Ikaw ba Nagapangatarongan Gikan sa Kasulatan?
1 Ang usa ka eksperyensiyadong sundalo nga moadto sa gubat bug-os gayod nga armado. Ang usa ka hanas nga mamumuo nga nagaandam sa pagtrabaho sa usa ka proyekto sa pagtukod magdala sa mga himan nga iyang gikinahanglan sa pagkompleto sa gimbuhaton. Ang usa ka alagad ni Jehova nga nagapakig-ambit sa ministeryo sa kanataran may “espada” sa iyang kamot ug maggamit niini nga mahanason. (Efe. 6:17) Matuod ba kini kanimo sa personal? Gitugotan ba nimong mosulti ang Pulong sa Diyos aron ang balaang espiritu makatandog sa mga kasingkasing sa imong mga mamiminaw?—Prov. 8:1, 6.
2 Ang pagsangyaw dili kanunayng sayon. Silang atong ikahibalag sagad maoy puliki, nga nagahatag ug diyutayng kahigayonan alang sa mga panaghisgot sa Bibliya. Sanglit ang Bibliya man ang atong pangunang basahon-tun-anan, sa unsang paagi labaw pa natong magamit kini sa pag-alagad?
3 Sa Tanang Kahigayonan: Sa matag pultahan, buot gayod natong gamiton ang Bibliya sa pagpalihok sa tagbalay. Kinahanglang magmaandam ta sa pagbuhat niini bisag unsang basahon ang ginatanyag. Kon ang tawo puliki ug walay panahon sa pagpakli sa Bibliya, makakutlo ka bag usa ka kasulatan una pa motanyag ug basahon? Kana lamang mahimong makapahunong sa tagbalay ug maminaw.—Heb. 4:12.
4 Pananglitan, kon ikaw nagapaila sa Disyembre 8, 1993, nga Pagmata! bahin sa “Usa ka Kalibotan nga Walay Sakit,” humang mapunting ang ilustrasyon diha sa hapin, ipatungha ang pangutana, “Nagatuo ka bang aduna unyay pagkatapos sa balatian, sa dihang ang tanan magapahimulos ug maayong panglawas?” Bisan unsa man ang sanong, mabasa o mabatbat mo ang usa ka kasulatan, sama sa Isaias 33:24 o Pinadayag 21:4. Niining paagiha gitugotan mo ang Pulong sa Diyos nga maoy magasulti.
5 Diha sa mga Balikduaw: Kinahanglang mangandam ta una pa maghimog mga balikduaw. Sagad, hinunoa, ang mga ulohang wala nato mapangandami motungha. Mao kini ang panahon nga ang Nangatarongan Pinasukad sa Kasulatan mahimong usa ka bililhong himan. Ang atong pagkutlo o pagbasa sa mga kasulatan gikan sa librong Nangatarongan magabulig sa mga tawo sa pagsabot nga kita mga ministro sa Diyos ug dili mga tigbaligya sa Pulong.—2 Cor. 2:17.
6 Sa dihang magabalikduaw nga walay espesipikong ulohan ang nahisgotan na, mapakli mo ang librong Nangatarongan ngadto sa tukmang ulohan, sama sa “Jesu-Kristo,” “Kataposang mga Adlaw,” o “Pagkabanhaw,” ug gamiton ang usa sa mga sub-ulohan sa pagsugod sa panaghisgot. Ang mga tagbalay madapit sa pagbasa sa pipila ka kasulatan gikan sa ilang kaugalingong Bibliya. Nianang paagiha ang Bibliya mahimong buhi kanila, ug ang balaang espiritu ni Jehova moagos kon sila mahilig sa pagkamatarong.
7 Ang atong kaakohan sa pagwali sa maayong balita ug pagpasidaan sa daotan maoy usa ka seryosong butang. Kana maoy mensahe ni Jehova, dili atoa. Pasagding ang iyang Pulong, ang espada sa espiritu, magabulig kanimo.