Magpabilin sa Katilingbanong Kapahayagan sa Imong Paglaom nga Dili Maluya
1 Ang Pagtuon sa Bantayanang Torre mao ang pangunang paagi diin ang espirituwal nga “pagkaon sa hustong panahon” ginatagana alang sa katawhan sa Diyos karon. (Mat. 24:45) Atong ginatagad ang duha ka pangunang tumong: Aron mapalig-on sa espirituwal, ug paghimog katilingbanong kapahayagan sa atong paglaom ngadto sa uban.—Heb. 10:23-25.
2 Pagbenepisyo sa Atong Kaugalingon: Gibanabana nga sa kadaghananang kongregasyon ikatulo lamang sa mamiminaw ang nagatuon sa leksiyon nga abante. Susama usab niana ang gidaghanon sa nagapakig-ambit sa pagkomento. Ang solidong espirituwal nga pagkaon diha sa Pagtuon sa Bantayanang Torre dili gayod bug-os nga masuhop sa panahon sa tigom mismo. Gikinahanglang maggahin ka ug panahon sa pagtuon sa materyal nga abante.
3 Sa dihang nagapangandam sa pagtuon, maoy maayo nga basahon pag-una ang mga pangutana diha sa kahon sa kataposan sa artikulo. Kini makapapunting sa imong pagtagad sa pangunang mga puntos nga pagatagdon sa leksiyon.
4 Sa panahon sa pagtuon paminaw pag-ayo sa gisulti. Hatagig pagtagad ang pangbukas nga mga komento sa tagdumala. Mahimong mopatungha siyag tulo o upat ka pangutana nga pagatubagon, o mahimong repasohon niya ang dagkong mga puntos sa miaging semana nga leksiyon. Kon adunay pipila ka pagpasibo sa atong pagpanabot sa usa ka tagna sa Bibliya o Kasulatanhong prinsipyo, iyang hisgotan kini. Siyempre, ang mga komento sa tagdumala kinahanglang mubo, sanglit kay ang usa sa katuyoan sa pagtuon mao man ang paghatag ug kahigayonan sa kongregasyon sa pagpahayag sa ilang paglaom.
5 Ipahayag ang Imong Paglaom: Ikaw ba makanunayong nagahatag ug mga komento sa panahon sa pagtuon? Ang mubo, pinunting nga mga komento maoy ginapalabi. (Itanding Lucas 21:1-4.) Ang usa ka yanong komento gikan sa kasingkasing ginapabilhan sa tanan. Sagad ang unang komento sa usa ka pangutana angayng mubo ug laktod. Kini magatugot sa uban sa paghisgot sa usa ka kasulatan o sa pagdala sa pagtagad sa usa ka detalye diha sa parapo. Niining paagiha daghan ang makahimog katilingbanong kapahayagan sa ilang paglaom. Ang mga komento kinahanglang kanunayng positibo ug makapalig-on.
6 Kon ikaw nagasugod pa lamang sa pagtambong o kon ikaw nerbiyoso sa pagkomento, mahimong buot nimong mohangyog panabang sa tagdumala. Hangyoa siya sa pagtan-aw sa imong kamot sa dihang ang usa ka tinong parapo ginatagad. Tingali makaboluntaryo ka sa pagbasag usa ka kasulatan ug ipadapat ang kahulogan niini. Himoa ang pipila ka nota diha sa panaplin sa pagtabang kanimo sa paghinumdom kon unsay gusto nimong isulti. Kon ikaw usa ka batan-on, hinumdomi nga ang imong mga komento ginapabilhan.—Mat. 21:16.
7 Hinungdanon gayod nga ipahayag nato ang atong pagtuo, ug ang Pagtuon sa Bantayanang Torre nagataganag maayong kahigayonan sa pagbuhat niana. Ang librong Qualified to Be Ministers mipahayag niana niining paagiha: “Bisan unsa man ang suliran, buntoga kana ug himoang makahatag ka ug labing menos usa ka tubag. Ikaw nakaamot sa tigom, ug bation nimo ang mas maayo tungod niana.” (Panid 99) Busa nganong dili planohon nga makahatag ug labing menos usa ka komento sa sunod nga Pagtuon sa Bantayanang Torre?—Prov. 15:23.