Mga Magtatan-aw nga Nagapanguna—Ang Tagdumala sa Pagtuon sa Bantayanang Torre
1 Ang Bantayanang Torre Nagapahayag sa Gingharian ni Jehova mao ang pangunang tagana sa ‘matinumanon ug maalamong ulipon’ sa pagtaganag espirituwal nga pagkaon alang kanato “sa hustong panahon.” (Mat. 24:45) Ang ansiyano nga nagadumala sa Pagtuon sa Bantayanang Torre dunay hinungdanong kaakohan isip takos nga magtutudlo nga nagapahilunag maayong panig-ingnan sa Kristohanong pagkinabuhi.—Roma 12:7; Sant. 3:1.
2 Aron makatudlo sa epektibong paagi, ang tagdumala sa Pagtuon sa Bantayanang Torre kinahanglang maningkamot sa pagpangandam sa matag semana. Buhaton niya kini sa mainampoon ug mainampingong paagi. Ang iyang idlot nga kaikag sa kongregasyon ginabanaag diha sa tiunay nga panlimbasog sa pag-abot sa atong mga kasingkasing pinaagig materyal nga ginatun-an. Iyang puntingon ang pangunang mga puntos sa leksiyon ug magtabang kanato sa pagsabot kon sa unsang paagi kini nalambigit sa tema sa artikulo.
3 Ang bug-os nga pagpangandam sa iyang bahin nagalakip sa pagtan-aw sa mga kasulatan nga abante aron mahibaloan kon sa unsang paagi kini mapadapat. Padayon niyang himoong panguna ang Pulong sa Diyos pinaagi sa pagdasig sa kongregasyon nga gamitog maayo ang Bibliya sa panahon sa pagtuon. Sa dihang ang hinungdanong punto wala makobrehe sa mga komento gikan sa kongregasyon o sa dihang ang pagpadapat sa yawing kasulatan nalaktawan, mosukna siyag dugang espesipikong pangutana aron sa pagpalugwa sa impormasyon. Niining paagiha, kita iyang matabangan sa pagkadangat sa hustong mga konklusyon ug sa pagkasayod kon unsaon pagpadapat sa atong makat-onan diha sa atong mga kinabuhi.
4 Ang tagdumala sa Pagtuon sa Bantayanang Torre padayong manlimbasog sa pagpauswag sa iya mismong katakos sa pagpanudlo. Dili siya mokomento nga sobra apan magdasig kanato sa pagkomento—sa atong kaugalingong mga pulong, sa mubo, ug deretso sa punto. Siya hayan sa popanahon magpahinumdom kanato nga ang unang mokomento sa usa ka parapo kinahanglang mohatag ug mubo, deretsong tubag sa pinatik nga pangutana. Ang dugang mga komento gikan sa mamiminaw hayan magpatagad sa kapadapatan sa kasulatan, sa nagpaluyong mga argumento, o praktikal nga kapadapatan sa materyal. Pinaagi sa pagpasiugdag personal ug pamilyahanong pagpangandam, ang tagdumala sa Pagtuon sa Bantayanang Torre molihok aron dasigon ang tinguha sa matag usa nga makig-ambit.
5 Ingong “mga tawo nga natudloan ni Jehova,” atong pabilhan ang “mga gasa nga mga tawo,” sama sa mga tagdumala sa Pagtuon sa Bantayanang Torre, kinsa “nagahago sa . . . pagpanudlo.”—Isa. 54:13; Efe. 4:8, 11; 1 Tim. 5:17.