Balik nga Malipayon sa Pag-abag sa mga Interesado
1 Ang matag usa nga nagapakig-ambit sa balaybalay nga buluhaton nagatinguha sa pag-abag sa mga tawong interesado. Pinaagig paghatag nianang maong pag-abag, atong masinatian ang halalom nga kalipay ug katagbawan. (Itanding Salmo 126:5, 6.) Kini nagakinahanglan nga kita magmaandam.
2 Ang pagpangandam magasugod sa paghupot ug detalyadong impormasyon diha sa atong house-to-house record. Matikdi ang ulohang nahisgotan sa unang duaw ug ang sanong sa tagbalay. Mahimo ganing gusto nimong maghimog nota kon unsaon nimo pagsugod sa panaghisgot sa dihang ikaw mobalik.
3 Pananglitan, kon imong gihisgotan ang Amahan Namo nga pag-ampo sa sinugdan ug unya nakapahilunag librong “Mabuhing Walay Kataposan,” makasulti kag mubo nga susama niini:
◼ “Sa miagi nakong duaw, atong nahisgotan kon sa unsang paagi ang kabubut-on sa Diyos pagatumanon dinhi sa yuta ug nga ang kalinaw mabatonan sa tanang bahin sa kinabuhi. Diha sa librong akong gikabilin, palihog matikdi kon unsay giingon sa mga panid 156 ngadto sa 158 bahin sa ubang mga panalangin nga ipahinabo sa Gingharian sa Diyos sa katawhan.”
4 Kon ang tawo nahilig sa pagkawalay pagtuo sa Diyos, sulti ug susama niini:
◼ “Sa akong pagduaw sa miagi, atong gihisgotan ang punto nga gihimo ni Pablo sa Hebreohanon 3:4, nga nagahatag ug lohikal nga mga katarongan sa paghinapos nga aduna gayoy usa ka intelihenteng Maglalalang sa tanang butang.” Basahang kasulatan pag-usab ug ipunting ngadto sa panid 35, parapo 3 sa librong Mabuhing Walay Kataposan. Isukna ang pangutana sa ubos ug dayon basaha ang parapo, nga nagatugot sa tagbalay sa pagtubag sa pangutana. Dapita siya sa pagkuha sa iyang libro ug duyog nga tagda ang sunod nga pipila ka parapo.
5 Kining samang paagi magamit uban sa usa ka artikulo nga mahimong gihisgotan mo diha sa Ang Bantayanang Torre o Pagmata! Hisgoti ang artikulo nga napatugbaw sa imong unang duaw ug dayon hisgoti ang laing punto nga makapainteres diha sa samang artikulo o usa sa laing gula nga anaa kanimo. Kon posible, duyog nga basaha ang usa ka kasulatan, ug pangayoang mga komento sa tagbalay.
6 Hupti sa hunahuna ang imong tumong sa pagsugod ug usa ka pagtuon sa Bibliya. Kasagaran nagakinahanglag ubay-ubay nga mga duaw aron ugmaron ang interes ngadto nianang gilapdona. Ipakita ang imong personal nga kabalaka pinaagig pagbalik sa labing sayong maarangan.
7 Ang maayong balita nga atong ginawali nagapahinabog dakong kalipay. (Luc. 2:10) Sa dihang ang interesadong mga tawo mosanong sa atong mga panlimbasog, kini mao gayoy hinungdan sa pagmaya. (Filip. 4:1) Anihon ta ang maong kalipay pinaagig pagbalik aron pag-abag sa mga interesado nga atong makaplagan sa kanataran.