghisgot sa sunod nga pagduaw.
4 Himoa Dayon ang mga Pagbalikduaw: Pila niadtong midawat ug literatura gikan kanimo sa miaging bulan ang imong naduaw pag-usab? Milabay ba ang mga semana nga walay bisan unsang dugang pagduaw? Ang tinuod nga kabalaka alang sa ilang kaayohan angayng magpalihok kanimo sa pagbalik nga mas sayo kutob sa mahimo, labing maayo sulod sa pipila ka adlaw, aron nga ang panaghisgot lab-as pa sa hunahuna. Pinaagi sa pagduaw dayon, lagmit imong masanta ang mga paningkamot ni Satanas sa dili pa siya ‘moabot ug kuhaon ang pulong nga napugas diha kanila.’—Mar. 4:15.
5 Pagpanganbam Hinungbanon: Ang imong pagkaepektibo sa paghimog mga pagbalikduaw nagdepende kon giunsa nimo pagpangandam. Ang panid sa likod sa Abril 1997 nga Atong Ministeryo sa Gingharian nagtaganag ubay-ubayng presentasyon nga mahimong magamit sa dihang imong itanyag ang mga magasin o ang brosyur nga Gikinahanglan. Ang sunod himoon mao ang pagbatog pipila ka punto sa hunahuna nga ipaambit sa dihang ikaw mobalik. Unsay ikaingon aron paloapon ang interes? Sa unsang paagi masugdan ang pagtuon sa Bibliya? Buot tingali nimong sulayan kining mga sugyota.
6 Sa pagpadayon sa panaghisgot kon unsang mga panginahanglan ang angayng himoon aron hinloan ang yuta ug himoon kining usa ka paraiso, ikaw makaingon:
◼ “Sa akong miaging pagduaw, nagkauyon kita nga ang kusganong mga tikang kinahanglang himoon una pa ang yuta mahimong usa ka malinawong paraiso. Sa imong hunahuna ang mga tawo may katakos ba sa paghimo niini? [Tugoting motubag.] Palihog matikdi kon nganong kinahanglang mangilabot ang Diyos sa mga kalihokan sa tawo.” Basaha ang Salmo 37:38. Dayon paklia ang leksiyon 5 sa Gikinahanglan nga brosyur, ug gamita ang piniling mga bahin sa mga parapo 4-5 aron ipakita kon unsaon pagtuman sa Diyos kining tagnaa. Padayon pinaagig pagtanyag ug pagtuon sa Bibliya ginamit ang brosyur.
7 Kon imong nahisgotan ang Gingharian sa Diyos ug napahiluna ang “Gikinahanglan” nga brosyur sa unang pagduaw, sa pagbalik ikaw makaingon niini:
◼ “Sa miagi natong panaghisgot, atong nailhan ang Gingharian sa Diyos ingong usa ka tinuod nga kagamhanan nga magmando sa tibuok yuta. Ang Bibliya nagpakita nga si Kristo Jesus mao ang magmamando niini. Nasabtan ba nimo ang bisan unsang mga kaayohan sa pagpakabaton niining matanga sa kagamhanan ug pangulo?” Tugoting motubag. Paklia ang Gikinahanglan nga brosyur sa leksiyon 6. Ginamit ang mga punto sa mga parapo 6-7 ug ang ilustrasyon sa panid 13, ipakita kon unsay himoon sa Gingharian sa Diyos alang sa katawhan. Basaha ang Daniel 2:44, ug kon tukma, ipaila ang Kahibalo nga libro ug itanyag ang pagtuon sa Bibliya.
8 Kon nakakaplag kag usa nga miuyon nga ang mga relihiyon sa kalibotan nagpahinabog mga suliran sa katawhan, ikaw makasukna niini sa pagbalikduaw:
◼ “Nahibulong ka ba kon unsaon nato pagkasayod kon haing relihiyona ang giuyonan sa Diyos? [Tugoting motubag.] Kining brosyur nga Unsay Gikinahanglan sa Diyos Kanato? magtaganag mga timailhan sa tinuod nga relihiyon.” Paklia ang leksiyon 13, ug ipasiugda ang lima ka giitaliko nga mga punto sa mga parapo 3-7. Makapadayon ka sa pag-ingon: “Dugang pa sa pagkakaplag sa tinuod nga relihiyon, kinahanglang susihon nato kon unsay gikinahanglan sa Diyos kanato ingong indibiduwal.” Basaha ang Juan 4:23, 24. Tanyagi nga hisgotan kini sa dugang. Paklia ang leksiyon 1 sa brosyur, ug ipasundayag kon unsaon nato pagtuon.
9 Sa dihang mobalik ka aron ipadayon ang panaghisgot bahin sa kalipay sa pamilya, makasulti kag ingon niini:
◼ “Sa atong unang panagkita, atong nahisgotan ang sekreto sa kalipay sa pamilya, nga mao ang pagpadapat sa tambag nga makaplagan sa Bibliya. Sa pagpunting sa mga panginahanglan sa modernong pamilya, nagtuo ka ba nga ang Bibliya kinaraan o tukma sa panahon?” Tugoting motubag. Ipresentar ang Kahibalo nga libro. Paklia sa kapitulo 2, ug basaha ang pangutlo sa parapo 13. Ginamit ang mga punto sa parapo 3, itanyag ang pagtuon sa Bibliya sa pamilya.
10 Ang Gikinahanglan nga brosyur napamatud-ang usa ka maayong tabang sa pag-abag sa uban nga makakat-on sa mga kinahanglanon sa Diyos. Ang kamubo ug katin-aw sa mensahe niini, ug ang makapadaning disenyo niini makapasayon sa pagsugod ug mga pagtuon. Sa labing daling maarangan, depende sa interes ug katakos sa estudyante, ang pagtuon ikabalhin ngadto sa Kahibalo nga libro.
11 Tugoting pahimuslan ta ang matag kahigayonan sa pagpakitag tinuod nga kabalaka sa tanang interesado sa atong teritoryo. Pinaagig paghupot ug tukmang mga rekord, pagpangandam pag-ayo, ug pagbalik dayon ikapakita nato ang gugma sa silingan nga makapadani kanila sa kamatuoran.—Mat. 22:39; Gal. 6:10.