Nagatabang sa Uban sa Pag-ila sa Dakong Bahandi

¹ Sa dihang iwali nato ang maayong balita sa Gingharian, usa sa atong mga tumong mao ang pagtabang sa katawhan nga moapresyar sa bili sa Pulong sa Diyos. (Filip. 3:8) Ang atong literatura nagadulag mahinungdanong bahin sa pagpakaylap sa mensahe sa Gingharian. Pananglitan, ang librong Mabuhing Walay Kataposan nakatabang na sa gatosan ka libong tawo sa pag-alagad kang Jehova ingong resulta sa mga kamatuorang ilang nakat-onan.

² Ang atong ministeryo nagalangkit ug labaw pa kay sa yanong pagbilin ug literatura sa mga tawo. Kinahanglan natong ipaila ang mensahe diha sa makapadaning paagi, maminaw uban ang pagsabot kon unsa ang giingon sa tagbalay, ug dayon magmaandam sa ‘pagpangatarongan uban kaniya gikan sa mga Kasulatan.’​—Buh. 17:2.

³ Unsaon Kini Paghimo? Ang atong mga pasiuna makabukas sa dalan alang sa mga tagbalay sa pagpakita kon sila ba tinuod gayod nga interesado sa Bibliya ug mensahe niini.

Makaingon ka:

◼ “Kami nagaduaw aron paghisgot sa kahulogan sa nagakahitabo karon sa kalibotan. Taliwala sa daghang tawo adunay menos nga interes sa Diyos ug sa iyang mga sukdanan sa pagkinabuhi ingon sa gipahiluna sa Bibliya. Kini nakaimpluwensiya ug dako sa tinamdan sa mga tawo ngadto sa usag usa. Namatikdan ba nimo kini? [Tugoting mokomento. Ikapunting mo ang espesipikong mga hitabo.] Palihog matikdi ang tinamdan niadtong gihisgotan sa 2 Timoteo 3:1-5, ug sultihi ko kon imong gihunahunang nahisama niini ang kalibotan karon. [Basaha; tugoting mokomento.] Aduna bay maayong katarongan sa pagdahom ug mas maayong mga kahimtang sa umaabot?” Itumong ngadto sa hulagway sa mga panid 12 ug 13 sa librong Mabuhing Walay Kataposan ug idiretsong pagtagad ngadto sa mga parapo 12 ug 13. Itanyag ang libro.

⁴ Kon usa ka ginikanan ang moatubang sa pultahan, masugdan nato ang atong panaghisgot niining paagiha:

◼ “Kami nagapakigsulti sa mga tawong interesado kon sa unsang paagi mas maayo natong masagubang ang mga suliran sa kinabuhing pamilyahanon. Kitang tanan misulay sa pagbuhat sa labing maayo nga atong maarangan, apan kon adunay makatabang kanato aron makabaton ug mas dakong kalamposan, interesado kita, dili ba? [Tugoting motubag.] Ang Bibliya nagahatag ug direksiyon niining bahina ingon sa makaplagan sa Colosas 3:12-14. [Basaha.] Busa, unsay gikinahanglan aron matagamtam ang malamposong kinabuhing pamilyahanon? Matikdi kon unsa ang gipahayag niining basahona sa kapitulo nga nag-ulohag ‘Pagpalampos sa Kinabuhi sa Pamilya.’” Basahang parapo 3 sa panid 238 sa librong Mabuhing Walay Kataposan. Kon ang tagbalay puliki o dili daling mosanong, sulayi ang pagtanyag sa kinabag-ohang magasin nga nagahisgot sa pamilyahanong mga butang o ang tract nga Magkalipay sa Kinabuhing Pamilyahanon.

⁵ Dili gayod nato buot nga mapasimang sa atong katuyoan sa paghatag ug bug-os nga pamatuod bahin sa Gingharian. (Mat. 24:14) Pinaagig maayong paggamit sa Bibliya ug sa kahibulongang bahandi sa teokratikanhong literatura nga mabatonan nato, makasalig kitang motutok kang Jehova alang sa iyang panalangin sa pagpalampos sa iyang kabubut-on sulod niining mahinungdanong mga panahon.​—Gal. 6:9.