Ang Basahong Nagataganag Matuod nga Giya
1 Ang kalibotan nausab sa madulaong paagi sulod niining sigloha. Bisan pag adunay mga pag-uswag sa komunikasyon, medisina, ug transportasyon, ang kalidad sa kinabuhing pamilyahanon kanunayng nagaus-os. Minilyon ang nagiyahan sa mabalhinong mga pilosopiya sa tawo.
2 Niining mabalhinong kalibotan, ang katawhan ni Jehova nakabenepisyo ug dako pinaagig pagtapot sa iyang Pulong. Ang Bibliya wala mausab sulod sa linibo ka katuigan, ug ang tambag niini mao gihapon ang labing mapuslanon alang sa pagsagubang sa mga suliran nga atong giatubang karong adlawa. Unsaon man nato pagtabang ang uban sa pag-apresyar nga kini nagataganag matuod nga giya sa atong modernong adlaw?
3 Kon gikabilin mo ang tract nga “Kon Nganong Ikaw Makasalig sa Bibliya” sa unang duaw, makabalik ka ug moingon:
◼ “Sanglit ang Bibliya nagaingon nga kini maoy mensahe gikan sa Diyos ug nga siya nagatanyag kanatog kinabuhing walay kataposan kon kita magakinabuhi pinaagi niini, gibati ba nimong angay ang pagsusi pa ug dugang bahin niini? [Tugoting mokomento.] Matikdi kon unsa ang gitagna sa Bibliya mahitungod niining kalibotana. [Basahang 2 Timoteo 3:1-5 nga gikan mismo sa panid 5 sa tract.] Gihunahuna ba nimong kini haom sa kalibotan karon? [Tugoting mokomento.] Aduna bay maayong katarongan sa pagdahom ug mas maayong mga kahimtang sa umaabot?” Mahimo dayon nimong mahisgotan ang kataposang duha ka parapo sa tract o panid 161 sa librong Ang Bibliya—Pulong sa Diyos o sa Tawo?, aron pagpatugbaw sa paglaom nga gitanyag sa Bibliya alang sa katawhan.
4 Kon ang tagbalay interesado sa mapuslanong bili sa Bibliya ug imong gipunting ang mga panig-ingnan diha sa kapitulo 12 sa “Ang Bibliya—Pulong sa Diyos o sa Tawo?,” makaingon ka:
◼ “Kita interesado sa mga butang nga mapuslanon karong adlawa, dili ba? Mouyon ka ba nga ang pagtapos sa gubat mapuslanon? [Tugoting mokomento.] Kon ang katawhan nakakat-on sa pagpuyo sa kalinaw, kini maayo nga pagsugod, dili ba no? [Tugoting mokomento.] Ang Bibliya tukmang nagtagna niana. [Basahang Isaias 2:2, 3.] Nahibulong ka ba gayod kon sa unsang paagi ug kanus-a kini mahitabo?” Ipatin-aw nga buot mong makighisgot ug dugang niining pangutanaha sa sunod higayon nga ikaw moduaw.
5 Kon imong gikabilin ang “New World Translation,” makaingon ka:
◼ “Sa pagbasa sa Bibliya nga akong gibilin kanimo, malagmit namatikdan nimo nga kini nagagamit sa personal nga ngalan sa Diyos sa kinatibuk-an. Kini maoy mahinungdanong pag-uswag kay sa daghang ubang mga hubad sa Bibliya. Bisan pag ang pipila ka tawo nagaukon-ukon sa paggamit sa ngalang Jehova, kinahanglang huptan ta sa hunahuna nga iyang gibutyag ang iyang ngalan dugay na kanhi ug nagdasig sa iyang mga alagad sa paggamit niini sa pagpaila kaniya ingong ang matuod ug buhing Diyos. Matikdi kon unsa ang gisulat sa salmista sa Salmo 83:18.” Basaha ang kasulatan, ug tugoti ang tagbalay sa pagkomento. Segon sa gipadayag nga interes, magamit mo ang dugang impormasyon nga makaplagan ubos sa ulohang “Jehova,” sugod sa panid 212 sa librong Nangatarongan (p. 191 sa Ingles).
6 Ang Bibliya lamang ang nagataganag giya nga gikinahanglan sa tawo. (Jer. 10:23) Busa, sa pagkamainiton dapiton nato ang uban nga makapahimulos gikan sa maalamong tambag ug mapuslanong pahimangno niini.