Ugmara ang Interes sa Gingharian sa Diyos sa Kalinaw
1 Sa bulan sa Pebrero, atong igapaila ang librong Ikaw Mabuhing Walay Kataposan sa Paraiso sa Yuta. Ang atong tumong mao gayod ang pagtabang sa mabuot-kasingkasing nga mga tawo sa pag-ugmad ug pagpabili alang sa Gingharian sa Diyos ug kon unsay palamposon niini. Ang punto de bistang mga pangutana makatabang kanato niining tumonga.
2 Human sa mahigalaong pagtimbaya, makaingon kita ug susama niini:
◼ “Ang makapakurat nga mga kausaban sa kagamhanan nagakahitabo sa tibuok yuta, ug ang tumong sa kalinaw sagad ginahisgotan. Gibati ba nimo nga ang tinuod nga kalinaw mabatonan gayod? [Tugoting motubag.] Bisan pag daghan ang nagalantaw sa tawhanong mga magmamando sa pagpahinabog kalinaw, matikdi kon sa unsang paagi ang Diyos nagasaad sa pagpahinabog kalinaw sa Salmo 46:9. [Basaha.] Unsang mga kausabana ang imong gihunahunang mahitabo sa buhaton sa Diyos? [Paminawa ang tubag sa tagbalay, unya ipakita ang tract nga Kinabuhi sa Malinawong Bag-ong Kalibotan.] Mahanduraw ba nimo kon unsa ang gihulagway dinhi?” Tagda ang impormasyon ubos sa sub-ulohang “Kinabuhi sa Bag-ong Kalibotan sa Diyos.” Unya makapangutana kita: “Gihunahuna ba nimo nga ang usa ka kagamhanan sa Diyos magpahinabo niining tanang kausaban?” Paklia ang Kapitulo 13 sa librong Mabuhing Walay Kataposan ug hisgoti ang unang duha ka parapo. Itanyag ang libro ug hikaya ang usa ka balikduaw.
3 O makaingon kita:
◼ “Adunay tumang kabalaka mahitungod sa mga suliran nga kinahanglan atubangon natong tanan sa matag adlaw. Gibati ba nimong adunay bisan unsang paglaom alang sa kahupayan gikan niining mga sulirana? [Tugoting motubag.] Ang pipila mahimong mobati nga ang Diyos walay pagtagad sa atong malisod nga kahimtang. Matikdi, hinunoa, kon unsa ang iyang gisaad sa Pinadayag 21:3, 4.” Basaha ang mga bersekulo. Niining puntoha ang librong Mabuhing Walay Kataposan, usa ka kinabag-ohang magasin, o ang tract nga Kini Bang Kalibotana Molungtad? mahimong ikapaila. Kon ang tract ang gitanyag, mahimong matagad ang materyal sa mga panid 2 ug 3 ubos sa ulohang “Ang Kaugmaon Niining Kalibotana.” Kon gipakita ang interes, ikatanyag nimo ang librong Mabuhing Walay Kataposan. Kon imong gitanyag ang brosyur nga Tinuod Bang May Pagtagad ang Diyos Kanato?, ang pangutana mahimong ipatungha: “Nganong gitugotan sa Diyos ang pag-antos?” Ipunting ang bahin 6 diha sa brosyur, ug hikaya ang paghisgot niini sa sunod duaw.
4 Hayan pilion nimo nga ikapaila ang usa ka artikulo gikan sa usa sa atong kinabag-ohang mga magasin pinaagig pagkomento sa usa ka tinong punto diha sa usa ka piniling artikulo.
Kon ang tagbalay nagapahayag ug interes, ipaila ang magasin, tingali pinaagig pag-ingon:
◼ “Kining artikuloha nagabatbat ug dugang pang detalye sa ulohan. [Basaha ang usa o duha ka gipili nang daan nga tudling-pulong.] Ang artikulo nagahisgot ug dugang mga puntos nga mapamatud-ang makapadasig kanimo ug sa imong pamilya. Sanglit kay maorag interesado ka man niining ulohana, malipay kami nga ibilin kanimo kining gulaa ug ang kaubang magasin niini.”
5 Ang mga tawo karon sagad nalibog kon asa moliso alang sa mga tubag sa mga suliran nga giatubang sa katawhan. Anaa kanato ang pribilehiyo sa pagpakig-ambit kanila sa tin-aw nga paglaom alang sa umaabot. (Buh. 17:27) Nan, hinaot nga kita, makugihong magatultol sa pagtagad sa katawhan ngadto sa Gingharian sa Diyos, ang matuod nga tinubdan sa kalinaw.