Igahatag ang Usa ka Dakong Pamatuod
1. Gawas sa pakigpulong, unsay makahatag ug pamatuod ngadto sa mga bisita panahon sa Memoryal? Isaysay.
1 Kanus-a? Kini igahatag sa gabii sa Memoryal. Dakong paningkamot ang gihimo aron madapit ang mga tawo sa pagtambong. Gilaoman nga ang mga bisita madasig dili lang sa ilang mapaminawan. Human makatambong sa Memoryal, ang usa ka babaye mikomento bahin sa iyang nakita—ang panaghigalaay sa tanan ug ang nindot ug hinlong pasilidad nga gitukod ug gimentinar sa mga boluntaryo. Busa dili lamang ang mamumulong kondili kitang tanan ang makahatag ug pamatuod niining labing hinungdanong okasyon sa tuig.—Efe. 4:16.
2. Sa unsang paagi ang matag usa kanato makahatag ug pamatuod sa mga bisita?
2 Mainitong Abiabiha ang mga Bisita: Ang atong tam-is nga pahiyom ug mahigalaong “hello” sa mga bisita makahatag ug pamatuod. (Juan 13:35) Bisag dili nimo maestorya ang tanan, mahimo nimong ilailahon kadtong anaa sa imong duol. (Heb. 13:1, 2) Panid-i kon kinsa kadtong daw walay kaila. Tingali nakadawat silag imbitasyon panahon sa kampanya. Mahimo kang mangutana, “Karon ka pa lang ba nakatambong dinhi?” Dapita sila sa paglingkod tupad nimo, ug ayaw pagpanuko sa pagtubag sa ilang mga pangutana. Kon kinahanglan dayon kamong mobiya kay dunay laing kongregasyon nga mogamit sa pasilidad, mahimo kang moingon: “Gusto kong mahibalo kon duna kay komento o kaha pangutana bahin sa programa. Unsaon ta man ka pagkontak?”
3. Unsay atong himoon kon dunay mga dili aktibo nga motambong?
3 Abiabiha ang mga Dili Aktibo: Walay duhaduha nga presente usab ang dili aktibong mga magmamantala, lakip na kadtong motambong lamang panahon sa Memoryal. Abiabiha sila, ug ipabati kanila nga nalipay gayod ka nga makita sila. (Roma 15:7) Dayon mahimo silang duawon sa mga ansiyano aron dasigon nga padayong makig-uban sa kongregasyon. Kami nag-ampo nga daghan sa mga motambong ang matukmod sa paghimaya sa Diyos dili lang sa ilang mapaminawan kondili maingon man sa ilang makita ‘ingong resulta sa atong maayong mga buhat nga niini sila saksing nakakita.’—1 Ped. 2:12.