Pabatia Silang Giabiabi sa Memoryal
1 Sa milabayng pipila ka tuig, 1 lamang sa kada 3 ka tawo nga mitambong sa Memoryal maoy usa ka magmamantala sa maayong balita. Hayan mao gihapon niining tuiga. Ang pipila basin mitambong tungod sa pagdapit sa usa ka paryente o usa ka higala, samtang ang uban mahimong gidapit sa lokal nga mga magmamantala. Bisan pa niana ang uban nga mitambong, bisag bawtismado, dili na aktibo sa ministeryo. Kita sinsero gayong magaabiabi sa tanang nagapakitag pagtahod sa sugo ni Jesus: “Padayong buhata kini sa paghandom kanako.”—1 Cor. 11:24; Roma 15:7.
2 Ang natudlong mga attendants angay nga magmaalisto sa pag-abiabi sa matag usa sa dihang sila mangabot sa Kingdom Hall. Hinuon, kitang tanan makasunod sa dalan sa pagkamaabiabihon sa panahon sa Memoryal. (Roma 12:13) Unsaon man nato paghimo kini?
3 Sa maong gabii ang pipila ka magmamantala puliki unya sa pagtaganag sakyanan alang sa interesadong mga tawo. Ang uban mahimong makaarang sa pag-abot nga sayo pa aron makatimbaya sa mga bisitang moabot nga walay kauban. Sa dihang ang usa ka estranghero mosulod sa tigomanan, abiabiha siya nga mainiton. Suknaa siya kon may kaila ba siyang igsoon. Kon aduna, atimana siya hangtod ang iyang mga kaila moabot. (Itanding Lucas 10:35.) Kon wala siyay bisan kinsang kaila, nganong dili siya dapiton sa paglingkod tupad kanimo? Isaysay kon sa unsang paagi ang bino ug ang tinapay pagagamiton. Basin nanginahanglan siyag tabang sa pagpangita sa mga Kasulatan nga gikutlo sa mamumulong.
4 Sa pagkatapos sa selebrasyon sa Memoryal, sultihi siya nga nalipay ka nga mitambong siya. Mahimong may mga pangutana siya bahin sa atong buluhaton nga imong matubag. Ang imong personal nga interes makatultol ngadto sa panaghisgot sa pipila ka ulohan sa Bibliya. Ang pipila ka ekselenteng mga pagtuon nasugdan sa alistong mga igsoon nga naghimo niini. Una pa siya mobiya sa Kingdom Hall, ipailaila siya sa uban, ug dapita siya nga mobalik.
5 Pagkamalipayon nato sa pag-abiabi sa atong minahal nga mga igsoon nga wala na magtambongan nga makanunayon o dili na aktibo sa ministeryo sa pipila na ka panahon! Inay nga suknaon kon nganong wala na sila nagatambong sa mga tigom, sa yano ipahayag ang imong kalipay nga sila presente. Tingali may butang nga ilang madungog sa diskurso sa Memoryal nga makapalihok kanila sa pagtimbangtimbang pag-usab sa ilang dedikadong pakiglabot kang Jehova. Ang mainitong pag-abiabi nga atong ihatag ug ang kabalaka nga atong ipakita mahimong makatandog sa ilang mga kasingkasing. Pahibaloa sila nga gilaoman nimong makigkita kanila pag-usab.—Roma 1:11, 12.
6 Ang usa ka espesyal nga pahayag publiko igahatag sa Abril 10 nga nag-ulohag: “Ang Matuod nga Relihiyon Nagatagbaw sa mga Panginahanglan sa Tawhanong Katilingban.” Paneguroa nga ang tanang mitambong sa selebrasyon sa Memoryal ginadapit. Maoy atong paglaom nga kadtong manambong niining espesyal nga mga tigom mobating giabiabi ug makasinati sa mainitong espiritu sa panag-ubanay taliwala sa katawhan ni Jehova.—Sal. 133:1.