Ang Kabililhon sa Bibliya Diha sa Kalibotan Karong mga Adlawa
1 Daghan karon ang nagaisip sa Bibliya ingong daan na ug di-reyalistiko. Samtang kini mao ang labing kaylap nga naapod-apod nga basahon sa tibuok kasaysayan, diyutay ra ang nagabasa niini ug mas diyutay pa ang nagasunod sa pagtultol niini.
2 Sa kasukwahi, atong gipabilhan ang Bibliya ingong ang Pulong sa Diyos. Ang mga kamatuoran nagapakita nga kini sa kasaysayanhon tukma. Dugang pa, ang talagsaong pagkaharmoniya niini, mga tagna niini, ug ang kusganong nagatukmod nga puwersa niini diha sa mga kinabuhi sa katawhan ang tanan nagapasundayag nga ang Bibliya maoy “inspirado sa Diyos.” (2 Tim. 3:16) Ang atong apresasyon alang niini angayng magtukmod kanato sa pagdasig sa uban nga mosusi sa matuod nga bili niini.
3 Ang usa ka paagi mahimong ingon niini:
◼ “Tungod sa seryosong mga suliran nga nagaatubang sa katawhan, daghang tawo ang nalisdan sa pagtuo sa Diyos, o ilang gikaduhaduhaan ang katakos sa Diyos sa pagsulbad sa mga suliran nga atong giatubang. Unsay imong pagbati bahin niana? [Tugoting motubag.] Matikdi ang ulohan niini nga tract, Kon Nganong Ikaw Makasalig sa Bibliya.” Basaha ang una ug ikaduhang mga parapo sa panid 2. Kon magapasundayag ug interes ang tagbalay, mabasa mo ug mahisgotan ang mga kasulatan nga gisitar diha sa ikaduhang parapo. Unya ikatanyag mo ang librong Ang Bibliya—Pulong sa Diyos o sa Tawo? uban sa New World Translation, nga nagapakita kon sa unsang paagi kini nagalig-on sa pagsalig diha sa Pulong sa Diyos.
4 Ang laing paagi mahimong susama niini:
◼ “Mouyon ka ba nga ang katawhan nagakinahanglag pagtultol sa pag-atubang sa mga suliran sa kinabuhi? [Tugoting motubag.] Sa nangagi, ang mga tawo sagad midangop sa Bibliya alang sa paggiya, apan ang mga panahon nausab. Gihunahuna ba nimong ang Bibliya may mapuslanong bili karong adlawa? [Tugoting motubag.] Matikdi kon unsa ang giingon sa 2 Timoteo 3:16. [Basaha.] Ang sinulat nga Pulong sa Diyos dili lamang kay nagatabang kanato sa paghimog maalamong mga desisyon apan nagatagana usab ug kasaligang paglaom alang sa umaabot.” Basahang Juan 17:3. Kon ang tagbalay mosanong nga mauyonon, ipunting ang usa o duha ka espesipikong mga puntos nga imong gipili gikan sa Kapitulo 12 sa librong Ang Bibliya—Pulong sa Diyos o sa Tawo? sa pag-ilustrar sa mapuslanong bili sa Bibliya.
5 Makaplagan mong mapuslanon sa paggamit sa pipila ka pasiuna nga gilaraw sa panid 10 sa librong Nangatarongan ubos sa sub-ulohang “Bibliya/Diyos.” Ang dugang impormasyon gipresentar diha sa mga panid 74-84 (p. 58-68 sa Ingles) nga mapuslanon sa pagtubag sa mga pangutana sa tagbalay o sa pagbuntog sa ilang mga pagsupak.
6 Pagtanyag sa New World Translation: Mahimong ikasukna mo kon ang tagbalay may kopya ba sa Bibliya ug kon nakaplagan niya kining sayon nga basahon. Depende sa tubag, hisgoting pipila ka mapuslanong mga bahin sa New World Translation. Mahimong ikapatugbaw mo ang usa o duha ka punto gikan sa mga panid 265-69 sa librong Nangatarongan (p. 276-80 sa Ingles).
7 Magmaalisto sa pagdasig sa katawhan sa pagbasa sa Bibliya. Pinaagi sa pagpadapat sa mga prinsipyo niini sa ilang personal nga mga kinabuhi, sila makabaton sa daghang benepisyo karon ug sa umaabot.—Sal. 119:105.